ടിപ്പർലോറി ഇടിച്ച് വീട്ടമ്മക്ക്​ ദാരുണാന്ത്യം

വൈക്കം: ഭർത്താവുമൊത്ത്​ പ്രഭാതസവാരിക്കിറങ്ങിയ വീട്ടമ്മ ടിപ്പറിടിച്ച്​ മരിച്ചു. വൈക്കം മറവന്തുരുത്ത് കുലശേഖരമംഗലത്ത് കൊച്ചുപ്ലാം വീട്ടിൽ ത്രേസ്യാമ്മ(55)യാണ് മരിച്ചത്. ബുധനാഴ്ച രാവിലെ ഏഴ്​ മണിയോടെ ടോൾ - ചെമ്മനാകരി റോഡിൽ തേവടി പാലത്തിന്​ സമീപമാണ്​ അപകടം. ഭർത്താവുമൊത്ത്​ പ്രഭാതസവാരി കഴിഞ്ഞ്​ മടങ്ങവേ വീട്ടിൽ നിന്നും റോഡിലേക്ക് റിവേഴ്സ് എടുത്ത ലോറി ത്രേസ്യാമ്മയെ ഇടിക്കുകയായിരുന്നു. റോഡിൽ വീണ ഇവരുടെ ശരീരത്തിലൂടെ ലോറി കയറിയിറങ്ങി. ഭർത്താവ്​ പരിക്കേൽക്കാതെ രക്ഷപ്പെട്ടു. ഓടിയെത്തിയ നാട്ടുകാർ ഉടൻ തന്നെ സമീപത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മക്കൾ: അനൂപ്,​ അനീറ്റ.