തിരുവനന്തപുരം: ഓൺലൈനിലൂടെ ഉൽപന്നങ്ങൾ വാങ്ങുന്നവർ ഗുണമേൻമയെ കുറിച്ച് അറിയാൻ ആശ്രയിക്കുന്ന പ്രധാനമാർഗമാണ് ഉൽപന്നത്തിന്‍റെ കസ്റ്റമർ റിവ്യൂ. ഒരോ ഉൽപന്നത്തെ കുറിച്ചും അത് വാങ്ങിയവർ അതത് വെബ്സൈറ്റുകളിൽ രേഖപ്പെടുത്തുന്ന നല്ലതും മോശമായതുമായ അഭിപ്രായങ്ങളാണ് കസ്റ്റമർ റിവ്യൂ. നല്ല അഭിപ്രായങ്ങൾ കൂടുന്നതിനനുസരിച്ച് ഉൽപന്നത്തിന്‍റെ സ്റ്റാർ റേറ്റിങ്ങും കൂടും. അപ്പോൾ, കൂടുതൽ റേറ്റിങ് ഉള്ളത് വാങ്ങുന്നതിന് ആളുകൾ മത്സരിക്കും.
എന്നാൽ, എല്ലാ റിവ്യൂവും ഒർജിനലല്ല എന്നാണ് നമ്മുടെ പൊലീസുകാർ പറയുന്നത്. ഉല്‍പന്നങ്ങള്‍ വിറ്റഴിക്കാൻ ഓൺലൈൻ വില്പനക്കാർ വ്യാജ കസ്റ്റമര്‍ റിവ്യൂകള്‍ പടച്ചുവിടുന്നതായാണ് കേരള പൊലീസിന്‍റെ മുന്നറിയിപ്പ്. ഉപഭോക്താക്കളുടെ വിലയിരുത്തൽ എന്ന വ്യാജേന, പണം കൊടുത്ത് എഴുതിപ്പിടിപ്പിച്ച റിവ്യൂകളാണ് പലരും തട്ടിപ്പിന് ഉപയോഗിക്കുന്നത് എന്നാണ് കണ്ടെത്തൽ. ഇതുസംബന്ധിച്ച് മുൻകരുതലെടുക്കാൻ താഴെ പറയുന്ന കാര്യങ്ങൾ ശ്രദ്ധിക്കണമെന്നും പൊലീസ് അഭ്യർഥിക്കുന്നു:
⭐ റിവ്യൂ എഴുതാൻ ഫ്രീലാൻസ് ജോബ് സൈറ്റുകളും സോഷ്യൽ മീഡിയ ഗ്രൂപ്പുകളും ഉപയോഗിക്കുന്നു.
⭐ പോസിറ്റീവ് അവലോകനങ്ങൾക്ക് കാശോ സൗജന്യ ഉൽപ്പന്നമോ വാഗ്ദാനം ചെയ്യുന്നു.
⭐ ചുരുങ്ങിയ സമയത്തിനുള്ളിൽ ഒരു ഉൽപ്പന്നത്തിന്റെ പരസ്യത്തിന് ചുവട്ടിൽ ധാരാളം അവലോകനങ്ങൾ പ്രത്യക്ഷപ്പെടുന്നു.
⭐ മോശപ്പെട്ട ഉൽപ്പന്നമെന്നറിയാതെ, റിവ്യൂ എഴുതിയാൽ ഇത്ര ശതമാനം കുറവ് നൽകാമെന്ന ഉറപ്പിന്മേൽ സാധനങ്ങൾ വാങ്ങി പറ്റിക്കപ്പെടുന്നവരും ഉണ്ട്.
⭐ അതിശയിപ്പിക്കുന്ന വിലക്കുറവിൽ മയങ്ങി വീഴരുത്. ബ്രാൻഡും മോഡലും നൽകി സെർച്ച് ചെയ്താൽ പലരുടെ അനുഭവങ്ങളും ഓൺലൈനിൽ കാണാൻ കഴിയും.
⭐നെഗറ്റീവ് അവലോകനങ്ങൾ ഉണ്ടായിരുന്ന ഉൽപന്നത്തിന് പെട്ടെന്ന് 5-സ്റ്റാർ റേറ്റിംഗുകൾ ഉണ്ടായത് ശ്രദ്ധയിൽപെട്ടിട്ടുണ്ടോ? ഗുണനിലവാരം ഒറ്റരാത്രികൊണ്ട് മാറിയിട്ടില്ലെന്ന് കണക്കിലെടുത്താൽ റിവ്യൂ തട്ടിപ്പിനുള്ള ചാൻസ് ഉണ്ട് എന്ന് നമുക്ക് അനുമാനിക്കാം.
⭐ റിവ്യൂയിലെ അവിശ്വസനീയമായ അവകാശവാദങ്ങളും വിചിത്രമായ ഫോർമാറ്റിംഗും ഇമെയിൽ അഡ്ഡ്രസ്സുകളിലെ സംശയാസ്പദമായ അക്ഷരങ്ങളും ശ്രദ്ധിക്കണം.
⭐ വ്യാജ ഉപഭോക്തൃ അവലോകനങ്ങൾ മിക്കപ്പോഴും ഏറ്റവും മികച്ചതായിരിക്കും. റിവ്യൂനേക്കാളും ഉപരി ഉൽപ്പന്നത്തിന്റെ സവിശേഷതകൾ വിവരിക്കുന്ന പോലെയായിരിക്കും അത്. അവയിലെ വ്യാകരണവും അക്ഷരവിന്യാസവും പ്രത്യേക രീതിയിലുള്ള പദപ്രയോഗങ്ങളും ശ്രദ്ധിച്ചാൽ അപകടം മനസ്സിലാകും.
⭐ ഇത്തരം വിൽപനക്കാരുടെ ഉൽപ്പന്നങ്ങളുടെ മുൻപുള്ള ഉള്ള റിവ്യൂകളും ശ്രദ്ധിക്കുക.
⭐ ഒരു ഉൽപ്പന്നത്തിന് ഒട്ടനവധി റിവ്യൂകൾ കാണുന്നുണ്ടോ? ആ കമ്പനിയുടെ ഉൽപ്പന്നങ്ങൾക്ക് 5-സ്റ്റാർ റേറ്റിംഗുകൾ മാത്രം നൽകുന്നുണ്ടോ?
⭐ ഒരാൾ ഒന്നിലധികം തവണ ഒരു ഉൽപ്പന്നം അവലോകനം ചെയ്തിട്ടുണ്ടോ? ധാരാളം ഇനങ്ങൾ വാങ്ങിയാതായി കാണിച്ച് അവയെല്ലാം അവലോകനം ചെയ്തിട്ടുണ്ടോ? എങ്കിൽ ഉൽപ്പന്നങ്ങൾക്ക് ഓർഡർ നല്കുന്നതിന് മുൻപ്. രണ്ടുതവണ ചിന്തിക്കുക.
⭐ വളരെ ഹ്രസ്വമോ വളരെ ദൈർഘ്യമേറിയതോ ആണോ റിവ്യൂകൾ ? റിവ്യൂ പൂർണ്ണമായും പോസിറ്റീവ് ആണോ ?
⭐ ആവർത്തിച്ചുള്ള അവലോകനമാണോ? ഉൽപ്പന്നത്തിന്റെ മറ്റ് റിവ്യൂകളുടെ അതേ വാക്യങ്ങൾ ആണോ കാണുന്നത് ?
⭐ മുൻപ് സമാന ഉൽപ്പന്നം അവലോകനം ചെയ്തയാൾ തന്നെയാണോ എഴുതിയത് ?
⭐ വ്യാജ ഉപഭോക്തൃ അവലോകനങ്ങൾ കണ്ടെത്താൻ ശ്രമിക്കുമ്പോൾ, സ്റ്റാർ റേറ്റിംഗിനപ്പുറം പോകേണ്ടതുണ്ട്. റിവ്യൂകളുടെ ഉള്ളടക്കം സൂക്ഷ്മമായി പരിശോധിക്കുക.
⭐ ചില സൈറ്റുകൾ വെരിഫൈഡ് പർചേസ് റിവ്യൂ കൊടുക്കുന്നുണ്ട്. അത്തരം റിവ്യൂകൾ വായിച്ചു നോക്കിയാൽ മേന്മകളും ന്യൂനതകളും വ്യക്തമായി മനസ്സിലാക്കാം
⭐ ചില സൈറ്റുകൾ അവരുടെ വിറ്റഴിക്കാത്ത ഉൽപ്പന്നങ്ങൾ, വിറ്റഴിക്കുന്ന ഉൽപ്പന്നങ്ങളുടെ റിവ്യൂവിന്‍റെ കൂടെ ചേർക്കാറുണ്ട്. ഇത്തരം സന്ദർഭങ്ങളിൽ റിവ്യൂ ഏതു ഉത്പന്നത്തിേന്‍റതാണെന്നു ചെക്ക് ചെയ്യുക.
⭐ നിങ്ങളുടെ കാശാണ്. അത് പാഴാകില്ലെന്ന് ഉറപ്പുവരുത്തുക.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.