ജിദ്ദയിലെ ശൈഖുൽ ഇസ്‍ലാം ഇബ്നു തൈയ്മിയ മദ്റസ വാര്‍ഷികം
ജിദ്ദ: കുരുന്നുകളുടെ ഭാവനകള്‍ക്ക് വർണപ്പൊലിമയേകി ജിദ്ദയിലെ ശൈഖുൽ ഇസ്‍ലാം ഇബ്നു തൈയ്മിയ മദ്റസ വാര്‍ഷിക പരിപാടികള്‍ ശ്രദ്ധേയമായി. ജിദ്ദ ഇന്ത്യൻ ഇസ്‍ലാഹി സെന്റർ ഓഡിറ്റോറിയത്തില് നടന്ന പരിപാടി ഇന്ത്യന്‍ ഇസ്‍ലാഹി സെന്റർ നാഷനൽ കമ്മിറ്റി പ്രസിഡന്റ് അബ്ബാസ് ചെമ്പൻ ഉദ്‌ഘാടനം ചെയ്തു.
വിദ്യാര്‍ഥികളുടെ സര്‍ഗശേഷി വിളിച്ചോതുന്ന വിവിധ കലാപരിപാടികള്‍ അരങ്ങേറി. ഖുർആൻ: ഹിഫ്ള്-തജ്‍വീദ്, പ്രസംഗം: ഇംഗ്ലീഷ്-മലയാളം, ഗാനം: മലയാളം-അറബി എന്നിങ്ങനെയുള്ള സ്റ്റേജ് പരിപാടികൾക്ക് പുറമെ സ്റ്റേജിതര മത്സരങ്ങളായ കൈയെഴുത്ത്, കഥാരചന, പദനിർമാണം, ബാങ്കുവിളി എന്നിവയും സംഘടിപ്പിച്ചു.
വിദ്യാർഥികളെ കിഡ്സ്, ജൂനിയർ, സീനിയർ, സൂപ്പർ സീനിയർ എന്നീ വിഭാഗങ്ങളാക്കി തിരിച്ച് നാല് ഹൗസുകളാക്കി ആൺകുട്ടികൾക്കും പെൺകുട്ടികൾക്കും പ്രത്യേകമായിട്ടായിരുന്നു മത്സരങ്ങൾ സംഘടിപ്പിച്ചത്. കലാസാംസ്കാരിക മേഖലയിൽ ജിദ്ദയിലെ അറിയപ്പെടുന്ന വ്യക്തിത്വങ്ങളായ ജമാൽ പാഷ, റഷീദ് പറങ്ങോടത്ത്, ആശ ഷിജു, അബ്ദുറഊഫ് തിരൂരങ്ങാടി, അബ്ദുറഹ്മാൻ ഉമരി, ജാസിം കടവത്ത്, ശംസുദ്ദീൻ, സാജിദ മീൻപറ്റ, നാദിർ നൂരിഷ, അമീൻ നസൂഹ് എന്നിവർ മത്സരങ്ങളുടെ വിധി നിർണയിച്ചു.
സീനിയർ വിഭാഗം ആൺകുട്ടികളിൽ മുഹമ്മദ് ഷീസ് സജീറും ജൂനിയർ വിഭാഗം ആൺകുട്ടികളിൽ അബ്ദുല്ല അഷ്റഫും സീനിയർ വിഭാഗം പെൺകുട്ടികളിൽ ഷെസയും ജൂനിയർ വിഭാഗം പെൺകുട്ടികളിൽ ആയിശ ശിഹാബും വ്യക്തിഗത ചാമ്പ്യൻഷിപ് സ്വന്തമാക്കി. കിഡ്സ് വിഭാഗത്തിൽ കുരുന്നുകളുടെ ദഫ്മുട്ട്, അറബിക് നഷീദ്, ഒപ്പന എന്നീ പരിപാടികൾ നടന്നു.
കെ.ടി. മുനീർ (ഒ.ഐ.സി.സി), അഷ്‌റഫ്‌ നിലമ്പൂർ, ഖാലിദ്‌ ചെമ്പൻ, അഷ്‌റഫ്‌ ഏലംകുളം, ഉമർ ഏലംകുളം, ലക്മീൽ കാലിക്കറ്റ് തുടങ്ങിയ ജിദ്ദയിലെ പ്രമുഖ വ്യക്തിത്വങ്ങളും ഇസ്‍ലാഹി സെന്റർ ഭാരവാഹികളും എക്സിക്യൂട്ടിവ് അംഗങ്ങളും വിജയികൾക്കുള്ള സമ്മാനങ്ങൾ വിതരണം ചെയ്തു. ഗായകൻ ജമാൽ പാഷ മാപ്പിളഗാനം ആലപിച്ചു. നൂരിഷ വള്ളിക്കുന്ന് ചടങ്ങിൽ സ്വാഗതം പറഞ്ഞു. ഇസ്‍ലാഹി സെന്റർ ജനറൽ സെക്രട്ടറിയും ശൈഖുൽ ഇസ്‍ലാം ഇബ്നു തൈയ്മിയ മദ്റസ പ്രിൻസിപ്പലുമായ ശിഹാബ് സലഫി പരിപാടികൾ നിയന്ത്രിച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.