ഉദ്ഘാടക എത്താൻ വൈകി; ജി. സുധാകരൻ പൊതുപരിപാടിയിൽ നിന്ന് ഇറങ്ങിപ്പോയി

ആലപ്പുഴ: ഉദ്ഘാടകയായ സി.പി.എം കേന്ദ്രകമ്മിറ്റി അംഗം എത്താൻ വൈകിയതിനെ തുടർന്ന് ജി. സുധാകരൻ പൊതുപരിപാടിയിൽ നിന്ന് ഇറങ്ങിപ്പോയി. പരിപാടിയിൽ പ​ങ്കെടുക്കാൻ കൃത്യസമയത്തു തന്നെ സുധാകരൻ എത്തിയിരുന്നു. സി.ബി.സി വാര്യർ അനുസ്മരണ പരിപാടിക്കിടെയാണ് സംഭവം. ഉദ്ഘാടക എത്താത്തതിനെ തുടർന്ന് പരിപാടി തുടങ്ങാനും വൈകി.

ശനിയാ​ഴ്ച രാവിലെ 10ന് ഹരിപ്പാട് പരിപാടി തുടങ്ങുമെന്നായിരുന്നു സംഘാടകർ അറിയിച്ചിരുന്നത്. എന്നാൽ പത്തരയായിട്ടും ഉദ്ഘാടകയായ സി.എസ്. സുജാത എത്തിയില്ല. തുടർന്ന് ചാരുംമൂട്ടിൽ ഒരു പരിപാടിയിൽ പ​ങ്കെടുക്കാനുണ്ടെന്ന് പറഞ്ഞ് സുധാകരൻ ഇറങ്ങിപ്പോവുകയായിരുന്നു.

സി.ബി.സി.വാരിയർ അവാർഡ് ഊരാളുങ്കൽ ലേബർ കോൺട്രാക്റ്റ് സൊസൈറ്റിക്കു സമ്മാനിക്കുകയായിരുന്നു സുധാകരന്റെ ചുമതല. വിദ്യാഭ്യാസ അവാർഡുകൾ സമ്മാനിക്കേണ്ട മന്ത്രി സജി ചെറിയാനും ചടങ്ങിന് എത്തിയില്ല. അധ്യക്ഷനാകേണ്ട സി.പി.എം ജില്ല സെക്രട്ടറി ആർ. നാസറും സമയത്ത് എത്തിയില്ല. തുടർന്ന് സംഘാടകരോട് ക്ഷോഭിച്ചാണ് സുധാകരൻ ഇറങ്ങിപ്പോയത്.