മുട്ടം: സുഹൃത്തിന്‍റെ വീട്ടിൽ അതിക്രമിച്ചുകയറി ബാലികയെ ലൈംഗികാതിക്രമത്തിന് ഇരയാക്കിയ കേസിൽ പ്രതിക്ക് നാലുവർഷം കഠിനതടവും 60,000 രൂപ പിഴയും. കരിമണ്ണൂർ നെയ്യശ്ശേരി തൈപ്പറമ്പിൽ ആദം എന്ന ഷെമീലിനെയാണ് (42) തൊടുപുഴ പോക്സോ പ്രത്യേക കോടതി ജഡ്ജ് നിക്സൻ എം. ജോസഫ് ശിക്ഷിച്ചത്. പിഴ ഒടുക്കിയില്ലെങ്കിൽ അഞ്ച് മാസംകൂടി കഠിനതടവ് അനുഭവിക്കണം.വീട്ടിൽ അതിക്രമിച്ച് കയറിയതിന് ഒരു വർഷം കൂടി ശിക്ഷയുണ്ടെങ്കിലും ശിക്ഷ ഒരേ കാലയളവിൽ അനുഭവിച്ചാൽ മതി.
എന്നാൽ, ഈ കുറ്റത്തിന് 10,000 രൂപ പിഴ ഒടുക്കണം. കേസിൽ ഇരയായ 12 കാരിക്ക് 50,000 രൂപ നഷ്ടപരിഹാരം ലഭ്യമാക്കാൻ ജില്ല ലീഗൽ സർവിസസ് അതോറിറ്റി നടപടി സ്വീകരിക്കണമെന്നും കോടതി നിർദേശിച്ചു. 2016 മാർച്ച് 14നാണ് കേസിനാസ്പദമായ സംഭവം. ഒറ്റക്കായിരുന്ന കുട്ടിയെ വീട്ടിൽ കയറി ലൈംഗിക അതിക്രമത്തിന് ഇരയാക്കിയെന്നാണ് കേസ്.
കുട്ടിയുടെ പരാതിയിൽ കരിമണ്ണൂർ പൊലീസ് കേസ് രജിസ്റ്റർ ചെയ്ത് അന്വേഷണം നടത്തി കുറ്റപത്രം സമർപ്പിക്കുകയായിരുന്നു. താനും സുഹൃത്തും തമ്മിൽ പണമിടപാട് ഉണ്ടായിരുന്നതിലെ തർക്കത്തെ തുടർന്നുള്ള വ്യാജ പരാതിയാണെന്ന പ്രതിഭാഗം വാദം കോടതി തള്ളി. ഇരുവരും തമ്മിൽ പണമിടപാട് ഉണ്ടായിരുന്നുവെന്ന് പ്രതിയുടെ രണ്ട് ബന്ധുക്കൾ മൊഴി നൽകിയെങ്കിലും മൊഴികൾ വിശ്വസിക്കാനാവില്ലെന്ന് കോടതി പറഞ്ഞു. പ്രോസിക്യൂഷനുവേണ്ടി സ്പെഷൽ പബ്ലിക് പ്രോസിക്യൂട്ടർ പി.ബി. വാഹിദ ഹാജരായി.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.