മനാമ: കേരളീയ സമാജം വനിത വേദി ബഹ്റൈനിലെ വിവാഹിതരായ വനിതകൾക്കായി സംഘടിപ്പിക്കുന്ന കലാ പ്രാഗൽഭ്യ മത്സരമായ ‘അംഗനശ്രീ’യുടെ ഫൈനൽ റൗണ്ടിന് പാചക മത്സരത്തോടെ തുടക്കമായി. പുതുവത്സരദിനത്തിൽ സമാജം ഡയമണ്ട് ജൂബിലി ഹാളിൽ നടന്ന മത്സരത്തിൽ 14 പേരാണ് പങ്കെടുത്തത്. രണ്ട് മണിക്കൂറിനുള്ളിൽ തയാറാക്കാൻ കഴിയുന്ന ഇഷ്ടവിഭവങ്ങൾ ഒരുക്കി മത്സരാർഥികൾ പാചക വൈദഗ്ധ്യം തെളിയിച്ചു. ഏകാഭിനയം, മിറർ ആക്ട്, പരമ്പരാഗത ഭാരതീയ വസ്ത്രാലങ്കാരം, പൊതു വിജ്ഞാനം, മുഖാമുഖം തുടങ്ങിയവയാണ് നടക്കാനിരിക്കുന്ന മത്സരങ്ങൾ.മത്സരാർഥിയുടെ കുടുംബാംഗങ്ങൾക്കും സുഹൃത്തുക്കൾക്കും പങ്കെടുക്കാവുന്ന ഫാമിലി റൗണ്ടും ഇതിെൻറ ഭാഗമായി നടത്തുന്നുണ്ട്. ഫെബ്രുവരിഏഴിനാണ് സമാപനവും സമ്മാന വിതരണവും. ‘അംഗനശ്രീ’ പട്ടവും സ്വർണ നെക്ലേസുമാണ് ഒന്നാം സമ്മാനം. രണ്ടും മൂന്നും സ്ഥാനം നേടുന്ന വനിതകൾക്ക് യഥാക്രമം ഡയമണ്ട് റിംഗും സ്വർണ നാണയവും ലഭിക്കും. ഇതിനു പുറമെ കാണികൾ തെരഞ്ഞെടുക്കുന്ന മത്സരാർത്ഥിക്കും പ്രത്യേക സമ്മാനം നൽകുമെന്ന് ഭാരവാഹികൾ അറിയിച്ചു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.