കാൽവരി മൗണ്ട് ടൂറിസ്​റ്റ്​ കേന്ദ്രം സഞ്ചാരികൾക്കായി തുറന്നു

കട്ടപ്പന: കോവിഡ് പ്രതിരോധ ഭാഗമായി പ്രഖ്യാപിച്ച ലോക്​ഡൗണിനെ തുടർന്ന് ആറു മാസത്തിലധികമായി അടച്ചിട്ടിരുന്ന കാൽവരി മൗണ്ട് വിനോദസഞ്ചാര കേന്ദ്രം സഞ്ചാരികൾക്കായി തുറന്നു. കട്ടപ്പന-ഇടുക്കി ദേശീയപാതയിൽ കാൽവരി മൗണ്ട് ജങ്​ഷനിൽനിന്ന് ഒരു കിലോമീറ്റർ മലമുകളിലേക്ക് കയറിയാൽ കല്യാണത്തണ്ട് മലമുകളിലെത്താം. ഇവിടെയാണ് കാൽവരി മൗണ്ട് ഇക്കോ ടൂറിസം കേന്ദ്രം. ഇടുക്കി ഡാമിലെത്തുന്ന വിദേശ-സ്വദേശി ടൂറിസ്​റ്റുകളിൽ ഏറെയും കാൽവരി മൗണ്ടിൽ എത്തിയാണ് മടങ്ങുന്നത്.

ആറുമാസത്തിനുശേഷം ടൂറിസ്​റ്റ്​ കേന്ദ്രം തുറന്നതറിഞ്ഞ്​ നിരവധി പേരാണ് ആദ്യ ദിനം തന്നെ എത്തിയത്. ശരാശരി 500 മുതൽ 2000 പേർവരെ കാൽവരി മൗണ്ടിൽ എത്തുന്നുണ്ട്. ചൊവ്വാഴ്​ച രണ്ടായിരത്തോളം സന്ദർശകരാണ് കാൽവരി മൗണ്ടിൽ എത്തിയത്.

പ്രവേശനം പാസ്​ മൂലം നിയന്ത്രിച്ചിട്ടുണ്ട്.കോവിഡ് മാനദണ്ഡങ്ങൾ പാലിച്ചും സമൂഹ അകലം പാലിച്ചുമാണ് സഞ്ചാരികൾക്ക് സന്ദർശന അനുമതി. ശരീര ഊഷ്മാവ് പരിശോധിക്കുകയും വാഹനങ്ങൾ അണുമുക്തമാക്കുകയും ചെയ്ത ശേഷമാണ് വിനോദസഞ്ചാരികളെ പ്രവേശിപ്പിക്കുന്നത്. ഇടുക്കി ജലാശയത്തി​െൻറ വിദൂര ദൃശ്യമാണ് കാൽവരി മൗണ്ടി​െൻറ പ്രധാന ആകർഷണം. കോടമഞ്ഞിൽ പുതഞ്ഞുനിൽക്കുന്ന മലനിരകളും അതി​െൻറ താഴ്​വാരത്ത്​ വിശാലമായി പരന്നുകിടക്കുന്ന ഇടുക്കി ജലാശയവും സഞ്ചാരികളുടെ മനം കുളിർപ്പിക്കും.

ടൂറിസ്​റ്റ്​ കേന്ദ്രം അടച്ചിട്ടതോടെ ഈ മേഖലയിൽ ജോലി ചെയ്തിരുന്ന നിരവധിയാളുകൾക്ക് ജോലി നഷ്​ടപ്പെട്ടിരുന്നു. വരുംദിവസങ്ങളിൽ കൂടുതൽ വിനോദസഞ്ചാരികൾ എത്തിയാൽ കാൽവരി മൗണ്ടിന് അത് പുത്തനുണർവാകും.