ദക്ഷിണേന്ത്യയിലെ ജനപ്രിയ വിനോദ സഞ്ചാര കേന്ദ്രങ്ങളിലൊന്നാണ് മൈസൂരു. കൊട്ടാരങ്ങളുടെ നാട് കൂടിയാണ് കർണാടകയിലെ ഇൗ നഗരം. അതോടൊപ്പം ചന്ദനത്തിെൻറ കാര്യത്തിലും ഏറെ പ്രശസ്തിയാർജിച്ചതാണ്. ഇവ രണ്ടും ഒരുമിച്ച് ചേരുകയാണെന്ന റിപ്പോർട്ടുകളാണ് ഇപ്പോൾ പുറത്തുവരുന്നത്. പ്രശസ്തമായ മൈസൂർ കൊട്ടാരത്തിൽ ഉടൻ തന്നെ ഇന്ത്യയിലെ ആദ്യ ചന്ദനമര മ്യൂസിയം ഒരുങ്ങും.
ചന്ദനത്തിെൻറ സോപ്പുകൾ, എണ്ണ, സുഗന്ധദ്രവ്യങ്ങൾ എന്നിവക്ക് മൈസൂരു ഏറെ പ്രശസ്തമാണ്. ഇതിെൻറ ചരിത്രത്തെക്കുറിച്ചും കൃഷിയെക്കുറിച്ചും അവബോധം നൽകാൻ സഹായിക്കുന്ന തരത്തിലാണ് മ്യൂസിയം ഒരുക്കുന്നത്. കൂടാതെ, ചന്ദനത്തിെൻറ ഭംഗിയും വൈവിധ്യവും സാക്ഷിയാകാനുള്ള അവസരവും സന്ദർശകർക്ക് ലഭിക്കും.
നവംബർ 25ന് ശേഷം കർണാടക മുഖ്യമന്ത്രി ബി.എസ്. യെദിയൂരപ്പ മ്യൂസിയം ഉദ്ഘാടനം ചെയ്യും. മൈസൂരു ഫോറസ്റ്റ് ഡിവിഷനാണ് മ്യൂസിയം ഒരുക്കുന്നത്. ആരണ്യ ഭവനിലെ ചന്ദനമരം ഡിപ്പോയിൽ താൽക്കാലികമായി ഒരുങ്ങുന്ന മ്യൂസിയം പിന്നീട് കൊട്ടാരത്തിലേക്ക് മാറ്റുമെന്നാണ് വിവരം.
ചന്ദനമര വർഗ്ഗീകരണം, ചന്ദനകൃഷി രീതികൾ, വിവിധതരം ചന്ദനമരം എന്നിവയെക്കുറിച്ച് കൂടുതലറിയാനുള്ള വേദിയാകുമിത്. ചന്ദനത്തിെൻറ വളർച്ച, നിരവധി രോഗങ്ങൾ തടയാൻ ഇത് എങ്ങനെ സഹായിക്കും തുടങ്ങിയവ സംബന്ധിച്ച പോസ്റ്ററുകൾ ഇവിടെ പ്രദർശിപ്പിക്കും. ഓഡിറ്റോറിയം, പ്രൊജക്ടർ സ്‌ക്രീൻ, സുഖപ്രദമായ ഇരിപ്പിടങ്ങൾ എന്നിവയും മ്യൂസിയത്തിൽ സജ്ജീകരിക്കും. ചന്ദനവുമായി ബന്ധപ്പെട്ട വിവരങ്ങളും കേൾക്കാനുള്ള സൗകര്യവുമുണ്ടാകും.
മലയാളികൾ പലതവണ അനുഭവിച്ചറിഞ്ഞ കാഴ്ചകളാണ് മൈസൂരു നഗരവും കൊട്ടാരവുമെല്ലാം. എന്നാൽ, വീണ്ടും ഇൗ കൊട്ടാരം സന്ദർശിക്കാനുള്ള അവസരമാണ് ഇന്ത്യയിലെ ആദ്യ ചന്ദമര മ്യൂസിയം വരുന്നതോടെ സംജാതമാകുന്നത്. മൈസൂരു ഭരിച്ചിരുന്ന വാഡിയാര്‍ രാജവംശത്തിെൻറ ഒൗദ്യോഗിക വസതിയായിരുന്നു ഈ കൊട്ടാരം. മൈസൂരിലെ ഏറ്റവും പ്രസിദ്ധമായ കൊട്ടാരവും അംബാ വിലാസ് എന്ന് പ്രാദേശികമായി അറിയപ്പെടുന്ന ഇതുതന്നെയാണ്.
വാഡിയാര്‍ രാജാക്കന്മാര്‍ 14ാം നൂറ്റാണ്ടിലാണ് ആദ്യമായി കൊട്ടാരം നിര്‍മിക്കുന്നത്. എന്നാല്‍, ഇത് പിൽക്കാലത്ത് പലവട്ടം തകര്‍ക്കപ്പെടുകയും പുനര്‍നിര്‍മിക്കപ്പെടുകയുമുണ്ടായി. ഇന്നുകാണുന്ന കൊട്ടാരത്തിെൻറ നിര്‍മണം 1897ലാണ് ആരംഭിക്കുന്നത്. 1912ല്‍ പണി പൂര്‍ത്തിയായി. 1940കളില്‍ ഈ കൊട്ടാരം വീണ്ടും വിപുലീകരിച്ചു. ഇന്‍ഡോ സാര്‍സനിക് എന്നറിയപ്പെടുന്ന വാസ്തുശൈലിയിലാണ് മൈസൂര്‍ കൊട്ടാരം നിര്‍മിച്ചിട്ടുള്ളത്. ഹിന്ദു, രജപുത്ര, ഗോതിക്, ഇസ്ലാം വാസ്തുവിദ്യകളുടെ സങ്കരരൂപമാണിത്.
മാര്‍ബിളില്‍ തീര്‍ത്ത അര്‍ധകുംഭകങ്ങളോടുകൂടിയ മൂന്നുനില മന്ദിരമാണ് ഈ കൊട്ടാരം. വലിയൊരു ഉദ്യാനത്താല്‍ കൊട്ടാരം ചുറ്റപ്പെട്ടിരിക്കുന്നു. ഇതിനകത്ത് 12ഓളം ക്ഷേത്രങ്ങളുമുണ്ട്. ഹെണ്‍ട്രി ഇര്‍വിന്‍ എന്ന ബ്രിട്ടീഷുകാരനാണ് കൊട്ടാരസമുച്ചയത്തിെൻറ വാസ്തുശില്പി. എല്ലാ വര്‍ഷവും ശരത്കാലത്ത് നടക്കുന്ന ദസറ മഹോത്സവത്തിെൻറ പ്രധാനവേദി ഈ കൊട്ടാരമാണ്.
കൊട്ടാരത്തിെൻറ ചുമരുകളെല്ലാം ചിത്രപ്പണികളാല്‍ സമ്പന്നമാണ്. രണ്ട് ദര്‍ബാര്‍ ഹാളുകളും നടുമുറ്റവുമുണ്ട് അകത്ത്. ഇതിന് സമീപം പഴയ കൊട്ടാരവും കാണാം. ഇത് മറ്റൊരു മ്യൂസിയമാണ്. രാജഭരണ കാലത്തെ ആയുധങ്ങള്‍, പല്ലക്കുകള്‍, വസ്ത്രങ്ങള്‍ തുടങ്ങിയവ ഇവിടെ പ്രദർശിപ്പിച്ചിട്ടുണ്ട്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.