ക്രെഡിറ്റ്​ കാർഡ്​ വിവരങ്ങൾ വരെ മോഷ്​ടിക്കും; ഫോണിൽ നുഴഞ്ഞുകയറുന്ന ഭീകരൻ 'ബ്ലാക്​റോക്ക്​'

ന്യൂഡൽഹി: അപകടകാരിയായ പുതിയ ആൻഡ്രോയ്​ഡ്​ മാൽവയറിനെ കുറിച്ച്​ മുന്നറിയിപ്പ്​ നൽകിയിരിക്കുകയാണ്​ രാജ്യത്തെ മുൻനിര സൈബർ സുരക്ഷാ ഏജൻസിയായ സി.ഇ.ആർ.ടി. സൈബർ കുറ്റവാളികൾക്ക് വ്യക്​തികളുടെ ബാങ്കിങ്​ വിവരങ്ങളും പാസ്​വേഡുകളും മറ്റ്​ നിർണായക ഡാറ്റകളും ബ്ലാക്​റോക്ക്​ എന്ന്​ പേരായ മാൽവയറിന്​​ ചോർത്തി നൽകാൻ സാധിക്കുമെന്ന്​ ഗവേഷകർ പറയുന്നു.

ഇ-മെയിൽ - ഇ-കൊമേഴ്​സ്​ ആപ്പുകളിൽ നിന്നും സമൂഹ മാധ്യമ ആപ്പുകളിൽ നിന്നും സ്വകാര്യ വിവരങ്ങൾ അടങ്ങിയ ഡാറ്റ മോഷ്​ടിക്കാൻ മാൽവയറിന്​ കഴിയുമെന്ന്​ സി.ഇ.ആർ.ടി മുന്നറിയിപ്പ്​ നൽകി. കഴിഞ്ഞ മാസമാണ്​ നെതർലാൻഡ്​സിലുള്ള സൈബർ സെക്യൂരിറ്റി സ്ഥാപനമായ ത്രെട്ട്​ ഫാബ്രിക്​ ബ്ലാക്​ റോക്കിനെ കണ്ടെത്തിയത്​. സിറോക്​സ്​ ബാങ്കിങ്​ മാൽവയറി​െൻറ കോഡിൽ നിന്ന്​ ഉരുത്തിരുഞ്ഞതാണ്​​ ബ്ലാക്​റോക്ക്​ എന്ന്,​ ത്രെട്ട്​ ഫാബ്രിക് ഗവേഷകർ ചൂണ്ടിക്കാട്ടുന്നു. 337 ആൻഡ്രോയ്​ഡ്​ ആപ്പുകളെയാണ്​ ഇത്​ ലക്ഷ്യം വെക്കുന്നത്​.

ഫോണുകളിലേക്ക്​ ബ്ലാക്​റോക്ക്​ നുഴഞ്ഞുകയറിയാൽ, എന്താണ്​ സംഭവിക്കുക...?

​നാം ഡൗൺലോഡ്​ ചെയ്യുന്നതും അല്ലാത്തതുമായ ആപ്ലിക്കേഷൻ​ ​െഎക്കണുകൾ ദൃശ്യമാവുന്ന ഫോണി​െൻറ ഹോമിൽ ബ്ലാക്​റോക്ക്​ ആപ്പ്​ ​െഎക്കൺ കാണാൻ സാധിക്കില്ല എന്നതാണ്​ ഏറ്റവും ശ്രദ്ധേയമായ കാര്യം. ഫോണിലേക്ക്​ പ്രവേശിച്ചാൽ താനെ അവ അപ്രത്യക്ഷമാവും. പിന്നാലെ ഫോണി​െൻറ നിയന്ത്രണം കൈവശപ്പെടുത്താനായി ഒരു ഗൂഗ്​ൾ അപ്​ഡേറ്റായി ബ്ലാക്​റോക്ക് മാൽവയർ​ രൂപം മാറും.

ഫോണി​െൻറ ആക്​സസബിലിറ്റി സേവനങ്ങൾക്കായി മാൽവയർ ഒരു റിക്വസ്റ്റ്​ തരികയും ചെയ്യും. അത്​ യൂസർ സമ്മതിച്ചാൽ മറ്റുള്ള സേവനങ്ങൾ ഉപയോഗിക്കാനുള്ള അധിക അനുമതികൾ മാൽവയർ താനെ സൃഷ്​ടിക്കും. അതിലൂടെ യൂസർമാരുടെ സമ്മതമില്ലാതെ തന്നെ ഫോണിലെ എല്ലാ വിവരങ്ങളും മോഷ്​ടിക്കാൻ ബ്ലാക്​റോക്കിന്​ സാധിക്കും. ആ വിവരങ്ങൾ ഉപയോഗിച്ച്​ സൈബർ കുറ്റവാളികൾക്ക്​ ​വ്യക്​തികളുടെ അക്കൗണ്ടുകളിൽ നിന്നും പണം പിൻവലിക്കാനും, സോഷ്യൽ മീഡിയ വിവരങ്ങൾ ഉപയോഗിച്ച്​ ബ്ലാക്​മെയിൽ ചെയ്യാനും കഴിഞ്ഞേക്കും.

ഗൂഗ്​ളി​െൻറ പ്ലാറ്റ്​ഫോമായ പ്ലേസ്​റ്റോറിൽ നിന്നല്ലാതെ ആപ്പുകൾ ഡൗൺലോഡ്​ ചെയ്യാതിരിക്കലാണ്​ ബ്ലാക്​ റോക്​ പോലുള്ള മാൽവയറുകളിൽ നിന്നും രക്ഷനേടാനുള്ള ഏക മാർഗമെന്ന്​ സൈബർ ഏജൻസി അഭിപ്രായപ്പെട്ടു. ബ്രൗസർ ഉപയോഗിക്കു​േമ്പാഴടക്കം ഫോണുകളിൽ പോപ്​-അപ്പായി വരുന്ന പരസ്യങ്ങളിൽ ക്ലിക്​ ചെയ്യാതിരിക്കാനും ശ്രദ്ധിക്കണം. ഉപയോക്​താക്കളുടെ ക്രെഡിറ്റ്​ കാർഡ്​ വിവരങ്ങളും സ്വകാര്യ വിവരങ്ങളും ചോർത്താനിടയുള്ളതിനാൽ ട്രോജൻ വലിയ അപകടം പിടിച്ചതാണെന്നും സി.ഇ.ആർ.ടി പറഞ്ഞു.