കോഴിക്കോട്: ജമാഅത്തെ ഇസ്ലാമി മുൻ അഖിലേന്ത്യ ഉപാധ്യക്ഷനും കേരള മുൻ അമീറുമായിരുന്ന പ്രഫസർ കെ.എ സിദ്ദീഖ് ഹസനെ അനുസ്മരിച്ച് യൂത്ത് ലീഗ് സംസ്ഥാന പ്രസിഡന്‍റ് മുനവ്വറലി ശിഹാബ് തങ്ങൾ. ജീവിത വിശുദ്ധിയും ലാളിത്യവും മുഖമുദ്രയാക്കി ജീവിതം സൂക്ഷ്മതയോടെ ജീവിച്ച മഹദ് വ്യക്തിത്വത്തിനുടമയായിരുന്നു സിദ്ദീഖ് ഹസൻ സാഹിബെന്ന് മുനവ്വറലി തങ്ങൾ ഫേസ്ബുക്കിൽ കുറിച്ചു.
''ആശയപരമായി ഭിന്നതയുള്ളവർക്ക് പോലും അദ്ദേഹത്തെ ആദരവോടെയല്ലാതെ ഓർക്കാനാവില്ല. അത്രമേൽ ഹൃദയത്തിൽ തൊട്ടായിരുന്നു അദ്ദേഹം ബന്ധങ്ങൾ കാത്ത് സൂക്ഷിച്ചിരുന്നത്. ആതുര ശുശ്രൂഷയും ജീവകാരുണ്യ പ്രവർത്തനങ്ങളും നിസ്വാർഥമായി അദ്ദേഹം നിർവ്വഹിച്ചു.ഒരു ജീവിതക്രമമെന്ന നിലയിൽ ഇസ്ലാമിക സംഹിതകളെ എല്ലാ വിഭാഗം ജനങ്ങളിലേക്കും എത്തിക്കാൻ അദ്ദേഹം ശ്രദ്ധിച്ചു. സക്കാത്തിന്‍റെ വിനിയോഗവും ഇസ്ലാമിക സാമ്പത്തിക നിയമങ്ങളും വിദ്യാഭ്യാസ തൊഴിൽ മേഖലകളിലെ ബോധവത്കരണവുമൊക്കെ അദ്ദേഹത്തിന്റെ ഇഷ്ട വിഷയങ്ങളും ചര്യയുമായിരുന്നു. അള്ളാഹു അദ്ദേഹത്തിന്റെ നല്ല പ്രവർത്തനങ്ങൾ സ്വീകരിക്കയും മഗ്ഫിറത്ത് തൽകുകയും ചെയ്യുമാറാവട്ടെ. ആമീൻ'' -മുനവ്വറലി തങ്ങൾ പറഞ്ഞു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.