തിരുവനന്തപുരം: സിനിമാ മേഖലയിൽ ശക്തമായ ഗുണ്ടാസാന്നിധ്യമുണ്ടെന്ന് ചലച്ചിത്ര നടനും എം.എൽ.എയുമായ കെ.ബി. ഗണേഷ് കുമാർ. സിനിമാ-മാഫിയ-റിയൽ എസ്റ്റേറ്റ് ബന്ധം സിനിമയിൽ ശക്തമാണ്. മലയാളി നടിയെ ഗുണ്ടാസംഘം തട്ടിക്കൊണ്ടുപോയി ആക്രമിച്ച കേസിന്‍റെ ഫശ്ചാത്തലത്തിലാണ് മാധ്യമപ്രവർത്തകരോട് ഗണേഷ്കുമാറിന്‍റെ വെളിപ്പെടുത്തൽ.
പല നടിമാർക്കും ഇതിനുമുൻപും സമാനമായ അനുഭവങ്ങൾ നേരിടേണ്ടി വന്നിട്ടുണ്ട്. ഇവരെ ഭീഷണിപ്പെടുത്തി പണം തട്ടിയിട്ടുണ്ട്. എന്നാൽ അവരാരും പരാതിപ്പെടാൻ തയാറായില്ല. ഈ സംഭവങ്ങളെക്കുറിച്ചും അന്വേഷണം നടത്തണമെന്ന് ഗണേഷ്കുമാർ ആവശ്യപ്പെട്ടു. ബോംബെയില്‍ സിനിമാ, റിയല്‍ എസ്റ്റേറ്റ് അധോലോക മാഫിയ വാഴുന്ന ഒരു കാലമുണ്ടായിരുന്നു. ഇപ്പോള്‍ കൊച്ചിയിലും അതു പോലാണ്. കൊച്ചിയില്‍ നടക്കുന്ന സിനിമകള്‍ ശ്രദ്ധിച്ചാല്‍ അത് മനസിലാകും -ഗണേഷ് കുമാര്‍ പറഞ്ഞു.
പുറത്തു പറയാനാകാത്ത പല കാര്യങ്ങളും സിനിമാ മേഖലയുമായി ബന്ധപ്പെട്ട് സംഭവിക്കുന്നുണ്ട്. ഇക്കാര്യങ്ങൾ പരസ്യമായി പറയാനാകില്ല. ഇക്കാര്യത്തിൽ തന്നോട് അഭിപ്രായ വ്യത്യാസം പുലർത്തുന്ന സിനിമാക്കാർക്ക് ഫോണിലൂടെ സംഭവത്തെക്കുറിച്ച് വിശദീകരിച്ചുകൊടുക്കാൻ തയാറാണെന്നും അദ്ദേഹം പറഞ്ഞു. ഇക്കാര്യങ്ങളെല്ലാം മുഖ്യമന്ത്രിയെ കണ്ട് നേരിട്ട് ധരിപ്പിക്കുമെന്നും എം.എൽ.എ അറിയിച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.