എട്ടുവർഷം മുമ്പ്​ തിലകൻ ‘അമ്മ’ക്കെഴുതിയ കത്ത്​ വീണ്ടും ചർച്ചയാകുന്നു

കൊച്ചി: മരണംവരെ അഭിനേതാക്കളുടെ സംഘടനയായ ‘അമ്മ’ക്ക്​ പുറത്തുനിൽക്കേണ്ടിവന്ന നടൻ തിലകൻ 2010ൽ സംഘടന നേതൃത്വത്തിനെഴുതിയ കത്ത്​ വീണ്ടും ചർച്ചയാകുന്നു. നടിയെ ആക്രമിച്ച കേസിൽ വിധി വരുംമ​​ുമ്പ്​  ദിലീപിനെ തിരിച്ചെടുക്കാൻ ‘അമ്മ’തീരുമാനിക്കുകയും ഇതിനുപിന്നാലെ നാല്​ നടിമാർ സംഘടനയിൽനിന്ന്​ രാജിവെക്കുകയും ചെയ്​ത പശ്ചാത്തലത്തിലാണ്​ അകാരണമായി തന്നെ പുറത്തുനിർത്തിയത്​ ചോദ്യംചെയ്​ത്​ ‘അമ്മ’യുടെ അന്ന​ത്തെ ജനറൽ സെക്രട്ടറി മോഹൻലാലിന്​ തിലകൻ എഴുതിയ കത്ത്​ ചർച്ചയാകുന്നത്​. 

മലയാള സിനിമയുടെ കോടാലിയാണ്​ ‘അമ്മ’യെന്ന്​ തുറന്നടിച്ചതിനെത്തുടർന്നാണ്​ തിലകനെ പുറത്താക്കിയത്​. ക്രിമിനൽകേസിലെ പങ്കാളിത്തമാണ്​ ദിലീപിനെതി​രായ കുറ്റമെങ്കിൽ തിലകനെതിരെ പറയാനുള്ളത്​ അച്ചടക്കലംഘനം മാത്രമായിരുന്നു. എന്നിട്ടും അദ്ദേഹത്തിന്​ ‘അമ്മ’യിൽ തിരിച്ചെത്താനായില്ല. അച്ചടക്കസമിതി​ മുമ്പാകെ ഹാജരാകാതിരുന്ന തിലക​​​െൻറ വിശദീകരണം കേൾക്കാതെ ഏകപക്ഷീയമായിരുന്നു  പുറത്താക്കൽ. എന്നാൽ, വിശദീകരണം കേൾക്കാതെ പുറത്താക്കിയത്​ നിയമവിരുദ്ധമാണെന്ന്​ ചൂണ്ടിക്കാട്ടിയാണ്​ ഇപ്പോൾ ദിലീപിനെ തിരിച്ചെടുക്കുന്നത്​. അഭി​​പ്രായം തുറന്നുപറഞ്ഞതി​​​െൻറപേരിൽ പുറത്താക്കപ്പെട്ട തിലകനെ ആജീവനാന്തം ശത്രുവായി പ്രഖ്യാപിച്ച ‘അമ്മ’ ക്രിമിനൽ കേസിൽ പ്രതിയായ ദിലീപിനോട്​ മൃദുസമീപനം സ്വീകരിച്ചുവെന്നാണ്​ ആക്ഷേപം.

അംഗങ്ങളുടെ അവകാശം ചവിട്ടിമെതിക്കു​േമ്പാൾ ‘അമ്മ’യുടെ മൗനം പൊറുക്കാനാവാത്ത തെറ്റാണെന്നും ജനാധിപത്യ മര്യാദകളുടെ ലംഘനം സംഘടന ന്യായീകരിക്കുകയാണെന്നും തിലകൻ കത്തിൽ കുറ്റപ്പെടുത്തിയിരുന്നു. തലസ്​ഥാനനഗരിയിലെ ഒരുവിഭാഗം സിനിമരാജാക്കന്മാരാണ്​ തന്നെ മാറ്റിനിർത്തിയതിനു പിന്നിൽ. ഗണേഷ്​കുമാറി​​​െൻറ ഗുണ്ടകൾ വധഭീഷണി മുഴക്കിയതിനെക്കുറിച്ച്​ ‘അമ്മ’യിൽ പരാതിപ്പെട്ടിട്ടും നടപടിയുണ്ടായില്ല. തന്നെ പുറത്താക്കിയ വിവരം മാധ്യമങ്ങളിലൂടെയാണ്​ അറിഞ്ഞത്​. കരാർ ഒപ്പിട്ട്​ അഡ്വാൻസ്​ നൽകിയ ചിത്രങ്ങളിൽനിന്ന്​ പോലും ചിലർ ഇടപെട്ട്​ ഒഴിവാക്കി. ‘അമ്മ’ എന്ന സംഘടനയോട്​ എന്നും​ ബഹുമാനമുണ്ട്​.  എന്നാൽ, എക്​സിക്യൂട്ടിവിലെ ചില അംഗങ്ങളുടെ പെരുമാറ്റം മാഫിയയെപ്പോലെയാണെന്നായിരുന്നു തിലക​​​െൻറ ആരോപണം. അനുഭവങ്ങളുടെ വെളിച്ചത്തിൽ  ദിലീപ്​ ‘വിഷമാണെന്ന്’​ പറയാൻ മടിയില്ലെന്നും തിലകൻ തുറന്നടിച്ചിരുന്നു.

തിലകനോടും ദിലീപിനോടും ഇരട്ടനീതിയാണെന്ന്​ ചൂണ്ടിക്കാട്ടി സിനിമക്കകത്തുതന്നെ പലരും പരസ്യ പ്രതിഷേധവുമായി രംഗത്തെത്തിയിട്ടുണ്ട്​. എന്നാൽ, ഇത്തരക്കാർക്കും ഡബ്ല്യു.സി.സിക്കും പിന്തുണയുമായി കൂടുതൽ പേർ എത്തുന്നുണ്ടോ എന്നാണ്​ ‘അമ്മ’ ഉറ്റുനോക്കുന്നത്​.