ഉംറക്കെന്ന്​ കബളിപ്പിച്ച്​ സൗദിയിൽ വീട്ടുവേലക്കാരിയാക്കിയ ഫർഹാനയെ പൊലീസ്​ മോചിപ്പിച്ചു

റിയാദ്​: ഉംറക്കെന്ന്​ കബളിപ്പിച്ച്​ സൗദി അറേബ്യയിൽ കൊണ്ടുവന്ന്​ വീട്ടുവേലക്കാരിയാക്കിയ ഇന്ത്യൻ യുവതിയെ രക്ഷപ്പെടുത്തി​. പുണ്യഭൂമിയിലെത്താനും ഉംറ നിർവഹിക്കാനും കൊതിച്ച്​ വിസ ഏജൻറി​ന്‍റെ ചതിയിൽ കുടുങ്ങി റിയാദിന്​ സമീപം ഒരു സ്വദേശി പൗര​ന്‍റെ വീട്ടിലെത്തി നരകയാതനയിലായ തെലങ്കാന ഹൈദരാബാദ്​ സ്വദേശിനി ഫർഹാന ബീഗത്തെ സൗദി പൊലീസ്​ മോചിപ്പിച്ചു.

നിരാലംബരായ സ്ത്രീകളെ ഉംറ ചെയ്യാനും പുണ്യഭൂമി സന്ദർശിക്കാനും അവസരം നൽകാം എന്ന് പറഞ്ഞു വിശ്വസിപ്പിച്ച് നാട്ടിൽ നിന്നും സൗദിയിലെത്തിച്ച്​ സ്വദേശി വീടുകളിൽ വേലക്കാരികളാക്കുന്ന പുതിയയിനം മനുഷ്യക്കടത്തിൽ കുടുങ്ങിയ ഈ മുപ്പത്തിമൂന്നുകാരിയുടെ വിഷയം മലയാളി സാമൂഹിക പ്രവർത്തകരാണ്​ ഇന്ത്യൻ എംബസിയുടെയും സൗദി പൊലീസിന്‍റെയും ശ്രദ്ധയിൽപ്പെടുത്തി രക്ഷപ്പെടുത്തലിന്​ വഴിയൊരുക്കിയത്​.

റിയാദിൽ നിന്ന്​ 300 കിലോമീറ്ററകലെ ദവാദ്​മിക്ക്​ സമീപം അറജ എന്ന ഗ്രാമത്തിലെ വീട്ടിൽ​ ദുരിതത്തിൽ കഴിഞ്ഞ യുവതിയെ മലയാളി കൂട്ടായ്​മയായ ദവാദ്​മി ഹെൽപ്​ ഡെസ്​കിന്‍റെ ശ്രമഫലമായാണ്​ ദവാദ്​മി പൊലീസ്​​ ഇ​ടപെട്ട്​ മോചിപ്പിച്ചത്​​. ഉംറ ചെയ്യണമെന്ന ജീവിതാഭിലാഷം നിറവേറ്റി കൊടുക്കാൻ ഇന്ത്യൻ കൾച്ചറൽ ഫൗണ്ടേഷൻ (ഐ.സി.എഫ്​) പ്രവർത്തകർ മുന്നോട്ട്​ വന്നിട്ടുണ്ട്​.

ദവാദ്​മിയിൽ ജോലി ചെയ്യുന്ന അയൽവാസിയായ അക്രം വഷി​യെന്ന ഏജൻറാണ്​ ഫർഹാനയെ കുടുക്കിയത്​. വെറും 15,000 രൂപ തന്നാൽ വിസയെടുത്ത്​ മക്കയിലെത്തിച്ച്​ ഉംറ ചെയ്യിപ്പിക്കാമെന്ന്​ കേട്ടപ്പോൾ അവർ ആ കെണിയിൽ വീണു പോവുകയായിരുന്നു. മൾട്ടിപ്പിൾ എൻട്രി ടൂറിസ്​റ്റ്​ വിസയിൽ ഇക്കഴിഞ്ഞ മാർച്ച്​ 28നാണ്​​ റിയാദിലെത്തിയത്​.

ഇപ്പോൾ ഉംറ ചെയ്യാൻ കഴിയില്ലെന്നും പിന്നീട്​ അതിന്​ പോകാമെന്നും അതുവരെ ഇവിടെ താമസിക്കാമെന്നും​ പറഞ്ഞ്​​ വിശ്വസിപ്പിച്ചാണ്​​ അറജയിലെ സ്വദേശി പൗരന്‍റെ വീട്ടിൽ കൊണ്ടാക്കിയത്​​. അവിടെ ഫർഹാനയെ കാത്തിരുന്നത്​ ഇരുട്ടുവെളുക്കെ ചെയ്​താലും തീരാത്ത വീട്ടുജോലിയാണ്​. നാലുമാസം കഴിഞ്ഞിട്ടും ഏജൻറ്​ അക്രം വഷി വരുകയോ ഉംറക്ക്​ കൊണ്ടു പോവുകയോ ചെയ്​തില്ല.

മാത്രമല്ല ടൂറിസ്​റ്റ്​ വിസയുടെ കാലാവധി കഴിയുകയും ചെയ്​തു. പുറത്തിറങ്ങാൻ ശ്രമിച്ചപ്പോൾ ആ വീട്ടിൽ തന്നെ പൂട്ടിയിടുകയും ചെയ്​തു. ഏജൻറിനെ വിളിച്ചപ്പോൾ മര്യാദക്ക്​ അവിടെ അടങ്ങി നിൽക്കാനും അല്ലെങ്കിൽ ഒരിക്കലും നാടുകാണില്ലെന്നുമുള്ള ഭീഷണിയാണ്​ അയാളിൽ നിന്നുണ്ടായത്​. 7,000 റിയാൽ വാങ്ങിയാണ്​ ഏജൻറ്​ അക്രം​ ഫർഹാനയെ സൗദി കുടുംബത്തിന്​ കൈമാറിയതെന്ന്​ പിന്നീട്​ വ്യക്തമായി.

ദവാദ്​മി ഹെൽപ്​ ഡെസ്​ക്​ ഇന്ത്യൻ എംബസിയുടെ അനുമതിയോടെയാണ്​ പൊലീസിനെ സമീപിച്ചത്​. പൊലീസ് ആവശ്യപ്പെട്ടതിനെ തുടർന്ന്​​ സൗദി വീട്ടുടമ സ്​റ്റേഷനിലെത്തിച്ച ഫർഹാനക്ക്​ ദവാദ്​മിയിലെ ഒരു മലയാളി കുടുംബം താൽക്കാലിക താമസ സൗകര്യമൊരുക്കിയിരിക്കുകയാണ്​. ടൂറിസ്​റ്റ്​ വിസ കാലാവധി കഴിഞ്ഞതിനാൽ പിഴ അടച്ച്​ നടപടിക്രമങ്ങൾ പൂർത്തിയാക്കി മാത്രമേ നാട്ടിലേക്ക്​ മടങ്ങാൻ കഴിയൂ.

നിലവിൽ 700 റിയാലാണ്​ പിഴ തുക. അതും നാട്ടിലേക്ക്​ വിമാന ടിക്കറ്റിനുള്ള പണവും വേണം. സാമൂഹികപ്രവർത്തകർ അത്​ കണ്ടെത്താനുള്ള ശ്രമത്തിലാണ്​. അതിനിടയിലാണ്​ ഉംറ എന്ന ഫർഹാനയുടെ മോഹം സാക്ഷാത്​കരിച്ചു കൊടുക്കാൻ ഐ.സി.എഫ്​ പ്രവർത്തകർ മുന്നോട്ട്​ വന്നിരിക്കുന്നത്​. അടുത്ത ദിവസങ്ങളിൽ തന്നെ മക്കയിൽ കൊണ്ടുപോയി ഉംറ നിർവഹിപ്പിച്ച ശേഷം തിരിച്ചെത്തിച്ച്​ നാട്ടിലേക്ക്​ കയറ്റിവിടും.