മെട്രോ തൂണിലെ ചരിവ്: ആശങ്കപ്പെടേണ്ട സാഹചര്യമില്ല -ലോക്​നാഥ് ബെഹ്റ

കൊച്ചി: ഇടപ്പള്ളി പത്തടിപ്പാലത്തെ കൊച്ചി മെട്രോ 347ാം നമ്പർ തൂണിലെ ചരിവിന്‍റെ കാര്യത്തിൽ ആശങ്കപ്പെടേണ്ട സാഹചര്യമില്ലെന്ന് കെ.എം.ആർ.എൽ മാനേജിങ് ഡയറക്ടർ ലോക്​നാഥ് ബെഹ്റ. ചെറിയ ചരിവ് കണ്ടെത്തിയതോടെ കെ.എം.ആർ.എൽ എൻജിനീയർമാരുടെ നേതൃത്വത്തിൽ പഠനം നടത്തി. റിപ്പോർട്ട് കൊച്ചി മെട്രോ ബോർഡ് യോഗത്തിൽ ചർച്ച ചെയ്തു.

ഈ ഭാഗത്തെ നിർമാണത്തിന് മേൽനോട്ടം വഹിച്ച ഡി.എം.ആർ.സി, നിർമാണം നടത്തിയ എൽ ആൻഡ് ടി കമ്പനി എന്നിവരുമായി ബന്ധപ്പെട്ടു. അവരുടെ പരിശോധനയിൽ സാങ്കേതിക പ്രശ്നങ്ങൾ വ്യക്തമായി. പരിഹരിക്കാനുള്ള നിർമാണ പ്രവർത്തനങ്ങൾ പുരോഗമിക്കുകയാണ്.

45 ദിവസത്തിനുള്ളിൽ പൂർത്തീകരിക്കും. മുൻകരുതലെന്ന നിലയിൽ സമീപത്തെ തൂണുകളും പരിശോധിച്ച്​ സുരക്ഷ ഉറപ്പുവരുത്തി. നിർമാണവുമായി ബന്ധപ്പെട്ട് പൊതുജനങ്ങളുടെ സഹകരണവും അദ്ദേഹം അഭ്യർഥിച്ചു.