മാധ്യമങ്ങൾ നഷ്ടപ്പെട്ട വിശ്വാസ്യത തിരിച്ചുപിടിക്കണം -മുഖ്യമന്ത്രി

തിരുവനന്തപുരം: ഇന്‍റർനെറ്റും സമൂഹമാധ്യമങ്ങളും വാർത്തകളുടെ പ്രളയമാണ്​ സൃഷ്ടിച്ചിട്ടുള്ളതെന്നും സത്യവും അസത്യവും​​ വേർതിരിച്ചറിയാൻ വായനക്കാർ ഏ​റെ വിഷമിക്കുന്ന സ്ഥിതിയുണ്ടെന്നും മുഖ്യമന്ത്രി പിണറായി വിജയൻ. ഈ ആശയക്കുഴപ്പങ്ങൾ ഇല്ലാതാക്കാൻ പരമ്പരാഗത മാധ്യമങ്ങൾ നഷ്ടപ്പെട്ട വിശ്വാസ്യത തിരിച്ചുപിടിക്കണമെന്നും അദ്ദേഹം പറഞ്ഞു. കേരള പത്രപ്രവർത്തക യൂനിയൻ സംസ്ഥാന സമ്മേളനം ഉദ്​ഘാടനം ചെയ്യുകയായിരുന്നു അദ്ദേഹം.

മുൻകാലങ്ങളിൽ മാധ്യമങ്ങളിൽ വരുന്ന കാര്യങ്ങൾ പൂർണമായും ജനങ്ങൾ അംഗീകരിക്കുകയും വിശ്വാസ്യത നേടുകയും ചെയ്​തിരുന്നു. ഇപ്പോൾ അതിൽ കുറവുവരുന്നില്ലേയെന്ന്​ മാധ്യമപ്രവർത്തകരും മാധ്യമങ്ങളും സ്വയം വിലയിരുത്തണം. പല മാധ്യമങ്ങളുടെയും നിലപാടുകളെ സ്വാധീനിക്കുന്നത്​ മൂലധന താൽപര്യങ്ങളും അതിനെ സംരക്ഷിക്കുന്ന രാഷ്ട്രീയ താൽ​പര്യങ്ങളുമാണ്​. ഈ യാഥാർഥ്യം ജനം കൂടുതൽ തിരിച്ചറിയുന്നു. ഇതോടെ മാധ്യമങ്ങളുടെ വിശ്വാസ്യത തകരുകയാണ്​. മാധ്യമപ്രവർത്തകർക്കും മോധാവികൾക്കും രാഷ്ട്രീയരംഗത്ത്​ പ്രവർത്തിക്കുന്നവരുമായി ബന്ധമുണ്ടാകും. എന്നാൽ അത്​ രാഷ്ട്രീയ താൽപര്യം മുൻനിർത്തിയുള്ള ഗൂഢാലോചനകളിലേക്കെത്താൻ പാടില്ല.

മാധ്യമങ്ങളെ വിലക്കിയും മാധ്യമപ്രവർത്തകരെ കൊലപ്പെടുത്തിയും ഇന്ത്യക്ക്​ ജനാധിപത്യ റിപ്പബ്ലിക്കായി തുടരാനാവില്ല. മൂലധനശക്തികളുടെ ഇടപെടലുകളുടെയും അമിതാധികാര പ്രവണതകളുടെയും സമ്മർദത്തിൽ ഒതുങ്ങിപ്പോകേണ്ടവരല്ല മാധ്യമപ്രവർത്തകരെന്നും അതുക്കുംമേലെ നിൽക്കുന്നവരാകണമെന്നും മുഖ്യമന്ത്രി പറഞ്ഞു.

അർഹരായവരെ മുഴുവൻ പെൻഷൻ പദ്ധതിയിൽ ഉൾപ്പെടുത്തും

തിരുവനന്തപുരം: അർഹരായ മുഴുവൻ മാധ്യമപ്രവർത്തകരെയും ജീവനക്കാരെയും പെൻഷൻ പദ്ധതിയിൽ ഉൾപ്പെടുത്തുമെന്ന്​ മുഖ്യമന്ത്രി പിണറായി വിജയൻ. പത്രപ്രവർത്തകർക്കുള്ള ആരോഗ്യ ഇൻഷുറൻസിലെ സർക്കാർ വിഹിതം 25 ലക്ഷത്തിൽനിന്ന്​ 50 ലക്ഷമാക്കി ഉയർത്തിയിട്ടു​ണ്ടെന്നും അദ്ദേഹം പറഞ്ഞു.