സ്​കൂൾ തുറക്കൽ: വിദ്യാർഥികളുടെ ആരോഗ്യ സുരക്ഷ ഉറപ്പാക്കാൻ പുതിയ നടപടി

ദോഹ: 2020 -2021 അധ്യയന വർഷത്തിലേക്ക് സ്​കൂളുകൾ തുറക്കാനിരിക്കെ വിദ്യാർഥികളുടെ ആരോഗ്യ സുരക്ഷ ഉറപ്പാക്കാനായി പുതിയ നടപടികൾ തയാറാക്കി വിദ്യാഭ്യാസ ഉന്നത വിദ്യാഭ്യാസ മന്ത്രാലയം.ഇതി​െൻറ ഭാഗമായി കോവിഡ് –19 വ്യാപനം തടയുന്നതിന്​ മുൻകരുതൽ നടപടികൾ, പ്രതിരോധ മാർഗങ്ങൾ നടപ്പാക്കുന്നതി​െൻറ രീതി തുടങ്ങിയവ സംബന്ധിച്ച് സ്​കൂളുകളിലെ ആരോഗ്യ സുരക്ഷ കമ്മിറ്റിക്ക് പ്രത്യേക പരിശീലനം നൽകും. കോവിഡ് –19 മുൻകരുതൽ നടപടികളെ സംബന്ധിച്ചായിരിക്കും പ്രധാനമായും പരിശീലനം നൽകുക.

വരുംനാളുകളിൽ കമ്മിറ്റിയുടെ പ്രവർത്തനങ്ങൾ വളരെ നിർണായകമായിരിക്കുമെന്നും കോവിഡ് –19 മഹാമാരിയെ നിയന്ത്രിക്കുന്നതിനായി വലിയ ബോധവത്​കരണമായിരിക്കും കമ്മിറ്റി മുന്നോട്ടുവെക്കുകയെന്നും എജുക്കേഷനൽ അഫയേഴ്സ്​ അസി. അണ്ടർ സെക്രട്ടറി ഫൗസിയ അൽ ഖാതിർ പറഞ്ഞു.പൊതുജനാരോഗ്യ മന്ത്രാലയത്തി​െൻറയും ഹമദ് മെഡിക്കൽ കോർപറേഷ​െൻറയും ആഭിമുഖ്യത്തിൽ സ്​കൂളുകളിലും സർവകലാശാലകളിലും സുരക്ഷാ മുൻകരുതൽ നടപടികൾ നടപ്പാക്കുമെന്ന് ഡോ. അൽ മസ്​ലമാനി വ്യക്തമാക്കിയിരുന്നു.

ഏതെങ്കിലും വിദ്യാർഥിക്ക് രോഗലക്ഷണങ്ങൾ കണ്ടെത്തുകയാണെങ്കിൽ സ്വീകരിക്കേണ്ട നടപടികൾ സംബന്ധിച്ച് ജീവനക്കാർക്കാവശ്യമായ നിർദേശങ്ങൾ ഹമദ് മെഡിക്കൽ കോർപറേഷൻ പുറത്തിറക്കിയിട്ടുണ്ട്.സ്​കൂളുകൾ തുറക്കുന്ന സെപ്റ്റംബർ ഒന്നു മുതൽ മൂന്നു വരെ വിദ്യാർഥികൾക്കും സുരക്ഷാ മുൻകരുതലുകൾ സംബന്ധിച്ച് പരിശീലനം നൽകും. മുഴുവൻ സ്​കൂളുകളും ആവശ്യമായ സുരക്ഷാ മുൻകരുതലുകൾ നിർബന്ധമായും സ്വീകരിച്ചിരിക്കണം.

ഏതെങ്കിലും രോഗികളുമായി വിദ്യാർഥി സമ്പർക്കം പുലർത്തിയിട്ടുണ്ടെങ്കിൽ നിർബന്ധമായും ക്വാറൻറീനിൽ പോകണമെന്നും സ്​കൂളിൽ ഹാജരാകരുതെന്നും ഡോ. അൽ മസ്​ലമാനി നിർദേശിച്ചു.കോവിഡ്​ ഭീഷണി പൂർണമായും ല്ലാതായിട്ടില്ലാത്തതിനാൽ രാജ്യത്ത്​ സ്​കൂൾ തുറക്കുന്നതുമായി ബന്ധപ്പെട്ട്​ വൻ ഒരുക്കങ്ങളും മുൻകരുതലുകളുമാണ്​ സ്വീകരിക്കുന്നത്​.

2020 -2021 അധ്യായന വർഷത്തേക്ക് സ്​കൂൾ തുറക്കുന്നതുമായി ബന്ധപ്പെട്ട നടപടിക്രമങ്ങളിൽ പുതിയ ഭേദഗതി വിദ്യാഭ്യാസ, ഉന്നതവിദ്യാഭ്യാസ മന്ത്രാലയം ഈയടുത്ത്​ വരുത്തിയിരുന്നു. കോവിഡ്​ നിയന്ത്രണങ്ങൾ നീക്കുന്നതോടെ സെപ്​റ്റംബർ ഒന്നുമുതലാണ്​ രാജ്യത്തെ ഇന്ത്യൻ സ്​കൂളുകളടക്കമുള്ളവ തുറന്നുപ്രവർത്തിക്കുക. അടുത്ത അധ്യയന വർഷത്തിലെ ആദ്യ സെമസ്​റ്റർ പൂർണമായും ഓൺലൈനും ഓഫ്​ലൈനും യോജിപ്പിച്ചുള്ള പാഠ്യപദ്ധതിയായിരിക്കുമെന്നതാണ് പുതിയ ഭേദഗതി.

ഒൺലൈൻ, ക്ലാസ്​ റൂം പഠനങ്ങൾ സംയോജിപ്പിച്ചുള്ള ഈ മിശ്ര പാഠ്യപദ്ധതി സർക്കാർ, സ്വകാര്യ സ്​ഥാപനങ്ങളിലെ എല്ലാ േഗ്രഡുകളിലും പ്രീ സ്​കൂളുകളിലും ഉന്നത വിദ്യാഭ്യാസ സ്​ഥാപനങ്ങളിലും നടപ്പാക്കും.കോവിഡ് –19 വ്യാപനം തടയുന്നതിനും പ്രതിരോധ പ്രവർത്തനങ്ങൾക്കുമായുള്ള സുരക്ഷ മുൻകരുതലുകൾ സംബന്ധിച്ച് പൊതുജനാരോഗ്യ മന്ത്രാലയവുമായി കൂടിയാലോചിച്ചതി​െൻറ ഫലമായും ഖത്തറിലെ നിലവിലെ വൈറസ്​ വ്യാപനത്തോത് അടിസ്​ഥാനമാക്കിയുമാണ് പുതിയ ഭേദഗതി നടപ്പാക്കുന്നത്.

സ്​കൂൾ അടക്കുന്നതുമായി ബന്ധപ്പെട്ടും പുതിയ അധ്യയന വർഷം വൈകിയാരംഭിക്കുന്നതി​െൻറയും പ്രത്യാഘാതങ്ങൾ കുറക്കാനുമാണ് ഭേദഗതി. ഇതോടെ ആഴ്ചയിൽ രണ്ടോ മൂന്നോ ദിവസം മാത്രമായിരിക്കും ഓരോ വിദ്യാർഥിയും സ്​കൂളുകളിൽ ഹാജരാകേണ്ടി വരുക. സ്​കൂളുകളിൽ പ്രതിദിനം പരമാവധി 30 ശതമാനം ഹാജർ മാത്രമായിരിക്കും. അടിസ്​ഥാന ക്ലാസുകൾക്കും ലബോറട്ടറി പരീക്ഷണങ്ങൾക്കും പരിശോധനകൾക്കും കുട്ടികൾക്ക് പങ്കെടുക്കാനുള്ള അവസരം ഇതിലുണ്ടായിരിക്കും. ക്ലാസ്​ റൂമുകളിൽ വിദ്യാർഥികൾക്കിടയിൽ സാമൂഹിക അകലം നിർബന്ധമാക്കുന്നതിനാൽ ഒരു ക്ലാസിൽ പരമാവധി 15 വിദ്യാർഥികൾ മാത്രമേ ഹാജരുണ്ടാകാൻ പാടുള്ളൂ. ഓരോ ഡെസ്​കുകളും തമ്മിൽ 1.5 മീറ്റർ അകലത്തിലുമായിരിക്കണം.

വിദ്യാർഥികൾക്ക് ക്ലാസുകളിൽ ഹാജരാകാൻ സാധിക്കാത്ത ദിവസങ്ങളിൽ അവർ നിർബന്ധമായും ഒൺലൈൻ ക്ലാസുകളിൽ പങ്കെടുത്തിരിക്കണം. മിഡ് സെമസ്​റ്റർ പരീക്ഷയും സെമസ്​റ്റർ എൻഡ് പരീക്ഷയും സ്​കൂളുകളിൽ തന്നെയായിരിക്കും നടത്തപ്പെടുക. കുട്ടികൾക്കിടയിലെ അകലം സംബന്ധിച്ച് ആവശ്യമായ ക്രമീകരണങ്ങൾ വരുത്താൻ സ്​കൂളുകൾ ബാധ്യസ്​ഥരാണ്.

ആദ്യ മൂന്നു ദിവസങ്ങളിൽ (സെപ്റ്റംബർ ഒന്നു മുതൽ മൂന്നു വരെ) കുട്ടികൾക്ക് സുരക്ഷാ മുൻകരുതലുകൾ സംബന്ധിച്ച് ബോധവത്​കരണവും മാർഗനിർദേശങ്ങളും നൽകും. കുട്ടികൾക്കിടയിലും രക്ഷിതാക്കൾക്കിടയിലും ഇത് സംബന്ധിച്ച ലഘുലേഖകൾ വിതരണം ചെയ്യും.ആദ്യ സെമസ്​റ്ററിലെ മുഴുവൻ ഷെഡ്യൂളുകളും വിദ്യാർഥികൾക്ക് ആദ്യ ദിവസങ്ങളിൽതന്നെ നൽകണം.

വിദ്യാർഥികൾ ഒത്തുചേരുന്നതിന് ഇടയാക്കുന്ന സ്​കൂൾ കോമ്പൗണ്ടിലെ അസംബ്ലി, ഗ്രൂപ് ആക്ടിവിറ്റീസ്​, യാത്രകൾ, ക്യാമ്പുകൾ, ആഘോഷ പരിപാടികൾ എന്നിവയെല്ലാം നിർത്തലാക്കണം. സ്​കൂളിലേക്കുള്ള പ്രവേശനത്തിനും തിരിച്ചു പോകുന്നതിനുമായി വെവ്വേറെ വഴികൾ ക്രമീകരിക്കാവുന്നതാണ്.വിട്ടുമാറാത്ത രോഗങ്ങളുള്ള വിദ്യാർഥികൾക്ക് മെഡിക്കൽ സാക്ഷ്യപത്രം ഹാജരാക്കിയാൽ സ്​കൂളിൽ ഹാജരാകുന്നതിൽനിന്ന് വിടുതൽ നൽകുന്നതാണ്. ഏതെങ്കിലും വിദ്യാർഥികളുടെ രക്ഷിതാക്കൾ മാറാരോഗികളാണെങ്കിൽ ആ വിദ്യാർഥികളും സ്​കൂളിൽ ഹാജരാകേണ്ടതില്ല. മെഡിക്കൽ സർട്ടിഫിക്കറ്റ്, ദേശീയ മേൽവിലാസ സർട്ടിഫിക്കറ്റ് എന്നിവ ഇതിനായി സ്​കൂളുകളിൽ നൽകണമെന്നും മന്ത്രാലയം പറയുന്നു.