യൂസർമാരും റെഗുലേറ്ററി അതോറിറ്റികളും നിരന്തരം സമ്മർദ്ദം ചെലുത്തിയിട്ടും ആപ്പിൾ ഇതുവരെ ഐഫോണിലെ ലൈറ്റ്നിങ് പോർട്ടുകൾ ഉപേക്ഷിക്കാൻ തയ്യാറായിട്ടില്ല. ആൻഡ്രോയ്ഡ് ഫോണുകളും മറ്റ് ഗാഡ്ജറ്റുകളും ടൈപ്-സി ചാർജിങ് പോർട്ടിലേക്ക് മാറിയിട്ട് കാലങ്ങളേറെയായെങ്കിലും ആപ്പിൾ വ്യത്യസ്തരായി തുടരുകയായിരുന്നു.
എന്നാൽ, 2018ൽ ഐപാഡ് ലൈനപ്പിൽ ടൈപ്-സി പോർട്ടുകൾ കൊണ്ടുവന്ന് ആപ്പിൾ ഞെട്ടിച്ചിരുന്നു. അതോടെ ഐഫോണിലും വൈകാതെ അത് സംഭവിച്ചേക്കുമെന്ന് പലരും കിനാവ് കണ്ടു. എന്നാൽ, വർഷം 2022 ആയിട്ടും ഐഫോണിൽ ലൈറ്റ്നിങ് പോർട്ടുകൾ തന്നെ തുടരുകയാണ്.
എന്നാലിപ്പോൾ പ്രമുഖ ആപ്പിൾ അനലിസ്റ്റായ മിങ്-ചി കുവോ പുതിയ ട്വിറ്റർ പോസ്റ്റുമായി രംഗത്തെത്തിയതോടെ ഐഫോൺ ഫാൻസിന് വീണ്ടും ആവേശം കയറിയിരിക്കുകയാണ്. 2023 ഐഫോണുകളിൽ ആപ്പിൾ യു.എസ്.ബി ടൈപ്-സി പോർട്ട് ഉൾപ്പെടുത്തിയേക്കുമെന്ന് അദ്ദേഹം ട്വീറ്റിൽ കുറിച്ചു.
'എന്റെ ഏറ്റവും പുതിയ സർവേ സൂചിപ്പിക്കുന്നത്, 2023 ഐഫോണുകളിൽ നിന്ന് ലൈറ്റ്നിങ് പോർട്ടുകൾ ഒഴിവാക്കി പകരം യു.എസ്.ബി-സി പോർട്ടുകൾ വരുമെന്നാണ്. ഹാർഡ്വെയർ ഡിസൈനുകളിൽ USB-C, ഐഫോണിന്റെ ഡാറ്റാ ട്രാൻസ്ഫർ വേഗതയും ചാർജിങ് സ്പീഡും വർധിപ്പിക്കും. എന്നാൽ അന്തിമ സ്പെസിഫിക്കേഷൻ വിശദാംശങ്ങൾ ഇപ്പോഴും iOS സപ്പോർട്ടിനെ ആശ്രയിച്ചിരിക്കുന്നു'. - കുവോ ട്വിറ്ററിൽ കുറിച്ചു.
അതേസമയം, പിന്നാലെ യു.എസ്.ബി-സി പോർട്ടുകളും ഉപേക്ഷിച്ച് 2025 ഓടെ പോർട്ടുകളില്ലാത്ത ഐഫോണുകളും ആപ്പിൾ അവതരിപ്പിച്ചേക്കുമെന്ന് അദ്ദേഹം സൂചന നൽകി.
അതേസമയം,യു.എസ്.ബി-സിയിലേക്ക് മാറാൻ ആപ്പിൾ നിർബന്ധിതരാകുന്നതിന് ഒരു കാരണം കൂടിയുണ്ട്. യൂറോപ്പിൽ നിന്നുള്ള സമ്മർദ്ദമാണത്. ഐഫോണുകൾ, ഐപാഡുകൾ, എയർപോഡുകൾ അടക്കമുള്ള ആപ്പിളിന്റെ ഉൽപ്പന്ന ശ്രേണിയിലുടനീളം USB-C സാങ്കേതികവിദ്യ ഉപയോഗിക്കണമെന്ന് ആവശ്യപ്പെടുന്ന നിയമനിർമ്മാണത്തിനായി യൂറോപ്യൻ യൂണിയൻ പ്രവർത്തിക്കുന്നുണ്ട്. അതിനാൽ കുവോ പുറത്തുവിട്ട സൂചനകൾ പൂർണ്ണമായും അവിശ്വസിക്കേണ്ടതില്ല.
യൂറോപ്പിൽ വിൽക്കുന്ന എല്ലാ ഇലക്ട്രോണിക് ഉപകരണങ്ങൾക്കും പൊതുവായി USB-C പോർട്ട് ഉണ്ടായിരിക്കണം എന്ന നിയമനിർമാണത്തിലേക്കാണ് ഇ.യുവിന്റെ പോക്ക്. അതിനാൽ ആപ്പിളിന് ഒന്നുകിൽ യൂറോപ്പിന് വേണ്ടി പ്രത്യേകമായി USB-C ചാർജിങ് പോർട്ടുള്ള 'iPhone' മോഡലുകൾ നിർമിക്കേണ്ടി വരും, അല്ലെങ്കിൽ ലോകമെമ്പാടുമായി പുതിയ മാറ്റം കൊണ്ടുവരണം.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.