പയ്യന്നൂർ പാസ്പോർട്ട് ഓഫിസിലെത്തിയവർ ഊഴം കാത്ത്
വെയിലിൽ നിൽക്കുന്നു
പയ്യന്നൂർ: ഉരുകുന്ന ഈ ചൂടുകാലത്തും പാസ്പോർട്ട് വേണോ. എങ്കിൽ വെയിൽ കൊള്ളൽ നിർബന്ധമാണ്. കയറിനിൽക്കാൻ മരത്തണൽപോലുമില്ലാതെ ദുരിതം പേറുകയാണ് പയ്യന്നൂർ പാസ്പോർട്ട് സേവാകേന്ദ്രത്തിലെത്തുന്നവർ. പാസ്പോർട്ട് സേവാകേന്ദ്രത്തിലെത്തുന്നവരുടെ പ്രയാസം നിരവധി തവണ വാർത്തയായെങ്കിലും ബന്ധപ്പെട്ടവർ പരിഹാരം കാണുന്നില്ല.
കണ്ണൂർ, കാസർകോട് ജില്ലകളിലെ നൂറുകണക്കിന് അപേക്ഷകരാണ് പ്രതിദിനം ഈ കേന്ദ്രത്തിലെത്തുന്നത്. രാവിലെ 10 മുതൽ ഓഫിസിലെത്തുന്നവർ വിളി കാത്ത് ഓഫിസിനു പുറത്തു കാത്തു നിൽക്കണം. വിളി വന്നാൽ മാത്രമേ അകത്തെ ശീതീകരിച്ച മുറികളിലേക്ക് പ്രവേശനമുള്ളൂ.
എപ്പോൾ വിളിക്കുമെന്നറിയാത്തതിനാൽ ഓഫിസിനു മുന്നിൽ വെയിൽ കൊണ്ടു തന്നെ നിൽക്കണം. മഴക്കാലമായാൽ മഴയും നനയണം. കോടികൾ ചെലവിട്ടാണ് കേന്ദ്രങ്ങൾ തുടങ്ങിയത്. അടുത്ത് സേവനമെത്തിക്കാനാണ് സ്വകാര്യ മേഖലയിൽ വികേന്ദ്രീകൃത സേവാകേന്ദ്രം തുടങ്ങിയത്. ഇതാണ് ദുരിതകേന്ദ്രമായി മാറിയത്. ചെറിയ തുകയുണ്ടായാൽ മുന്നിൽ പന്തൽ നിർമിക്കാം.
വെയിൽ കൊള്ളണമെന്നു മാത്രമല്ല ഇരിക്കാൻ ബെഞ്ചുപോലും ഇല്ല. മറ്റ് ഓഫിസുകൾ സന്ദർശകർക്കിരിക്കാൻ സ്ഥലസൗകര്യങ്ങൾ നൽകുമ്പോഴാണ് പാസ്പോർട്ട് അധികൃതർ ഉപഭോക്താവിനെ വെയിലത്തും മഴയത്തും നിർത്തുന്നത്. എന്നാൽ അകത്തു കയറിയാൽ ശീതീകരിച്ച വിശാലമായ മുറിയിൽ ഇരിപ്പിടങ്ങൾ ഉണ്ടുതാനും. അതുകൊണ്ട് പേരൊന്നു വിളിച്ചുകിട്ടാനാണ് കേന്ദ്രത്തിലെത്തുന്നവരുടെ പ്രാർഥന.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.