പമ്പാവാസൻ നായർ,- അഹമ്മദ് യൂസഫ് അൽ അൻസാരി- ഖലീൽ അഹമ്മദ് അൽ ദൈലമി
മനാമ: പ്രവാസി വെൽഫെയർ ബഹ്റൈൻ ഏർപ്പെടുത്തിയ പ്രഥമ 'ബിസിനസ് -സോഷ്യൽ ഐക്കൺ' അവാർഡ് അമാദ് ഗ്രൂപ് മാനേജിങ് ഡയറക്ടർ പമ്പാവാസൻ നായർക്ക് നൽകുമെന്ന് ഭാരവാഹികൾ അറിയിച്ചു. ബഹ്‌റൈനിലെയും ജി.സി.സിയിലെയും ബിസിനസ് രംഗത്ത് ഇതിനകം ശ്രദ്ധേയമായ നേട്ടം കൈവരിച്ച പമ്പാവാസൻ നായർ ജീവകാരുണ്യ രംഗത്തും വേറിട്ട പ്രവർത്തനങ്ങൾ നടത്തുന്ന വ്യക്തിത്വമാണ്. സാമൂഹിക പ്രവർത്തകരെയും ജീവകാരുണ്യ പ്രവർത്തനത്തെയും ഏറെ വിലമതിക്കുന്ന അദ്ദേഹം കോവിഡ് ബാധിച്ചു മരിച്ച ബഹ്‌റൈനിലെ സാമൂഹിക പ്രവർത്തകൻ സാം സാമുവലിന്റെ കുടുംബത്തെ സഹായിക്കാനും മുൻ പന്തിയിലുണ്ടായിരുന്നു. സമാനമായ നിരവധി ജീവകാരുണ്യ പ്രവർത്തനങ്ങൾക്ക് അദ്ദേഹം നേരിട്ടും അല്ലാതെയും നേതൃത്വം നൽകിവരുന്നുണ്ട്.
പ്രവാസി വെൽഫെയർ ബഹ്റൈൻ 'മെഡ്കെയർ', 'വെൽകെയർ' എന്നീ ലേബലുകളിൽ നിരവധി സേവന പ്രവർത്തനങ്ങൾ നടത്തിക്കൊണ്ടിരിക്കുന്ന കൂട്ടായ്മയാണ്. ജീവകാരുണ്യ, സേവന മേഖലയിൽ പ്രവർത്തിക്കുന്ന വ്യക്തിത്വങ്ങളെ ആദരിക്കുകയും അതിലൂടെ ബിസിനസ് മേഖലയിലുള്ളവർ അടക്കമുള്ളവർക്ക് സേവനരംഗത്ത് കടന്നുവരാനുള്ള പ്രചോദനം നൽകുകയും ചെയ്യുകയെന്നതാണ് പരിപാടിയിലൂടെ ഉദ്ദേശിക്കുന്നത്.
വെള്ളിയാഴ്ച സിഞ്ച് അൽ അഹ്‌ലി ക്ലബിൽ നടക്കുന്ന പ്രവാസി നൈറ്റിൽ വെച്ചാണ് ആദരവ് നൽകുക. വൈകീട്ട് ആറിന് ആരംഭിക്കുന്ന പരിപാടി ബഹ്റൈൻ പാർലമെന്റ് അംഗം അഹമ്മദ് യൂസഫ് അൽ അൻസാരി ഉദ്‌ഘാടനം ചെയ്യും. വേറിട്ട ജീവ കാരുണ്യ പ്രവർത്തനത്തിലൂടെ രാജ്യത്ത് ശ്രദ്ധേയനായ 'അനാഥരുടെ പിതാവ്' എന്നറിയപ്പെടുന്ന ഖലീൽ അഹമ്മദ് അൽ ദൈലമി (ബാബാ ഖലീൽ) വിശിഷ്ടാതിഥിയായി പങ്കെടുക്കും.
പരിപാടിയിൽ സ്വദേശികളും വിദേശികളുമടക്കം നിരവധി സാമൂഹിക പ്രവർത്തകരും പങ്കെടുക്കുമെന്ന് ഭാരവാഹികൾ അറിയിച്ചു. പരിപാടിയോടനുബന്ധിച്ച് ആകർഷകവും വ്യത്യസ്‌തവുമായ കലാപരിപാടികളും അരങ്ങേറുമെന്ന് പ്രസിഡന്റ് ബദറുദ്ദീൻ പൂവാർ, ജന. സെക്രട്ടറി സി.എം. മുഹമ്മദലി എന്നിവർ അറിയിച്ചു. പരിപാടിയുടെ ഒരുക്കങ്ങൾ പൂർത്തിയായതായി സംഘാടക സമിതി ചെയർമാൻ അബ്ദുൽ മജീദ് തണൽ വ്യക്തമാക്കി.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.