മഞ്ജുവാര്യർ പ്രധാന വേഷത്തിൽ എത്തുന്ന ‘ആമി’യിൽ സാഹിത്യകാരി കമല സുരയ്യയുടെ ഭർത്താവ് മാധവ ദാസായി അഭിനയിക്കുന്ന നടൻ മുരളി ഗോപിയുടെ ചിത്രം പുറത്ത്. തന്‍റെ ഫേസ്ബുക്ക് പേജിലൂടെ മുരളി ഗോപിയാണ് മഞ്ജുവാര്യരുമൊത്തുള്ള തന്‍റെ വേഷവും ലുക്കും പുറത്തുവിട്ടത്.
ചിത്രത്തിൽ മറ്റൊരു പ്രധാന കഥാപാത്രത്തെ അവതരിപ്പിക്കുന്ന നടൻ അനൂപ് മേനോൻ ഫേസ്ബുക്കിലൂടെ തന്‍റെ വേഷവും ലുക്കും നേരത്തെ പുറത്തുവിട്ടിരുന്നു. സഹീർ അലി എന്ന ശക്തമായ കഥാപാത്രമായാണ് അനൂപ് വെള്ളിത്തിരയിലെത്തുന്നത്. കമല സുരയ്യയുടെ ജീവിതം ആസ്പദമാക്കി നിർമിക്കുന്ന 'ആമി' സംവിധാനം ചെയ്യുന്നത് കമൽ ആണ്.
പ്രമുഖ കവി ഗുൽസാർ ആണ് ഗാനരചന നിർവഹിച്ചത്. ഗുൽസാർ രചിച്ച രണ്ട് ഉറുദു ഗാനങ്ങളും റഫീഖ് അഹമ്മദ് എഴുതിയ രണ്ട് ഗാനങ്ങളും ഉൾപ്പെടെ നാല് ഗാനങ്ങളാണ് ചിത്രത്തിലുള്ളത്. എം. ജയചന്ദ്രനും തൗഫീഖ് ഖുറേഷിയുമാണ് സംഗീത സംവിധാനം. കാമറ: മധു നീലകണ്ഠൻ.
കമല സുരയ്യയായി അഭിനയിക്കുന്നതിൽ നിന്ന് ബോളിവുഡ് നടി വിദ്യാബാലൻ പിന്മാറിയത് വലിയ വിവാദങ്ങൾക്ക് വഴിവെച്ചിരുന്നു. തുടർന്ന് കമല സുരയ്യയായി അഭിനയിക്കാൻ എഴുത്തുകാരികളും സിനിമാനടിമാരും അടക്കം നിരവധി പേർ സംവിധായകൻ കമലിനെ സന്നദ്ധത അറിയിച്ചിരുന്നു. പക്ഷേ, ആമിയായി മഞ്ജു വാര്യരെ കമൽ തീരുമാനിക്കുകയായിരുന്നു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.