കുവൈത്ത് സിറ്റി: രാജ്യത്ത് വരും ദിവസങ്ങളിൽ കാലാവസ്ഥയിൽ മാറ്റങ്ങൾ പ്രകടമാകും. ഏതാനും ദിവസങ്ങളിൽ രാവിലെ ചൂടും വൈകുന്നേരങ്ങളിൽ തണുത്ത താപനിലയും ഉണ്ടാകുമെന്ന് പ്രതീക്ഷിക്കുന്നതായി കാലാവസ്ഥ വകുപ്പ് അറിയിച്ചു. മേഘാവൃതമായ ആകാശത്തിന് പുറമെ ചൂടുള്ളതും ഈർപ്പമുള്ളതുമായ കാറ്റും കാലാവസ്ഥ വിവരങ്ങൾ സൂചിപ്പിക്കുന്നതായി വകുപ്പ് ഡയറക്ടർ അബ്ദുൽ അസീസ് അൽ ഖരാവി പറഞ്ഞു.
നേരിയ തെക്കുകിഴക്കൻ പൊടിക്കാറ്റ്, മഴ, മൂടൽമഞ്ഞ് എന്നിവക്കും സാധ്യതയുണ്ട്. വ്യാഴാഴ്ച രാത്രിയോടെ രാജ്യത്ത് വിവിധ ഇടങ്ങളിൽ നേരിയ മഴ ലഭിച്ചിരുന്നു. മഴക്കൊപ്പം കനത്ത കാറ്റും വീശി. വെള്ളിയാഴ്ച രാവിലെ കാലാവസ്ഥ ഊഷ്മളവും മേഘാവൃതവുമായി. ഉയർന്ന താപനില 25നും 27 ഡിഗ്രി സെൽഷ്യസിനും ഇടയിലായിരുന്നു. വൈകുന്നേരം താപനിലയിൽ കുറവുണ്ടാകുകയും തണുപ്പുള്ള അന്തരീക്ഷത്തിലേക്ക് മാറുകയും ചെയ്തു.
ശനിയാഴ്ച രാവിലെ ചൂടും മേഘാവൃതവുമായിരിക്കും. കാറ്റിന് സാധ്യതയുണ്ട്. ഉയർന്ന താപനില 28 മുതൽ 31 ഡിഗ്രി സെൽഷ്യസ് വരെ ആയിരിക്കും. വൈകുന്നേരം 15 മുതൽ 18 ഡിഗ്രി സെൽഷ്യസിനുമിടയിലുള്ള തണുത്ത താപനിലയിലേക്ക് മാറും. ശനിയാഴ്ച മേഘാവൃതമായ ആകാശവും മൂടൽമഞ്ഞും ദൃശ്യമാകുമെന്നും അൽ ഖരാവി വ്യക്തമാക്കി.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.