കുവൈത്ത് സിറ്റി: ഗൾഫ് രാഷ്ട്രങ്ങളിലെ ഭരണകൂടങ്ങൾ ഇസ്ലാഹി സെന്ററുകൾക്ക് നല്ല സഹായവും പ്രോത്സാഹനവും നൽകുന്നതായി കേരള നദ്വതുൽ മുജാഹിദീൻ ഉപാധ്യൻ ഡോ. ഹുസൈൻ മടവൂർ. ഔഖാഫ് ഇസ്ലാമിക മന്ത്രാലയങ്ങൾ, ജാലിയാത്ത് ഓഫിസുകൾ, ദഅ്വ സെന്ററുകൾ, ചാരിറ്റി സ്ഥാപനങ്ങൾ തുടങ്ങിയവയുമായി സഹകരിച്ച് പ്രവർത്തനങ്ങൾ നല്ല നിലയിൽ നടന്നുവരുന്നതായും അദ്ദേഹം പറഞ്ഞു. ഖുർആൻ പഠനസംവിധാനങ്ങളും മലയാള ജുമുഅ ഖുതുബകളും ഈദ് ഗാഹുകളും മദ്റസകളും ഓൺലൈൻ ക്ലാസുകളും ഇതിൽ പ്രധാനമാണെന്നും ഡോ. ഹുസൈൻ മടവൂർ വ്യക്തമാക്കി.
കുവൈത്തിലെത്തിയ ഡോ. ഹുസൈൻ മടവൂർ ഹുദാ സെന്റർ പ്രവർത്തകരുമായി കൂടിക്കാഴ്ച നടത്തി. ജൂലൈ 27ന് മലപ്പുറം പുളിക്കൽ ജാമിഅ സലഫിയ്യ കാമ്പസിൽ നടക്കുന്ന ഗൾഫ് ഇസ്ലാഹി സംഗമത്തിൽ വൻ പങ്കാളിത്തമുണ്ടാകുമെന്നും അദ്ദേഹം പറഞ്ഞു. സംഗമത്തിന്റെ വിശദാംശങ്ങൾ അദ്ദേഹം ചർച്ച ചെയ്തു. എല്ലാ വിഭാഗക്കാർക്കും പ്രത്യേകം പരിപാടികളും പാരന്റിങ്, കൗൺസലിങ്, സാമ്പത്തിക അച്ചടക്കം, കുടുംബ ഭദ്രത തുടങ്ങിയ വിഷയങ്ങളും സംഗമത്തിൽ കൈകാര്യം ചെയ്യും. കുവൈത്ത് ഹുദാ സെന്റർ ജനറൽ സെക്രട്ടറി അബ്ദുറഹ്മാൻ അടക്കാനി, വൈസ് പ്രസിഡന്റ് അബ്ദുൽ ഹമീദ് കൊടുവള്ളി, ട്രഷറർ ജസീർ പുത്തൂർ പള്ളിക്കൽ എന്നിവരും എക്സിക്യൂട്ടിവ് അംഗങ്ങളും സംബന്ധിച്ചു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.