തിരുവനന്തപുരം: വൈദ്യുതി ഉപഭോഗം കുതിച്ചുയരുകയും പ്രശ്നപരിഹാരത്തിന് വഴികാണാതെ കെ.എസ്.ഇ.ബി പ്രതിസന്ധി നേരിടുകയും ചെയ്യുന്ന പശ്ചാത്തലത്തിൽ വ്യാഴാഴ്ച മുഖ്യമന്ത്രി പിണറായി വിജയന്‍റെ സാന്നിധ്യത്തിൽ ഉന്നതതലയോഗം. വൈദ്യുതി മന്ത്രി കെ. കൃഷ്ണൻകുട്ടി, അഡീഷനൽ ചീഫ് സെക്രട്ടറി കെ.ആർ. ജ്യോതിലാൽ, എം.ഡിയടക്കം കെ.എസ്.ഇ.ബി ഉദ്യോഗസ്ഥർ തുടങ്ങിയവർ പങ്കെടുക്കും. പ്രതിസന്ധി മറികടക്കാനുള്ള നടപടികൾ ഊർജ വകുപ്പിന് മാത്രമായി കൈകാര്യം ചെയ്യാൻ സാധിക്കാത്ത സാഹചര്യത്തിലാണ് യോഗം. നിലവിലെ പ്രതിസന്ധി വൈദ്യുതി മന്ത്രി, മുഖ്യമന്ത്രിയെ ബോധ്യപ്പെടുത്തിയിരുന്നു. ദിവസവും 15 മുതൽ 20 കോടി രൂപ നൽകി പവർ എക്സ്ചേഞ്ചിൽനിന്നു വൈദ്യുതി വാങ്ങിയാണ് ഇപ്പോൾ ലോഡ് ഷെഡിങ് ഒഴിവാക്കുന്നത്. കെ.എസ്.ഇ.ബി സാമ്പത്തിക പ്രതിസന്ധിയിൽ ആയതിനാൽ ഈ രീതിയിൽ മുന്നോട്ടുപോകാനാവില്ല. തെരഞ്ഞെടുപ്പ് ആസന്നമായിരിക്കെ ലോഡ് ഷെഡിങ് സാധ്യത കുറവാണെന്നാണ് സൂചന. വൈദ്യുതി ഉപയോഗം കുറക്കുന്നതിനുള്ള മാർഗങ്ങളാവും പ്രധാനമായും ചർച്ചചെയ്യുക. ഇതരസംസ്ഥാനങ്ങളിൽനിന്ന് കുറഞ്ഞ നിരക്കിൽ വൈദ്യുതി വാങ്ങാനുള്ള സാധ്യതകളും പരിശോധിക്കും.
വൈദ്യുതി വാങ്ങാൻ ബോർഡ് ചെലവഴിക്കുന്ന തുക ഭാവിയിൽ ഉപഭോക്താക്കൾ സർചാർജായി നൽകേണ്ടിവരും. വേനൽമഴ കുറവായതിനാൽ അണക്കെട്ടുകളിലെ ജലനിരപ്പും ആശങ്കാജനകമാണ്. വേനൽക്കാല ആവശ്യത്തിന് കൂടുതൽ വൈദ്യുതി മൂന്നു കമ്പനികളിൽനിന്ന് യൂനിറ്റിന് 8.69 രൂപ നിരക്കിൽ വാങ്ങാൻ റെഗുലേറ്ററി കമീഷൻ നേരത്തേ അനുമതി നൽകിയിരുന്നു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.