അബൂദബി: ഐ.സി.എ അനുമതിയില്ലാതെ യു.എ.ഇയിലേക്ക് എത്തുന്ന കാര്യത്തിൽ ആശയക്കുഴപ്പം നിലനിൽക്കെ തലസ്ഥാനത്തെ രാജ്യാന്തര വിമാനത്താവളത്തിൽ ഇത്തിഹാദ് വിമാനത്തിൽ എത്തിയ അഞ്ചു മലയാളികൾ പുറത്തിറങ്ങാനാവാതെ കുടുങ്ങി. ഫെഡറൽ അതോറിറ്റി ഫോർ ഐഡൻറിറ്റി ആൻഡ് സിറ്റിസൺഷിപ്പ് (ഐ.സി.എ) യാത്രാ പെർമിറ്റ് ഇല്ലെന്ന കാരണത്താൽ എമിഗ്രേഷൻ ലഭിക്കാത്തതാണ് ഇവർക്ക് വിനയായത്. ഇവരിൽ നാല് പേരെ തിങ്കളാഴ്ച ദുബൈയിൽ നിന്നും നാട്ടിലേക്കുള്ള വിമാനത്തിൽ തിരിച്ചയക്കുമെന്ന് അധികൃതർ അറിയിച്ചിട്ടുണ്ട്. യാത്രാചെലവ് ഇത്തിഹാദ് വഹിക്കും. അനുമതി ശരിയായതിനെ തുടർന്ന് ഒരാളെ അബൂദബിവിമാനത്താവളത്തിൽ നിന്ന് പുറത്തിറങ്ങാൻ അനുവദിച്ചു.
ശനിയാഴ്ച പുലർച്ചെ 4.30ന് കൊച്ചിയിൽ നിന്നു പുറപ്പെട്ട ഇത്തിഹാദ് വിമാനത്തിലാണ് മലയാളികളായ ബാബു, രമേശ് കുന്നംകുളം, മിഥുൻ, സാലിഹ് ചങ്ങരംകുളം, അബൂബക്കർ എന്നിവർ എത്തിയത്. ഇതിൽ അബൂബക്കറിന് മാത്രമാണ് പുറത്തിറങ്ങാനായത്. കറാച്ചിയിൽ നിന്നെത്തിയ യാത്രക്കാരെയും തിരിച്ചയച്ചതായും ഇവർ പറയുന്നു. യു.എ.ഇ റസിഡൻസി വിസയുള്ളവർക്ക് അബുദബി, അൽഐൻ വിമാനത്താവളങ്ങളിൽ ഇറങ്ങാൻ ഐ.സി.എ ട്രാവൽ പെർമിറ്റ് ആവശ്യമില്ലെന്ന അറിയിപ്പിനെ തുടർന്നെത്തിയവരാണ് വിമാനത്താവളത്തിൽ കുടുങ്ങിയത്.
അനുമതിയും രജിസ്ട്രേഷനും വേണം
ദുബൈ: റസിഡൻറ് വിസക്കാർക്ക് യു.എ.ഇയിലേക്ക് വരുന്നതിന് ഐ.സി.എ അനുമതിയും രജിസ്ട്രേഷനും നിർബന്ധമാണെന്ന് എയർ ഇന്ത്യ എക്സ്പ്രസ്. smartservices.ica.gov.ae വഴി അപേക്ഷിക്കുേമ്പാൾ ഗ്രീൻ ടിക് ലഭിച്ചാൽ അതിനർഥം നിങ്ങൾക്ക് അനുമതി ലഭിച്ചു എന്നാണ്. അതേസമയം, റെഡ് അടയാളമാണ് ലഭിക്കുന്നതെങ്കിൽ യാത്ര ചെയ്യാൻ കഴിയില്ല. uaeentry.ica.gov.ae വഴി രജിസ്റ്റർ ചെയ്യണമെന്നും എമിറേറ്റ്സ് ഐ.ഡി, പാസ്പോർട്ട് തുടങ്ങിയവ അപ്ലോഡ് ചെയ്യണമെന്നും എയർ ഇന്ത്യ അറിയിച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.