കാഴ്​ചക്കുലകളിൽ ഓണപ്പൊലിമയുടെ വർണവിസ്മയം തീർത്ത്​ വാഴക്കോട്

ചെറുതുരുത്തി: കോവിഡ്കാലത്തും ചെങ്ങാലിക്കോടൻ അടക്കമുള്ള കാഴ്​ച്ചക്കുലകൾ നിരത്തിയപ്പോൾ വിരിഞ്ഞത്​ ഓണപ്പൊലിമയുടെ വർണവിസ്മയം തീർക്കുന്ന കാഴ്ചകൾ. വിവിധയിനം നാടൻ കുലകൾ ഏതു കാലത്തും ഇവിടെ ലഭിക്കുന്നു എന്ന പ്രത്യേകത പണ്ടുമുതൽക്കെ തന്നെയുണ്ട്​ വാഴക്കോടിന്​.

സംസ്ഥാന പാതയുടെ ഇരുവശത്തുമായി പ്രൗഢി ഉയർത്തി കായക്കുലകൾ നിരന്നുനിൽക്കുമ്പോൾ ഗൃഹാതുരത്വമുയർത്തുന്ന ഓർമ കുടിയാണ്​ മലയാളിക്ക്​ സമ്മാനിക്കുന്നത്. കൃഷിയോടുള്ള ആഭിമുഖ്യവും സമർപ്പണവുമാണ് വാഴക്കോടി​െൻറ ഈ പ്രശസ്തിക്ക് കാരണം. കാഴ്ചക്ക്​ ലക്ഷണമേറിയതുംവലിപ്പമേറിയതുമായ സ്വർണ കളറുള്ള ചെങ്ങാലിക്കോടൻ കുലകളാണ് ഇവിടത്തെ പ്രത്യേകത. അതുകൊണ്ട് തന്നെ അയൽ ജില്ലകളിൽ നിന്ന് പോലും ആളുകൾ കുലകൾ വാങ്ങാൻ ഇവിടെ എത്തും. കിലോക്ക്​ 55 മുതൽ 60 വരെയാണ്​ ഇപ്പോൾ നിരക്ക്.

വാഴക്കോട് വളവ് സ്വദേശിയായ ഹമീദ് 20 വർഷമായി ലക്ഷണമൊത്ത കാഴ്ചക്കുലകൾ വിൽക്കുന്നുണ്ട്​ ഇവിടെ. ഓണത്തിന് മാത്രമല്ല ഏത്​ സമയത്തു വന്നാലും ഇവിടെ കാഴ്ചക്കുലകൾ റെഡിയാണ്. അധികം പേരും ഗുരുവായൂർ ശ്രീകൃഷ്ണന്​ കാണിക്ക വെക്കാനാണ് കാഴ്ചക്കുലകൾ കൊണ്ടുപോകുന്നത്. ഒട്ടനവധി കർഷകരുടെ അടുത്ത് ആദ്യം തന്നെ പൈസ അഡ്വാൻസ് കൊടുത്താണ് കാഴ്ചക്കുലകൾ വാങ്ങിക്കുന്നത്.