ഇന്ത്യൻ എംബസി ഭരണഘടനാ ദിനാഘോഷം

റിയാദ്​: ഇന്ത്യൻ ജനത സ്വന്തമായി ഒരു ഭരണഘടന അംഗീകരിച്ചതി​െൻറ 72-ാം വാർഷികം റിയാദിലെ ഇന്ത്യൻ എംബസി ആഘോഷിക്കുന്നു. ഇതി​െൻറ ഭാഗമായി ഭരണഘടനാ ശിൽപിയും തുല്യതയുടെ ആഗോള വക്താവുമായ ഡോ. ബി.ആർ. അംബേദ്​കറി​െൻറ ജീവിതത്തെ ആസ്​പദമാക്കി ഒരുക്കിയ പ്രദർശന പരിപാടി എംബസിയിൽ ബുധനാഴ്​ച ആരംഭിച്ചു.

ഡോ. അംബേദ്കറുടെ ജീവിതത്തെക്കുറിച്ചുള്ള ഫോട്ടോഗ്രാഫുകളുടെയും പുസ്തകങ്ങളുടെയും പ്രദർശനത്തിന്​​ പുറമേ, ഇന്ത്യൻ പൗരന്മാരുടെ മൗലികാവകാശങ്ങളും കടമകളും ഉൾപ്പെടെ ഇന്ത്യൻ ഭരണഘടനയിലെ പ്രധാന ലേഖനങ്ങളുടെ പ്രദർശനവും ഹാളിൽ ഒരുക്കിയിട്ടുണ്ട്​. പ്രദർശന പരിപാടി അംബാസഡർ ഡോ. ഔസാഫ്​ സഈദ്​ ഉദ്​ഘാടനം ചെയ്​തു. ചടങ്ങിൽ റിയാദിലെ ഇന്ത്യൻ പൗരസമൂഹത്തിൽ നിന്നുള്ള പ്രതിനിധികൾ പങ്കെടുത്തു. ഇന്ത്യൻ ഭരണഘടനയുടെ സ്ഥാപകർക്ക് അംബാസഡർ ത​െൻറ ഉദ്​ഘാടന പ്രസംഗത്തിൽ ആദരാഞ്ജലികൾ അർപ്പിച്ചു.

ഡോ. അംബേദ്കർ ദീർഘവീക്ഷണമുള്ള നേതാവായിരുന്നെന്നും അദ്ദേഹത്തി​െൻറ അധ്യക്ഷതയിൽ ഇന്ത്യൻ ഭരണഘടനാ രൂപവത്​കരണ സമിതി ഇന്ത്യയിലെ ജനങ്ങളുടെ ആദർശങ്ങളും അഭിലാഷങ്ങളും പ്രതിഫലിപ്പിക്കുന്ന ഭാവി രേഖയാണ്​ നിർമിച്ചതെന്നും അംബാസഡർ പറഞ്ഞു. ലോകത്തിലെ ഏറ്റവും വലുതും വൈവിധ്യപൂർണവുമായ ജനാധിപത്യത്തെ പിന്തുണയ്ക്കുന്ന അടിസ്ഥാന സ്തംഭമായാണ് അംബേദ്​കർ ഇന്ത്യൻ ഭരണഘടനയെ വിഭാവനം ചെയ്​ത​ത്​. എല്ലാവർക്കും നീതിയും സ്വാതന്ത്ര്യവും സമത്വവും ഉറപ്പാക്കുന്നതിനുള്ള ഭരണഘടനാ വ്യവസ്ഥകൾ പാലിക്കേണ്ടതി​െൻറ പ്രാധാന്യവും അംബാസഡർ എടുത്തുപറഞ്ഞു.

ഇന്ത്യൻ സ്വാതന്ത്ര്യത്തി​െൻറ 75ാം വാർഷികാഘോഷമായ 'ആസാദി കാ അമൃത് മഹോത്സവി'​െൻറ ഭാഗമായി നിരവധി സാംസ്കാരിക പരിപാടികൾ എംബസി സംഘടിപ്പിച്ചുവരികയാണെന്നും യാദ​ൃശ്ചികമായെങ്കിലും ഇത് ഇന്ത്യ-സൗദി നയതന്ത്ര ബന്ധത്തി​െൻറ 75ാം വാർഷികം കൂടിയായത്​ ആഘോഷത്തി​െൻറ തിളക്കമേറ്റുകയാണെന്നും എംബസി അധികൃതർ വാർത്താക്കുറിപ്പിൽ പറഞ്ഞു. ഈ ആഘോഷങ്ങളുടെ ഭാഗമായി, മറ്റ്​ രാജ്യങ്ങളുടെ എംബസികളുമായും സൗദി സംഘടനകളുമായും സഹകരിച്ച്, ഈ മാസം 25 മുതൽ ഡിസംബർ ഏഴ്​ വരെ ഒമ്പതാമത്​ അംബാസഡേഴ്‌സ് ചോയ്‌സ്-ഇൻറർനാഷനൽ ഫിലിം ഫെസ്​റ്റിവൽ സംഘടിപ്പിക്കുമെന്നും വാർത്താക്കുറിപ്പിൽ അറിയിച്ചു.