'നീ കൂടെയു​ണ്ടെങ്കിൽ കണ്ണുകളെന്തിനു വേറെ...'- കണ്ണുകാണാത്ത പട്ടിക്കുട്ടിയെ നടയിറങ്ങാൻ നായ സഹായിക്കുന്ന വിഡിയോ വൈറൽ

'കൺമണി നീയെൻ കരം പിടിച്ചാൽ കണ്ണുകളെന്തിന്​ വേറേ?' എന്ന പാട്ട്​ ഓർമ്മ വരും ഈ വിഡിയോ കണ്ടാൽ. കണ്ണുകാണാത്തൊരു പട്ടിക്കുട്ടിയെ നടയിറങ്ങാൻ സഹായിക്കുന്ന നായയാണ്​ വിഡിയോയിലുള്ളത്​. ദി ഫീൽ ഗുഡ്​ പേജ്​ എന്ന ട്വിറ്റർ അക്കൗണ്ടിൽ പോസ്​റ്റ്​ ചെയ്​തിരിക്കുന്ന വിഡിയോ നിരവധി പേരുടെ മനംകവർന്നിരിക്കുകയാണ്​. വിഡിയോ ഇതുവരെ മൂന്നര ലക്ഷത്തിലധികം പേരാണ്​ കണ്ടിരിക്കുന്നത്​.

വീട്ടിനുള്ളിലെ ഓരോ നടയും ഇറങ്ങിയ ശേഷം നായ വളരെ ശ്രദ്ധപൂർവം പട്ടിക്കുട്ടിയെ പടിയിറങ്ങാൻ സഹായിക്കുന്നതാണ്​ വിഡിയോയിലുള്ളത്​. 'ഈ നല്ല കുട്ടി കണ്ണുകാണാത്ത ചങ്ങാതിയെ നടയിറങ്ങാൻ സഹായിക്കുകയാണ്​' എന്ന കാപ്​ഷനാണ്​ വിഡിയോക്ക്​ നൽകിയിരിക്കുന്നത്​. നിരവധി പേർ റീട്വീറ്റ്​ ചെയ്​ത വിഡിയോക്ക്​ വികാരനിർഭരമായ കമൻറുകളും ലഭിച്ചിട്ടുണ്ട്​. 'ഇത്തരം സ്​നേഹം വിലമതിക്കാനാകാത്ത സമ്മാനമാണ്​' എന്നായിരുന്നു ഒരാളുടെ കമൻറ്​. 'ഇന്ന്​ ഞാൻ ഇൻറർനെറ്റിൽ കണ്ട ഏറ്റവും മാധുര്യമുള്ള കാഴ്​ച' എന്നായിരുന്നു മറ്റൊരാളുടെ കമൻറ്​. 'ഈ പ്രിയപ്പെട്ട സുഹൃത്തിനെപോലെ കനിവില്ലാത്ത നിരവധി മനുഷ്യർ ഉണ്ട്​' എന്ന കമൻറും വിഡിയോക്ക്​ കിട്ടി.