പ്രതീകാത്മക ചിത്രം
ഭോപാൽ: മധ്യപ്രദേശിലെ ഭോപാലിൽ യുവതിയെ കൊന്ന് കത്തിച്ച് കുഴിച്ചുമൂടിയ സംഭവത്തിൽ ഭർത്താവ് അറസ്റ്റിൽ. നിഷാത്പുര സ്വദേശിയും ഓട്ടോ ഡ്രൈവറുമായ നദീം ഉദ്ദിൻ (26) ആണ് ശനിയാഴ്ച പൊലീസിന്റെ പിടിയിലായത്. ഭർത്താവുമായുള്ള ബന്ധം വഷളായതോടെ സ്വന്തം മാതാപിതാക്കളോടൊപ്പം കഴിയുകയായിരുന്ന 22കാരിയായ യുവതിയെ, പരപുരുഷ ബന്ധമുണ്ടെന്ന് സംശയിച്ച് ഭർത്താവ് കൊല്ലുകയായിരുന്നുവെന്ന് പൊലീസ് പറഞ്ഞു.
മകളെ കാണാനില്ലെന്നു കാണിച്ച് യുവതിയുടെ മാതാപിതാക്കൾ മേയ് 21ന് നൽകിയ പരാതിയുടെ അടിസ്ഥാനത്തിൽ നടത്തിയ അന്വേഷണത്തിലാണ് പ്രതി പിടിയിലായത്. പൊലീസ് സംശയിക്കുന്നവരുടെ കൂട്ടത്തിൽ ഭർത്താവുമുണ്ടായിരുന്നു. കസ്റ്റഡിയിലെടുത്ത് ചോദ്യം ചെയ്തതോടെ ഇയാൾ കുറ്റം ഏറ്റുപറഞ്ഞെന്ന് പൊലീസ് വ്യക്തമാക്കി. യുവതിയെ ഫോണിൽ വിളിച്ചുവരുത്തിയ നദീം, ഇവരുടെ ഫോൺ പരിശോധിക്കുകയും പിന്നീട് കുപിതനായി കഴുത്ത് ഞെരിച്ച് കൊല്ലുകയുമായിരുന്നു.
കൊലപാതകത്തിനു ശേഷം പ്രതി മൃതദേഹം തന്റെ ഓട്ടോറിക്ഷയിൽ കയറ്റി രണ്ടു കിലോമീറ്റർ അകലെയുള്ള മാലിന്യക്കൂമ്പാരത്തിനരികിൽ എത്തിക്കുകയും, മണ്ണെണ്ണ ഒഴിച്ച് കത്തിക്കുകയും ചെയ്തു. അവശിഷ്ടങ്ങൾ ഇവിടെതന്നെ കുഴിച്ചുമൂടിയതായും ഇയാൾ പൊലീസിനോട് പറഞ്ഞു. സംഭവസ്ഥലത്തുനിന്ന് കിട്ടിയ ചില ശരീരഭാഗങ്ങൾ പരിശോധനക്ക് അയച്ചിട്ടുണ്ട്. നരഹത്യയ്ക്കുള്ള കുറ്റം ചുമത്തി കേസെടുത്തിട്ടുണ്ടെന്നും വിശദമായ അന്വേഷണം നടന്നുവരികയാണെന്നും പൊലീസ് അറിയിച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.