മനുഷ്യ മലത്തിൽ നിന്ന്​ 'പവറുണ്ടാക്കുന്ന' ടോയ്​ലറ്റുമായി ഒരു കോളജ്​; ഡിജിറ്റൽ കറൻസി ലഭിക്കാൻ 'കാര്യം സാധിച്ച്​' വിദ്യാർഥികളും

ടോയ്​ലറ്റ്​ ഉപയോഗിക്കുന്നതിന്​ നിങ്ങൾക്ക്​ പുസ്​തകങ്ങളും പഴങ്ങളും ചൂടു കോഫിയും തരാമെന്ന്​ ആരെങ്കിലും പറഞ്ഞാൽ, ചിലപ്പോൾ 'തലക്ക്​ വെളിവില്ലേ...' എന്ന്​ തിരിച്ചു ചോദിച്ചേക്കാം. എന്നാൽ, ദക്ഷിണ കൊറിയയിൽ കാര്യങ്ങൾ വ്യത്യസ്​തമാണ്​. അവിടെയുള്ള ഒരു സർവകലാശാലയിലെ പ്രൊഫസർമാരാണ്​, വിദ്യാർഥികൾക്ക്​ മുന്നിൽ വിചിത്രമായ ഒാഫർ മുന്നോട്ടുവെച്ചിരിക്കുന്നത്​.​

കൊറിയയിലെ തെക്കുകിഴക്കൻ തീരത്തിനടുത്തുള്ള ഉൽസാൻ നാഷണൽ ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്‌നോളജിയിലെ പ്രൊഫസർമാരാണ്​ 'ഹൈടെക്​ ടോയ്​ലറ്റ്'​രൂപകൽപ്പന ചെയ്തിരിക്കുന്നത്​. ഒരാളുടെ മലത്തിൽ നിന്ന്​ മീഥെയ്ൻ വേർതിരിച്ച്​ അതൊരു ഉൗർജ്ജ സ്രോതസ്സാക്കി മാറ്റുകയാണ്​ ടോയ്‌ലറ്റ് ചെയ്യുന്നത്​. റോയിട്ടേഴ്‌സാണ്​ ഇത്​ റിപ്പോർട്ട്​ ചെയ്​തിരിക്കുന്നത്​.

ടോയ്‌ലറ്റ് ഉപയോഗിക്കുന്ന വിദ്യാർത്ഥികൾക്ക് പ്രതിദിനം 10 യൂണിറ്റ് ഡിജിറ്റൽ കറൻസിയാണ്​ പ്രതിഫലമായി നൽകുക. തേൻ എന്ന്​ അർഥമാക്കുന്ന Ggool എന്ന്​ പേരുള്ള ഡിജിറ്റൽ കറൻസി ഉപയോഗിച്ച്​ വിദ്യാർഥികൾക്ക്​ കാമ്പസിലെ മാർക്കറ്റിൽ നിന്നും പഴങ്ങളും ഭക്ഷണ സാധനങ്ങളും പഠന ഉപകരണങ്ങളു​മെല്ലാം വാങ്ങുകയും ചെയ്യാം.

"Toilet, like a Bee with a Vision," എന്നതിനെ ചുരുക്കി "BeeVi" എന്നാണ്​ ടോയ്​ലറ്റിന്​ പേര്​ നൽകിയിരിക്കുന്നത്​. സുസ്ഥിരവും പരിസ്ഥിതി സൗഹൃദവുമായ രീതിയിലുള്ള ഉപകരണമാണ്​ ബീ-വി എന്നും നിർമാതാക്കളായ പ്രൊഫസർമാർ പറയുന്നു. ടോയ്‌ലറ്റിൽ നിന്ന് ഭൂഗർഭ ടാങ്കിലേക്കും ബയോ റിയാക്ടറിലേക്കും മനുഷ്യ വിസർജ്യം എത്തിക്കാനായി വാക്വം, കുറച്ച് വെള്ളം എന്നിവയാണ്​ ഉപയോഗിക്കുന്നത്​, അതിനാൽ "സൂപ്പർ വാട്ടർ സേവിങ്​ വാക്വം ടോയ്‌ലറ്റ്" എന്നാണ്​ ബീ-വിയെ നിർമാതാക്കൾ വിളിക്കുന്നത്​. ഗ്യാസ് സ്റ്റവ്​, വാട്ടർ ബോയിലർ, വൈദ്യുതി ഉൽപാദിപ്പിക്കുന്ന ഇന്ധന സെൽ എന്നിവയുൾപ്പെടെയുള്ള കോളജ്​ കെട്ടിടത്തിലെ ഉപകരണങ്ങൾക്ക് വൈദ്യുതി സ്രോതസ്സായി വിസർജ്യത്തിൽ നിന്നുള്ള നിന്നുള്ള മീഥെയ്ൻ മാറുന്നു.

ഒരു വ്യക്​തിയുടെ ഒരു ദിവസത്തെ മലത്തിന്​ മുക്കാൽ മൈൽ ദൂരം ഒരു കാറിന്​ സഞ്ചരിക്കാനുള്ള ഉർജ്ജം നൽകാൻ സാധിക്കുമെന്ന്​ ​​ടോയ്‌ലറ്റി​െൻറ ഡിസൈനർമാരിൽ ഒരാളും നഗര, പരിസ്ഥിതി എഞ്ചിനീയറിങ്​ പ്രൊഫസറുമായ ചോ ജെയ്-വിയോൺ വയർ ഏജൻസിയോട് പറഞ്ഞു.