ജഹ്​റയിൽ ടയർ കൂമ്പാരത്തിൽ വൻ തീപിടിത്തം

കുവൈത്ത്​ സിറ്റി: ജഹ്​റയിൽ പഴയ ടയർ കൂമ്പാരത്തിലുണ്ടായ വൻ തീപിടിത്തം അഗ്​നിശമന വിഭാഗം അണച്ചു. നാല്​ അഗ്​നിശമന കേന്ദ്രങ്ങളിൽനിന്നുള്ള അംഗങ്ങൾ ഏറെ പാടുപെട്ടാണ്​ തീയണച്ചത്​. 25,000 ചതുരശ്ര മീറ്ററിൽ തീ പടർന്നിരുന്നു. ആർക്കും പരിക്കില്ല.പത്തുലക്ഷം ചതുരശ്ര മീറ്ററിലാണ്​ പഴയ ടയറുകൾ കുന്നുകൂടിക്കിടക്കുന്നത്​.

അഗ്​നിശമന സേനയുടെ സമയോചിത ഇടപെടലാണ്​ കൂടുതൽ ഭാഗങ്ങളിലേക്ക്​ പടരുന്നത്​ ഒഴിവാക്കിയത്​. രാജ്യത്തി​െൻറ വിവിധ ഭാഗങ്ങളിൽനിന്നുള്ള ഉപയോഗശൂന്യമായ ടയറുകളാണ് ഇവിടെ കൂട്ടിയിട്ടിരുന്നത്.നേരത്തേ റഹിയയിലായിരുന്നു സൂക്ഷിച്ചിരുന്നത്​. ടയറുകളിൽ തീപിടിക്കുന്നത് നിത്യസംഭവമായതോടെ കുവൈത്ത്​ മുനിസിപ്പാലിറ്റി വിഷയത്തിൽ ഇടപെടുകയും ടയർ പൂർണമായി അൽ നആയിം പ്രദേശത്തേക്ക് മാറ്റുകയുമായിരുന്നു.ഉപയോഗശൂന്യമായ ടയറുകൾ രാജ്യത്ത്​ വലിയ പാരിസ്ഥിതിക പ്രശ്​നമായിട്ടുണ്ട്​. ജഹ്റ ഗവർണറേറ്റിൽ അൽ നആയിം പ്രദേശത്ത്​ മില്യൺ കണക്കിന് ടയറുകൾ കുമിഞ്ഞുകൂടിക്കിടക്കുന്നു.