ഫ്രൻഡ്സ് സോഷ്യൽ അസോസിയേഷൻ വെസ്റ്റ് റിഫ പഠനക്യാമ്പിൽനിന്ന്
മനാമ : ഫ്രൻഡ്സ് സോഷ്യൽ അസോസിയേഷൻ വെസ്റ്റ് റിഫ യൂനിറ്റ് പരിസ്ഥിതി ഇസ്ലാം' എന്ന വിഷയത്തിൽ പഠന ക്യാമ്പ് സംഘടിപ്പിച്ചു. വെസ്റ്റ് റിഫ ദിശ സെന്ററിൽ നടന്ന പരിപാടിയിൽ പി.എം. അഷ്റഫ് പ്രഭാഷണം നടത്തി.
മനുഷ്യന്റെ ആർത്തിയും അഹങ്കാരവും പരിസ്ഥിതിയുടെ ദ്രുതഗതിയിലുള്ള നാശത്തിന് കാരണമായിക്കൊണ്ടിരിക്കുന്നതായും ദൈവത്തിന്റെ വരദാനമായ പരിസ്ഥിതിയെ വരും തലമുറക്കു കൂടെ അനുഭവിക്കാൻ ദൈവിക ദർശനത്തിന്റെ പിൻബലംകൊണ്ട് മാത്രമെ സാധ്യമാകൂ എന്ന് അദ്ദേഹം പറഞ്ഞു.
എല്ലാ മതങ്ങളും ഏക ദൈവത്വമാണ് ഉദ്ഘോഷിക്കുന്നതെന്നും പുരോഹിതരുടെ കൈകടത്തലുകൾ മതത്തെ വികലമാക്കിയെന്നും അതാണ് മനുഷ്യർ തമ്മിലുള്ള പരസ്പര വൈരാഗ്യത്തിന് കാരണമെന്നും ‘ദഅവത്തിന് ഒരു ആമുഖം’ എന്ന വിഷയം അവതരിപ്പിച്ചുകൊണ്ട് അബ്ദുൽ ഹഖ് പറഞ്ഞു.
‘ജനസേവനം ദൈവാരാധന’ എന്ന വിഷയം അവതരിപ്പിച്ച് മജീദ് തണൽ സംസാരിച്ചു. സ്വന്തം അനുഭവങ്ങൾ പങ്കുവെച്ചുകൊണ്ട് തിക്തമായ അനുഭവങ്ങൾ ഉണ്ടായാലും ദൈവിക പ്രതിഫലം എന്ന ലക്ഷ്യമായിരിക്കണം ജനസേവകനെ മുന്നോട്ട് നയിക്കേണ്ടത് എന്നും അദ്ദേഹം കൂട്ടിച്ചേർത്തു.‘സാമ്പത്തിക അച്ചടക്കം ഇസ്ലാമിൽ’ എന്ന വിഷയത്തിൽ എൻജിനീയർ അശ്റഫ് അലി സംസാരിച്ചു. സമ്പത്തല്ല സമ്പന്നത എന്നും സമ്പന്നൻ സമ്പത്തുള്ളവൻ ആവണമെന്നില്ലെന്നും അദ്ദേഹം അഭിപ്രായപ്പെട്ടു.
നൗഷാദ് തിരുവനന്തപുരം ഹിറാ ഗുഹയുടെ ചരിത്ര പശ്ചാത്തലം വിവരിച്ചു. ദൈവ മാർഗത്തിൽ ജീവൻ ത്യജിച്ച അനുചരന്മാരുടെ അവസ്ഥയെ പ്രവാചകൻ കൈകാര്യം ചെയ്ത രീതി വിവരിച്ചുകൊണ്ട് ബഷീർ കാവിൽ ചരിത്രപഠന ക്ലാസ് നടത്തി. നൗഷാദ്, അശ്റഫ് എന്നിവർ ഗാനമാലപിച്ചു.
ദിശ സെന്ററിൽ നടന്ന പഠനക്യാമ്പിൽ യൂനിറ്റ് പ്രസിഡന്റ് മൂസ കെ. ഹസൻ അധ്യക്ഷത വഹിച്ചു. ഉവൈസ് ഖിറാഅത്ത് നടത്തി. ഏരിയ ആക്ടിങ് പ്രസിഡന്റ് അഹ്മദ് റഫീഖ് ആശംസകൾ നേർന്നു. ബഷീർ കാവിൽ പ്രാർഥന നടത്തി.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.