ദോഹ: പി.എം. ഫൗണ്ടേഷൻ ‘ഗൾഫ് മാധ്യമം’ സഹകരണത്തോടെ നടത്തുന്ന പി.എം. ഫൗണ്ടേഷൻ ടാലന്റ് സെർച്ച് പരീക്ഷ ഖത്തറിൽ എഴുതാനും അവസരം. പത്താംക്ലാസ് ഉന്നത വിജയികളായ പത്തുപേർക്ക് 1.25 ലക്ഷം രൂപയുടെ സ്കോളർഷിപ്പാണ് പി.എം. ഫൗണ്ടേഷൻ നൽകുന്നത്. പരീക്ഷയുടെ ഒന്നാംഘട്ടത്തിൽ നിശ്ചിത മാർക്ക് നേടുന്നവർക്ക് കാഷ് അവാർഡും സാക്ഷ്യപത്രവും നൽകും. ടാലന്റ് പരീക്ഷയിൽ പങ്കെടുക്കാൻ താൽപര്യമുള്ള മിടുക്കരായ വിദ്യാർഥികൾ സെപ്റ്റംബർ 15നുള്ളിൽ രജിസ്റ്റർ ചെയ്യണം.
ഖത്തറിനു പുറമെ, കേരളത്തിലെ വിവിധ ജില്ലകളിലും മറ്റു ജി.സി.സി രാജ്യങ്ങളിലും പരീക്ഷയെഴുതാൻ അവസരമുണ്ട്. അടിസ്ഥാന ശാസ്ത്രം, സാമൂഹ്യശാസ്ത്രം, പൊതുവിജ്ഞാനം, ഇന്റലിജൻസ് വിഷയങ്ങളിൽ പത്താം ക്ലാസ് നിലവാരത്തിലുള്ള ചോദ്യങ്ങളാണ് രണ്ടു മണിക്കൂർ ദൈർഘ്യമുള്ള ഒബ്ജക്റ്റിവ് പരീക്ഷയുടെ സിലബസ്.
2023ലെ പത്താംക്ലാസ് പരീക്ഷയിൽ ഇനിപറയുന്ന ഏതെങ്കിലും യോഗ്യതയുള്ളവർക്ക് ടാലന്റ് സെർച്ച് പരീക്ഷക്ക് അപേക്ഷിക്കാം: എസ്.എസ്.എൽ.സി/ടി.എച്ച്.എസ്.എൽ.സി പരീക്ഷയിൽ മുഴുവൻ വിഷയങ്ങളിലും എ പ്ലസ്, സി.ബി.എസ്.ഇ/ഐ.സി.എസ്.ഇ പരീക്ഷയിൽ ഓരോ വിഷയത്തിലും 90 ശതമാനം മാർക്ക്.
സ്പോർട്സ്, ആർട്സ്, കൾച്ചർ, ലീഡർഷിപ്, സോഷ്യൽ സർവിസ്, ഐ.ടി എന്നിവയിൽ സംസ്ഥാന-ദേശീയതല മത്സരങ്ങളിൽ വിജയം നേടുകയും എസ്.എസ്.എൽ.സി/ടി.എച്ച്.എസ്.എൽ.സി പരീക്ഷയിൽ എല്ലാ വിഷയങ്ങളിലും എ ഗ്രേഡ് അല്ലെങ്കിൽ സി.ബി.എസ്.ഇ/ഐ.സി.എസ്.ഇ പരീക്ഷയിൽ ഓരോ വിഷയത്തിനും 80 ശതമാനം മാർക്ക് സ്വന്തമാക്കിയവർ.
വിദ്യാർഥികൾക്ക് www.pmfonline.org എന്ന വെബ്സൈറ്റ് വഴി ടാലന്റ് സെർച്ച് പരീക്ഷക്ക് രജിസ്റ്റർ ചെയ്യാം. കൂടുതൽ വിവരങ്ങൾക്ക് 0484 2367279, +91 7510672798 നമ്പറുകളിൽ ബന്ധപ്പെടാം.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.