ഏഴിക്കരയിലെ ലങ്ക പാലം തകർച്ചയിൽ ; നടപ്പാതയുടെ ഒരുഭാഗത്തെ കോൺക്രീറ്റ് പൊളിഞ്ഞുവീണു

പറവൂർ: ഏഴിക്കര പഞ്ചായത്തിലെ രണ്ട്​ വാർഡുകളെ തമ്മിൽ ബന്ധിപ്പിക്കുന്ന ലങ്ക പാലത്തി​െൻറ മധ്യഭാഗത്തെ കോൺക്രീറ്റ് തകർന്നനിലയിൽ. പാലത്തിലെ നടപ്പാതയിൽ മധ്യഭാഗത്താണ് കോൺക്രീറ്റ് അടർന്ന്​ വലിയ ഗർത്തം രൂപപ്പെട്ടത്. ഇതുവഴി കാൽനടപോലും പ്രയാസമാണ്​.

പാലത്തി​െൻറ മിക്ക ഭാഗങ്ങളും ദ്രവിച്ച് ഏതുസമയത്തും അടർന്നുവീഴാവുന്ന നിലയിലാണ്. പഞ്ചായത്തിലെ 11, 12 വാർഡുകളെ ബന്ധിപ്പിക്കുന്ന ഏക ആശ്രയമാണ് ലങ്ക പാലം. മൂന്ന് പതിറ്റാണ്ടി​െൻറ പഴക്കമുണ്ട്. കൈവരികളും നടപ്പാതയും പില്ലറുകളും ജീർണിച്ച് കമ്പികൾ തുരുമ്പ​ുപിടിച്ചിരിക്കുകയാണ്. കായലും കടലും ചേരുന്ന സ്ഥലമായതിനാൽ ഉപ്പുവെള്ളത്തിലായതായിരിക്കാം ജീർണാവസ്ഥയിലാകാൻ കാരണം. പട്ടികജാതി വിഭാഗത്തിൽപെടുന്ന 21 കുടുംബങ്ങളാണ് ഇവിടെ താമസിക്കുന്നത്. കൂടാതെ വടക്കേ കടക്കര ഭാഗത്തുള്ളവർ പഞ്ചായത്ത് ഓഫിസുമായി ബന്ധപ്പെടുന്നതിനും മറ്റുമായി ആശ്രയിക്കുന്നതും ഈ പാലത്തെയാണ്. അടിയന്തരമായി പാലം സഞ്ചാരയോഗ്യമാക്കണമെന്നാണ്​ നാട്ടുകാരുടെ ആവശ്യം.