പ്രഫ. ഓംചേരി എൻ.എൻ. പിള്ള അന്തരിച്ചു

പ്രശസ്ത സാഹിത്യകാരൻ പ്രഫ. ഓ​ംചേരി എൻ.എൻ. പിള്ള അന്തരിച്ചു. നൂറാം വയസിൽ ഡൽഹിയിലെ ആശുപത്രിയിൽ വെച്ചായിരുന്നു അന്ത്യം. വാർധക്യസഹജമായ അസുഖങ്ങളെ തുടർന്ന് ഏതാനും ദിവസങ്ങൾക്ക് മുൻപാണ് ആശുപത്രിയിൽ പ്രവേശിപ്പിച്ചത്.

1951ൽ ആകാശവാണി ഉദ്യോഗസ്ഥനായാണ് ഡൽഹിയിലെത്തിയത്. ഡൽഹിയെന്ന മഹാനഗരത്തിന് പ്രിയങ്കരനായ എഴുത്തുകാരനായി അദ്ദേഹം മാറി. അരനൂറ്റാണ്ടുകാലം ഡൽഹിയിലെ കല സാംസ്കാരിക രംഗത്തെ നിറസാന്നിധ്യമായിരുന്നു. അറിയപ്പെടുന്ന നാടകകൃത്തും കവിയും കൂടിയാണ് ഇദ്ദേഹം.

വൈക്കം ടിവി പുരത്തിനടുത്ത മൂത്തേടത്തുകാവെന്ന ചെറുഗ്രാമത്തിൽ പി. നാരായണപിള്ളയുടെയും പാപ്പിക്കുട്ടിയമ്മയുടെയും ഇളയമകനായി 1924 ഫെബ്രുവരി ഒന്നിനാണു ഓംചേരി എൻ.എൻ. പിള്ള ജനിച്ചത്. വൈക്കം ഇംഗ്ലിഷ് ഹൈസ്‌കൂളിലെ പഠനത്തിനു ശേഷം ആഗമാനന്ദ സ്വാമികളുടെ ആലുവയിലെ അദ്വൈതാശ്രമത്തിൽ താമസിച്ചു രണ്ടു വർഷം സംസ്‌കൃതവും വേദവും പുരാണ ഇതിഹാസങ്ങളും പഠിച്ചു. 

കോട്ടയം സി.എം.എസ് കോളജിലെ ഇന്റർമീഡിയറ്റ് പഠനത്തിനു ശേഷം തിരുവനന്തപുരം യൂണിവേഴ്‌സിറ്റി കോളജിൽ നിന്ന് ഇസ്‌ലാമിക് ചരിത്രവും സംസ്‌കാരവും എന്ന വിഷയത്തിൽ ബിരുദമെടുത്തു. അതിനു ശേഷം മിഷിഗൺ യൂനിവേഴ്സിറ്റി, പെനിസിൽവേനിയ യൂനിവേഴ്സിറ്റി എന്നിവിടങ്ങളിൽ പഠനം. കാലിഫോർണിയ യൂനിവേഴ്സിറ്റി, ഇന്ത്യൻ ഇൻസ്റ്റിറ്റ്യൂട്ട് ഓഫ് മാസ് കമ്മ്യൂണിക്കേഷൻ, ഭാരതീയ വിദ്യാഭവന്റെ സർദാർ പട്ടേൽ കോളജ് ഓഫ് കമ്മ്യൂണിക്കേഷൻ ആൻഡ് മാനേജ്മെന്റ് എന്നിവിടങ്ങളിൽ അധ്യാപകനായിരുന്നു.ബനാറസ് ഹിന്ദു യൂനിവേഴ്സിറ്റി, ഉസ്മാനിയ യൂനിവേഴ്സിറ്റി, പട്യാലയിലെ പഞ്ചാബി യൂനിവേഴ്സിറ്റി എന്നിവിടങ്ങളിലും സേവനമനുഷ്ടിച്ചു.

ഡി.എ.വി.പി, ചീഫ് സെൻസേഴ്സ് ഓഫിസ്, ഫുഡ് കോർപറേഷൻ ഓഫ് ഇന്ത്യ എന്നിവിടങ്ങളിലും ജോലി ചെയ്തു.

ആദ്യകാലത്ത് മലയാള രാജ്യം പത്രത്തിൽ ജോലി ചെയ്തിരുന്നു.ആകസ്മികം എന്ന ഓർമക്കുറിപ്പുകൾക്ക് 2020ൽ കേന്ദ്രസാഹിത്യ അക്കാദമി പുരസ്കാരം നേടിയിട്ടുണ്ട്. കേരള പ്രഭ, കേരള സാഹിത്യ പുരസ്കാരങ്ങളും നേടി. 

1972ൽ പ്രളയമെന്ന നാടകത്തിന് കേരള സാഹിത്യ അക്കാദമി പുരസ്കാരം ലഭിച്ചു. 2010ൽ സമഗ്ര സംഭാവനയ്ക്കുള്ള കേരള സാഹിത്യ അക്കാദമി പുരസ്കാരവും ലഭിച്ചു.

ഭാര്യ: പരേതയായ ലീല ഓ​ംചേരി. മക്കൾ: ശ്രീദീപ് ഓ​ംചേരി, ദീപ്തി ഓംചേരി ഭല്ല.