ത്വാഇഫിൽ ആരംഭിക്കുന്ന ലുലു ഹൈപർമാർക്കറ്റിനായി ലുലു ഗ്രൂപ്പ് ചെയർമാനും എം.ഡിയുമായ എം.എ. യൂസഫ് അലി, മനാസിൽ അൽഖോബറ റിയൽ എസ്റ്റേറ്റ് എൽ.എൽ.സി സി.ഇ.ഒ. തമർ അൽഖുറാഷിയുമായി കരാർ ഒപ്പിട്ടപ്പോൾ
റിയാദ്: സൗദി അറേബ്യയിൽ വ്യാപാര ശൃംഖലയുടെ വിപുലീകരണത്തിന്‍റെ ഭാഗമായി ത്വാഇഫിൽ 5.1 കോടി റിയാൽ മുതൽമുടക്കാൻ ലുലു ഗ്രൂപ്പ്. ത്വാഇഫ് സിറ്റി വാക്ക് മാളിൽ ലുലു ഹൈപർമാർക്കറ്റ് ആരംഭിക്കാനുള്ള സംരംഭത്തിനായി ലുലു ഗ്രൂപ്പ് ചെയർമാനും എം.ഡിയുമായ എം.എ. യൂസഫ് അലി, മനാസിൽ അൽഖോബറ റിയൽ എസ്റ്റേറ്റ് എൽ.എൽ.സി സി.ഇ.ഒ. തമർ അൽഖുറാഷിയുമായി കരാർ ഒപ്പിട്ടു. മക്കയിലാണ് കരാർ ഒപ്പിടൽ ചടങ്ങ് നടന്നത്.
രണ്ട് നിലകളിലായി 21,000 ചതുരശ്ര മീറ്റർ വിസ്തീർണത്തിലാണ് സ്റ്റോർ സജ്ജീകരിക്കുന്നത്. ത്വാഇഫ് നിവാസികൾക്ക് ലുലു റീട്ടെയിൽ ശൃംഖലയുടെ ലോകോത്തര ഷോപ്പിങ് അനുഭവമാണ് പ്രദാനം ചെയ്യാനാരുങ്ങുന്നത്. 2023 ജനുവരിയിൽ ഹൈപർമാർക്കറ്റ് പ്രവർത്തനം ആരംഭിക്കും. സൗദി പൗരന്മാർക്ക് ഇതിലൂടെ കൂടുതൽ തൊഴിലവസരങ്ങൾ ലഭിക്കും. മക്ക പ്രവിശ്യയിൽ സ്ഥിതി ചെയ്യുന്ന ത്വാഇഫ് അപൂർവ പ്രകൃതിഭംഗിയാലും സുഖശീതളിമയാലും അനുഗ്രഹീതമായ വളരെ ഉയരത്തിലുള്ള പ്രദേശമാണ്. റോസാപ്പൂക്കൾ ധാരാളമായി പൂത്തുമലരുന്ന ഇവിടം സൗദിയുടെ അനൗദ്യോഗിക വേനൽക്കാല തലസ്ഥാനവുമാണ്.
ഹജ്, ഉംറ തീർഥാടകർക്ക് ഇഹ്‌റാം കെട്ടുന്നതിനുള്ള പ്രധാന മീഖാത്തുകളിലൊന്ന് സ്ഥിതി ചെയ്യുന്ന ത്വാഇഫ് മക്ക പുണ്യനഗരത്തിലേക്കുള്ള പ്രവേശന കവാടങ്ങളിലൊന്നുമാണ്. മതപരമായ ടൂറിസം ഭൂപടത്തിലും ത്വഇഫിന്‍റെ പ്രാധാന്യം ഇത് അടിവരയിടുന്നുണ്ട്. സൗദിയിൽ പുത്തനുണർവ് സൃഷ്ടിക്കുന്ന പുതിയ ബിസിനസ് നയത്തെ സ്വാഗതം ചെയ്ത ലുലു ഗ്രൂപ്പ് ചെയർമാനും എം.ഡിയുമായ എം.എ. യൂസഫ് അലി ഇത് രാജ്യത്തിന് പുതിയ സാമ്പത്തിക ഊർജം പകരുന്നുണ്ടെന്നും വ്യക്തമാക്കി. സൗദി ഭരണനേതൃത്വത്തിന്‍റെ കാഴ്ചപ്പാടിനും രാജ്യത്തിന്‍റെ വളർച്ചയ്ക്കും അനുസൃതമായ കാഴ്ചപ്പാടോടെയാണ് ലുലുവും മുന്നേറ്റം തുടരുന്നതെന്നും രാജ്യത്തെ രണ്ടും മൂന്നും നിര പട്ടണങ്ങളിലേക്കും പ്രശസ്ത വിനോദസഞ്ചാര കേന്ദ്രങ്ങളുള്ള മേഖലകളിലേക്കും റീട്ടെയിൽ ശൃംഖല വ്യാപിപ്പിക്കാനൊരുങ്ങുകയാണെന്നും അദ്ദേഹം പറഞ്ഞു.
ത്വാഇഫ് സിറ്റി വാക്ക് മാളിലൊരുങ്ങൂന്ന ലുലു ഹൈപർമാർക്കറ്റ് നഗരത്തിന് ആരോഗ്യകരവും ലോകോത്തരവുമായ ഷോപ്പിങ് അനുഭവം നൽകുമെന്ന് തനിക്ക് ഉറപ്പുണ്ടെന്നും അദ്ദേഹം കൂട്ടിച്ചേർത്തു. നിക്ഷേപങ്ങൾക്കും സാമ്പത്തിക വികസനത്തിനും വലിയ പ്രോത്സാഹനം നൽകുന്ന സൽമാൻ രാജാവിനും, കിരീടാവകാശി അമീർ മുഹമ്മദ് ബിൻ സൽമാനും ഭരണകൂടത്തിനും നന്ദി അറിയിക്കുന്നു. സൗദിയിൽ 26 ലുലു ഹൈപ്പർമാർക്കറ്റുകളും എക്‌സ്‌പ്രസ് സ്റ്റോറുകളുമാണുള്ളത്. രാജ്യത്തുടനീളമുള്ള വിവിധ ഹൈപർമാർക്കറ്റുകളിലായി നിലവിൽ ഗ്രൂപ്പിന് കീഴിൽ 1,100 സ്ത്രീകൾ ഉൾപ്പെടെ 3,000 സൗദി പൗരന്മാർ ജോലി ചെയ്യുന്നതായും എം.എ. യൂസഫ് അലി കൂട്ടിച്ചേർത്തു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.