'വിവരം ചോർത്തി​ ചാരപ്പണി ചെയ്യുന്നു'; ഗൂഗ്​ളിന്‍റെ വെളിപ്പെടുത്തലിന്​ പിന്നാലെ തുറന്നടിച്ച്​ എതിരാളി

ആപ്​ സ്​റ്റോറുമായി ബന്ധപ്പെട്ട ആപ്പിൾ പ്രഖ്യാപിച്ച സ്വകാര്യതാ നയത്തിന്​ ആഗോളതലത്തിൽ തന്നെ വലിയ സ്വീകാര്യത ലഭിച്ചിരുന്നു. ആപ്​ സ്റ്റോറുകളിലുള്ള ആപ്പുകൾ യൂസർമാരിൽ നിന്നും എന്തൊക്കെ/എത്രത്തോളം ഉപയോക്തൃ വിവരങ്ങൾ ശേഖരിക്കുന്നുണ്ടെന്നും ട്രാക്​ ചെയ്യുന്നുണ്ടെന്നും വെളിപ്പെടുത്തണമെന്നായിരുന്നു അവർ ഉത്തരവിട്ടത്​​.

ടെക്​ ഭീമനായ ഗൂഗ്​ൾ തുടക്കത്തിൽ സ്വകാര്യതാ നയങ്ങൾ പാലിക്കുന്നതിൽ അലംഭാവം കാട്ടിയെങ്കിലും രണ്ട്​ മാസങ്ങളിലധികം കാലതാമസമെടുത്തതിന്​ ശേഷം ഒടുവിൽ വഴങ്ങാൻ തീരുമാനിച്ചു. ഗൂഗ്​ൾ ആപ്പിനും ക്രോം ബ്രൗസറിനും ഓരോ അപ്​ഡേറ്റുകൾ നൽകിക്കൊണ്ടായിരുന്നു ഗൂഗ്​ൾ എന്തൊക്കെ വിവരങ്ങളാണ്​ യൂസർമാരിൽ നിന്നും ശേഖരിക്കുന്നതെന്ന്​ വെളിപ്പെടുത്തിയത്​. ഉൽപന്നം വ്യക്​തിഗതമാക്കുന്നതിന്​ വേണ്ടിയാണ്​ ഉപയോക്തൃ വിവരങ്ങൾ ശേഖരിച്ച്​ അവ യൂസർ പ്രൊഫൈലുകളിൽ ലിങ്ക്​ ചെയ്യുന്നതെന്നാണ്​ ഗൂഗ്​ൾ വിശദീകരിക്കുന്നത്​. അതിനായി, ലൊക്കേഷൻ ഹിസ്റ്ററി, യൂസർമാരുടെ ഓഡിയോ ഡാറ്റ, കോൺടാക്​ട്​ വിവരങ്ങൾ, ഉപയോഗിക്കുന്ന ഡിവൈസിന്‍റെ വിവരങ്ങൾ, ബ്രൗസിങ്​ ഹിസ്റ്ററികൾ, ആപ്പിലൂടെ നടത്തിയ പണമിടപാട്​ അടക്കമുള്ള ഫിനാൻഷ്യൽ വിവരങ്ങൾ, തുടങ്ങിയ സുപ്രധാനമായ പലതും ഗൂഗ്​ൾ ശേഖരിക്കുകയും പഠിക്കുകയും ചെയ്യുന്നുണ്ട്​.

എന്നാൽ, സെർച്ച്​ എഞ്ചിൻ ഭീമന്‍റെ ഞെട്ടിക്കുന്ന വെളിപ്പെടുത്തലിന്​ പിന്നാലെ, അവർക്കെതിരെ തുറന്നടിച്ചിരിക്കുകയാണ്​ ഗൂഗ്​ളിന്‍റെ പ്രധാന എതിരാളികളായ ഡക്​ഡക്​ഗോ. യൂസർമാരുടെ സ്വകാര്യ വിവരങ്ങളുടെ സുരക്ഷയ്​ക്ക്​ പ്രധാന്യം നൽകി നിർമിക്കപ്പെട്ട വെബ്​ ബ്രൗസറായ ഡക്​ഡക്​ഗോ അതേ വിഷയത്തിൽ പലപ്പോഴായി ഗൂഗ്​ളിനെ ആക്രമിച്ചിരുന്നു.

ഗൂഗ്​ൾ ആളുകളിൽ ചാരപ്പണി നടത്തുകയാണെന്നാണ്​ അവർ ആരോപിക്കുന്നത്​. ഗൂഗ്​ൾ ആപ്പും ക്രോം ബ്രൗസറും യൂസർമാരിൽ നിന്നും ശേഖരിക്കുന്ന വിവരങ്ങൾ വെളിപ്പെടുത്തുന്ന സ്​ക്രീൻഷോട്ടുകൾ പങ്കുവെച്ചുകൊണ്ടാണ്​ ഡക്​ഡക്​ഗോ ട്വിറ്ററിൽ പ്രതികരിച്ചത്​. 'മാസങ്ങളോളം സതംഭിപ്പിച്ചതിന്​ ശേഷം ക്രോമിലൂടെയും ഗൂഗ്​ൾ ആപ്ലിക്കേഷനിലൂടെയും എത്രത്തോളം സ്വകാര്യ ഡാറ്റ ശേഖരിക്കുന്നുണ്ടെന്ന്​ ഒടുവിൽ ഗൂഗ്​ൾ വെളിപ്പെടുത്തി. അത്​ മറച്ചുവെക്കാൻ അവർ താൽപര്യപ്പെട്ടതിൽ അതിശയിക്കാനില്ല. ഒരു മികച്ച വെബ്​ ബ്രൗസറോ സെർച്ച്​ എഞ്ചിനോ നിർമിക്കുന്നതിന്​ ഉപയോക്​താക്കളിൽ ചാരപ്പണി ചെയ്യേണ്ട ആവശ്യമില്ല. ഞങ്ങൾക്കത്​ അറിയാം. (ഞങ്ങളുടെ ആപ്ലിക്കേഷൻ രണ്ടും ഒന്നിലാണ്​). -ഡക്​ഡക്​ഗോ ട്വിറ്ററിൽ കുറിച്ചു.

ആപ്പിളിന്‍റെ പുതിയ നയങ്ങൾക്ക്​ പിന്നാലെ പെട്ടിരിക്കുന്ന പ്രമുഖൻ ഗൂഗ്​ൾ മാത്രമല്ല, ആമസോൺ, ഫേസ്​ബുക്ക്​ (വാട്​സ്​ആപ്പ്​, ഇൻസ്റ്റഗ്രാം) തുടങ്ങിയ പ്രധാനപ്പെട്ട ആപ്പുകളും വ്യാപകമായി വിവരങ്ങൾ ശേഖരിക്കുന്നുണ്ട്​. അവയെല്ലാം എത്രത്തോളം വിവരങ്ങളാണ്​ ചോർത്തുന്നത്​ എന്ന്​ ആപ്​ സ്​റ്റോറിൽ പോയി ഓരോ ആപ്പിന്‍റെയും 'ആപ്​ പ്രൈവസി' എടുത്തുനോക്കിയാൽ മനസിലാക്കാം.