കളിമൺകോർട്ടിൽ പകരം വെക്കാനില്ലാത്ത പോരാളിയായിരുന്നു റാഫേൽ നദാൽ. തന്റെ 22 ഗ്രാൻഡ്സ്ലാം കിരീടങ്ങളിൽ 14 എണ്ണം റോളണ്ട് ഗാരോസിലെ തന്റെ പ്രിയപ്പെട്ട കളിമൺ കോർട്ടിൽ നിന്നായിരുന്നു. 38 ാം വയസിൽ കളമൊഴിയാൻ തീരുമാനിക്കുമ്പോൾ സ്പാനിഷ് ഇതിഹാസം വാരിക്കൂട്ടിയ സിംഗ്ൾസ് കിരീടങ്ങൾ 92 പിന്നിട്ടിരുന്നു. ടെന്നിസിലെ പവർഗെയിമിന്റെ പര്യായമായിരുന്നു സ്പാനിഷ് ഇതിഹാസം റഫ.
1986 ജൂൺ മൂന്നിന് സ്പെയിനിലെ മല്ലോർക്കയിലാണ് ജനനം. ഫുട്ബാളിലായിരുന്നു ആദ്യകാലങ്ങളിൽ കമ്പം. അമ്മാവൻ ടോണി നദാലാണ് ടെന്നീസിലേക്ക് കൈപിടിച്ചുയർത്തുന്നത്. 15 വയസ് പ്രായമുള്ളപ്പോൾ, സ്വന്തം പട്ടണമായ മല്ലോർക്കയിൽ ആദ്യ എ.ടി.പി മാച്ച് വിജയം നേടിയാണ് തേരോട്ടം തുടങ്ങിയത്.
റെക്കോർഡ് തകർത്ത കൗമാരക്കാരൻ
കൗമാരപ്രായത്തിൽ തന്നെ അന്താരാഷ്‌ട്ര രംഗത്തേക്ക് ചുവടുവെച്ച നദാൽ, 17 വയസ്സുള്ളപ്പോൾ വിംബിൾഡണിൽ സിംഗ്ൾസ് മത്സരം ജയിക്കുന്ന ഓപ്പൺ എറയിലെ ഏറ്റവും പ്രായം കുറഞ്ഞ കളിക്കാരനായി. 19-ാം വയസ്സിൽ 2005-ലെ ഫ്രഞ്ച് ഓപ്പൺ കിരീടത്തിൽ മുത്തമിട്ടതോടെ ടെന്നീസ് ലോകത്തോട് തന്റെ വരവറിയിച്ചത്. 1982-ൽ മാറ്റ്സ് വിലാൻഡറിന് ശേഷം അരങ്ങേറ്റത്തിൽ തന്നെ റോളണ്ട് ഗാരോസിനെ ജയിക്കുന്ന ആദ്യ കളിക്കാരനായി റഫ.
സ്വിസ് ടെന്നിസ് ഇതിഹാസം റോജർ ഫെഡററുമായുള്ള ഐതിഹാസിക മത്സരങ്ങളെ മാറ്റിനിർത്തി റാഫേൽ നദാലിന്റെ കരിയർ എഴുതാനാവില്ല. ടെന്നിസ് ചരിത്രത്തിന്റെ ഏറ്റവും അവിസ്മരണീയമായ മത്സരങ്ങളായിരുന്നു ഫെഡറർ-നദാൽ പോരാട്ടങ്ങൾ. അവയിൽ എടുത്തുപറയാവുന്നതായിരുന്നു 2008ലെ വിംബിൾഡൺ ഫൈനൽ. അഞ്ച് മണിക്കൂർ പിന്നിട്ട അഞ്ചുസെറ്റ് നീണ്ട പോരാട്ടത്തിനൊടുവിലാണ് ഫെഡററെ മുട്ടുകുത്തിച്ച് നദാൽ ആദ്യ വിംബിൾഡണിൽ മുത്തമിടുന്നത്.
റാഫേൽ നദാലിന്റെ കരിയർ എഴുതുമ്പോൾ ഫ്രഞ്ച് ഓപ്പണിലെ കളിമൺ പ്രണയം പറയാതെ പോകാനാകുമോ. 14 ഫ്രഞ്ച് ഓപ്പൺ കിരീടങ്ങളോടെ, ടെന്നിസ് ചരിത്രത്തിൽ ഒരു ഗ്രാൻഡ്സ്ലാം മത്സരത്തിൽ ഏറ്റവും കൂടുതൽ വിജയങ്ങൾ നേടിയ താരമെന്ന റെക്കോർഡ് നദാലിൻ്റെ പേരിലാണ്. റോളണ്ട് ഗാരോസിലെ വിജയ-നഷ്ട റെക്കോർഡ് കണ്ടാൽ തന്നെ കണ്ണുതള്ളിപോകും. 112 വിജയങ്ങൾ സ്വന്തം പേരിൽ കുറിച്ചപ്പോൾ നാല് തോൽവി മാത്രമേ നേരിട്ടുള്ളൂ.
നദാലിന്റെ കരിയർ വിജയത്തിന്റെ ഒരു കഥയാണ്. അദ്ദേഹത്തിൻ്റെ ആക്രമണാത്മക കളി ശൈലി പരിക്കിന്റെ പിടിയിലേക്ക് പലപ്പോഴായി തള്ളിയിട്ടു. തുടർച്ചയായ പരിക്കുകളോട് അദ്ദേഹം മല്ലിട്ടു. കാൽമുട്ട് ടെൻഡിനൈറ്റിസ് മുതൽ മുള്ളർ-വെയ്‌സ് സിൻഡ്രോം എന്ന ഡീജനറേറ്റീവ് ഫൂട്ട് അവസ്ഥ വരെ അദ്ദേഹത്തെ കുഴക്കി. നീണ്ട കാലത്തെ വിശ്രമത്തിനും പരിചരണത്തിനും ശേഷം ഗ്രാൻഡ്സ്ലാം കിരീടങ്ങൾ ഷോക്കേസിലെത്തിച്ച് അദ്ദേഹം വരവറിയിച്ചു. 2022-ൽ, ഗുരുതരമായ പരിക്കുകൾക്ക് ശേഷം, നദാൽ ആസ്‌ട്രേലിയൻ ഓപ്പണും 14-ാമത് ഫ്രഞ്ച് ഓപ്പണും നേടി.
2008-ലെ ബെയ്ജിംഗ് ഒളിമ്പിക്സിൽ സ്പെയിനിന് വേണ്ടി സിംഗിൾസിൽ സ്വർണ മെഡൽ നേടി. 2016ൽ റിയോ ഒളിമ്പിക്സിൽ മാർക്ക് ലോപ്പസുമായി ചേർന്ന് ഡബിൾസിൽ സ്വർണം നേടി. നദാൽ സ്പെയിനിനെ അഞ്ച് ഡേവിസ് കപ്പ് കിരീടങ്ങളിലേക്ക് നയിച്ചു. കൂടാതെ ഒരു പ്രഫഷണൽ കളിക്കാരനെന്ന നിലയിൽ അദ്ദേഹത്തിൻ്റെ അവസാന ടൂർണമെൻ്റ് 2024 ഡേവിസ് കപ്പായിരിക്കും.
റാഫേൽ നദാലിന്റെ കരിയറിനെ കുറിച്ച് അധികം അറിയപ്പെടാത്ത ഒരു വസ്തുത, ചില അന്ധവിശ്വാസങ്ങളും കോർട്ടിലെ അനുഷ്ഠാനങ്ങളുമാണ്. ഒരേ ദിശയിലേക്ക് അഭിമുഖീകരിക്കുന്ന ലേബലുകൾ ഉപയോഗിച്ച് അദ്ദേഹം വാട്ടർ ബോട്ടിലുകൾ നിരത്തുന്നത് മുതൽ വലതു കാലുകൊണ്ട് അവൻ ലൈനുകൾക്ക് മുകളിലൂടെ ചുവടുവെക്കുന്നുവെന്ന് ഉറപ്പാക്കുന്നത് വരെ, ഈ ശീലങ്ങൾ അവൻ്റെ ദിനചര്യയുടെ ഭാഗമാക്കാറുണ്ട്.
കോർട്ടിന് പുറത്ത്, നദാൽ തന്റെ സമയത്തിൻ്റെ ഭൂരിഭാഗവും ജീവകാരുണ്യ പ്രവർത്തനങ്ങൾക്കായി നീക്കിവച്ചു. 2008-ൽ അദ്ദേഹം റാഫേൽ നദാൽ ഫൗണ്ടേഷൻ സ്ഥാപിച്ചു. പിന്നാക്കം നിൽക്കുന്ന കുട്ടികൾക്ക് വിദ്യാഭ്യാസ പരിപാടികൾ നൽകുന്നതിനും കായിക വിനോദങ്ങൾ പ്രോത്സാഹിപ്പിക്കുന്നതിനും ശ്രദ്ധ കേന്ദ്രീകരിക്കുന്നു. സ്പെയിനിലെയും ഇന്ത്യയിലെയും ഫൗണ്ടേഷൻ്റെ പ്രവർത്തനങ്ങൾ കൈയടിനേടി.
നൊവാക് ദ്യോകോവിച്ചുമായുള്ള മത്സരം നദാലിന്റെ കരിയറിലെ മറ്റൊരു പ്രധാന അധ്യായമാണ്. നദാലും ദ്യോകോവിച്ചും 60 തവണ മുഖാമുഖം വന്നിട്ടുണ്ട്. ടെന്നീസ് ചരിത്രത്തിലെ ഏറ്റവും മികച്ച മത്സരങ്ങളായിരുന്നു അവയിലധികവും. നിലവിൽ 31-29 എന്ന നിലയിൽ ദ്യോകോവിച്ച് മുന്നിട്ട് നിൽക്കുന്നുണ്ടെങ്കിലും കളിമണ്ണിൽ നദാലിന് തന്നെയാണ് മേൽക്കൈ.
കരിയറിന്റെ അവസാനത്തിൽ താരത്തെ നിരന്തരം പരിക്കുകൾ വേട്ടയാടിയിരുന്നു. പാരിസ് ഒളിമ്പിക്സിന് ശേഷം നദാലിന് കോർട്ടിൽ ഇറങ്ങാനായിരുന്നില്ല.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.