ഒമാൻ റോഡ്​ അതിർത്തികൾ തുറന്നു; വിദേശികൾക്കും യാത്ര അനുവദിക്കും

മസ്​കത്ത്​: മാസങ്ങളുടെ കാത്തിരിപ്പിനൊടുവിൽ ഒമാൻ റോഡ്​ അതിർത്തികൾ തുറന്നു. ആരോഗ്യ മന്ത്രി ​േഡാ. അഹമ്മദ്​ അൽ സഇൗദി വ്യാഴാഴ്​ച സുപ്രീം കമ്മിറ്റി വാർത്താസമ്മേളനത്തിലാണ്​ ഇക്കാര്യം അറിയിച്ചത്. ആരോഗ്യ സുരക്ഷാ മുൻ കരുതൽ നടപടികൾ പാലിച്ച്​ സ്വ​ദേശികൾക്കും ഒമാനിൽ താമസ വിസയുള്ള വിദേശികൾക്കും അയൽ രാജ്യങ്ങളിലേക്ക്​ യാത്ര ചെയ്യാവുന്നതാണെന്ന്​ ആരോഗ്യ മന്ത്രി പറഞ്ഞു.

സുരക്ഷിതമായ കോവിഡ്​ വാക്​സിൻ ഇൗ വർഷം അവസാനം തന്നെ ലഭ്യമാകുമെന്നാണ്​ പ്രതീക്ഷയെന്നും ഡോ അൽ സഇൗദി പറഞ്ഞു. ജനസംഖ്യയുടെ 40 ശതമാനം പേർക്ക് നൽകാനുള്ള വാക്​സിൻ ആദ്യഘട്ടത്തിൽ ലഭിക്കുമെന്നാണ്​ പ്രതീക്ഷ. കോവിഡിനെതിരായ പോരാട്ടത്തി​െൻറ മുൻനിരയിലുള്ളവർ, ചെക്ക്​പോയിൻറ്​ ജീവനക്കാർ, ഗുരുതര രോഗബാധിതർ, വയോധികർ തുടങ്ങിയവർക്കാണ്​ ആദ്യഘട്ട വാക്​സിനേഷനിൽ മുൻഗണന ലഭിക്കുക. ഇതുവരെ ഒരു വാക്​സിനും ഒൗദ്യോഗികമായി രജിസ്​റ്റർ ചെയ്​തിട്ടില്ല. കോവിഡ്​ വാക്​സിനുമായി ബന്ധപ്പെട്ട കാര്യങ്ങൾ മന്ത്രാലയവും ആരോഗ്യ വകുപ്പ്​ പ്രതിനിധികളും കൃത്യമായി പിൻതുടർന്നുവരുന്നുണ്ടെന്നുംഡോ. അൽ സഇൗദി പറഞ്ഞു.

രാജ്യത്ത്​ കോവിഡ്​ കേസുകളിൽ തുടർച്ചയായ കുറവ്​ രേഖപ്പെടുത്തുന്നത് ആശ്വാസകരമാണ്​. രോഗികളുടെ എണ്ണം കുറഞ്ഞതിന്​ മഹാമാരി യുടെ ഭീഷണിയൊഴിഞ്ഞുവെന്ന്​​ അർഥമില്ല. ജാഗ്രതയും പ്രതിരോധ, മുൻകരുതൽ നടപടികളും കൈവിടരുത്​. ചില രാജ്യങ്ങളിൽ നിയന്ത്രണങ്ങൾ ഇളവ്​ വരുത്തിയപ്പോൾ രോഗികളുടെ എണ്ണം കുതിച്ചുകയറി. കോവിഡ്​ എന്നത്​ ശ്വാസകോശത്തെ മാത്രം ബാധിക്കുന്ന രോഗമല്ല. ശരീരത്തിലെ മറ്റ്​ അവയവങ്ങളെ ദീർഘകാലാടിസ്​ഥാനത്തിൽ ബാധിക്കുന്ന രോഗമാണിത്​. മുൻകരുതൽ നടപടികൾ പാലിക്കുന്നതിലെ പ്രതിബദ്ധതക്ക്​ ഒപ്പം രാത്രികാല സഞ്ചാര നിരോധനമടക്കം കാര്യങ്ങളും ഒമാനിലെ രോഗ വ്യാപനം കുറയാൻ സഹായകരമായിട്ടുണ്ട്​. നേരത്തെയും ഒമാനിൽ രോഗബാധ കുറഞ്ഞിട്ടുണ്ട്​. എന്നാൽ പ്രതിരോധ നടപടികൾ പാലിക്കാത്തതിനാൽ തിരിച്ചുകയറുകയായിരുന്നു. അതിനാൽ ജാഗ്രത അനിവാര്യമാണെന്ന്​ ആരോഗ്യ മന്ത്രി പറഞ്ഞു. കോവിഡ്​ ബാധിച്ച ആരോഗ്യ പ്രവർത്തകരുടെ എണ്ണം അയ്യായിരത്തിലെത്തി. കുട്ടികളിലെ വൈറസ്​ ബാധ കുറവാണ്​. കുട്ടികൾ രോഗം പടർത്തുന്ന സാഹചര്യമുണ്ടായാൽ അത്​ ഗുരുതരമായി തീരുമെന്നും ഡോ. അൽ സഇൗദി പറഞ്ഞു. വാണിജ്യ മേഖലയുമായി ബന്ധപ്പെട്ട കാര്യങ്ങൾ വൈകാതെ അവലോകനം ചെയ്യും. നിലവിലെ ആരോഗ്യ സ്​ഥിതി വിവര കണക്കുകൾ വെച്ച്​ ചില മേഖലകളുടെ പ്രവർത്തനം പുനരാരംഭിക്കുന്ന കാര്യങ്ങളാണ്​ അവലോകനം ചെയ്യുക. ഇതോടൊപ്പം വിസകൾ അനുവദിക്കുന്ന വിഷയത്തിലും തീരുമാനമെടുക്കുമെന്ന്​ ഡോ. അൽ സഇൗദി പറഞ്ഞു.

ദേശീയ സെറോളജിക്കൽ സർവേയുടെ അവസാനഘട്ടം അടുത്തയാഴ്​ച പൂർത്തീകരിക്കുമെന്ന്​ ആരോഗ്യ മന്ത്രാലയത്തിലെ ഡീസീസസ്​ സർവൈലൻസ്​ ആൻറ്​ കൺട്രോൾ വിഭാഗം ഡയറക്​ടർ ജനറൽ ഡോ.സൈഫ്​ അൽ അബ്രി പറഞ്ഞു. മൂന്നാം ഘട്ട സർവേയിൽ ജനസംഖ്യയിൽ 15 ശതമാനം പേർ രോഗബാധിതർ ആയെന്നാണ്​ കണക്കുകൾ കാണിക്കുന്നത്​. സർവേ പൂർത്തീകരിക്കുന്നതോടെ ആവശ്യമുള്ള വാക്​സി​െൻറ തോതും വിലയിരുത്താൻ സാധിക്കുമെന്നും ഡോ.സൈഫ്​ അൽ അബ്രി പറഞ്ഞു.