അണ​ക്കെട്ട്​, ജല കനാൽ പദ്ധതിക്ക്​ അംഗീകാരം

ദുബൈ: ജല സംരക്ഷണം ശക്തിപ്പെടുത്തുന്നതിനും ഭാവിയിലെ വെള്ളപ്പൊക്ക ഭീഷണി നേരിടുന്നതിനുള്ള ശ്രമങ്ങളെ പിന്തുണക്കുന്നതിനുമായി രാജ്യത്ത്​ കൂടുതൽ അണക്കെട്ടുകളും ജലകനാലുകളും നിർമിക്കാൻ നിർദേശം നൽകി പ്രസിഡന്‍റ്​ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാൻ. പ്രസിഡന്‍റിന്‍റെ സംരംഭങ്ങൾക്കായുള്ള എക്സിക്യൂട്ടിവ്​ കമ്മിറ്റിയാണ്​ അണക്കെട്ട്​, ജല കനാൽ പദ്ധതിക്ക്​ അംഗീകാരം നൽകിയതായി വെള്ളിയാഴ്ച ​ പ്രഖ്യാപിച്ചത്​. 13 റെസിഡൻഷ്യൽ ഏരിയകളിലായി ഒമ്പത്​ പുതിയ അണക്കെട്ടുകളാണ്​ നിർമിക്കുന്നത്​.

കൂടാതെ നിലവിലുള്ള രണ്ട്​ അണക്കെട്ടുകൾ വികസിപ്പിക്കുകയും ചെയ്യും. അതോടൊപ്പം ചില ജനവാസ മേഖലകളിലെ മഴവെള്ള നീരൊഴുക്കിന്‍റെ ആഘാതം ലഘൂകരിക്കുന്നതിന് ഏകദേശം ഒമ്പത്​ കിലോമീറ്റർ നീളത്തിൽ ഒമ്പത് ജല കനാലുകളും നിർമിക്കും. 19 മാസത്തിനകം നിർമാണം പൂർത്തീകരിക്കാനാണ്​ പദ്ധതി. പുതിയ ഡാമുകളുടെ നിർമാണം പൂർത്തിയാവുന്നതോടെ രാജ്യത്തെ ജലസംഭരണ ശേഷി 80 ലക്ഷം ഘന മീറ്ററായി ഉയരും.

അതോടൊപ്പം കാലാവസ്ഥ വ്യതിയാനത്തെ നേരിടാനുള്ള അടിസ്ഥാന സൗകര്യങ്ങൾ വികസിപ്പിക്കുകയുമാണ്​ ലക്ഷ്യം. ഷാർജയിലെ ഷിസ്​, ഖോർഫക്കാൻ, അജ്​മാനിലെ മാസ്​ഫോട്ട്​, റാസൽ ഖൈമയിലെ ഷാം, അൽ ഫഹ്​ലീം, മുഹമ്മദ്​ ബിൻ സായിദ്​ സിറ്റി, ഹെയ്​ൽ, ഖിദ്​ഫ, മുർബേഹ്​, ദാദ്​ന, അൽ സീജി, ഫുജൈറയിലെ ഖാസ്മിരി എന്നിവയാണ്​ 13 റെസിഡൻഷ്യൽ ഏരിയകൾ. ജല സംഭരണികളുടെ ശേഷി വർധിപ്പിക്കാനും ജല അടിസ്ഥാന സൗകര്യങ്ങൾ മെച്ചപ്പെടുത്താനും ലക്ഷ്യമിട്ട്​ പ്രഖ്യാപിച്ച​ യു.എ.ഇ ജല സുരക്ഷ നയം 2036നോട്​ ചേർന്നു നിൽക്കുന്നതാണ്​​ പദ്ധതിയെന്ന്​ വാം റിപ്പോർട്ട്​ ചെയ്തു.

പ്രസിഡന്‍റ്​ ശൈഖ്​ മുഹമ്മദിന്‍റെ നിർദേശം അനുസരിച്ച്​ വൈസ്​ പ്രസിഡന്‍റും ഉപ പ്രധാനമന്ത്രിയും പ്രസിഡൻഷ്യൽ കോർട്ട്​ ചെയർമാനുമായ ശൈഖ്​ മൻസൂർ ബിൻ സായിദ്​ ആൽ നഹ്​യാന്‍റെ മേൽനോട്ടത്തിലാണ്​ പദ്ധതികൾ നടപ്പാക്കുക. പ്രളയത്തിൽനിന്നുള്ള സംരക്ഷണത്തിനായി രൂപകൽപന ചെയ്ത 1,32,000 ചതുരശ്ര മീറ്റർ വിസ്തൃതിയുള്ള തടാകം കഴിഞ്ഞ മാർച്ചിൽ ഷാർജ ഭരണാധികാരി ശൈഖ്​ ഡോ. സുൽത്താൻ ബിൻ മുഹമ്മദ്​ അൽ ഖാസിമി ഉദ്​ഘാടനം ചെയ്തിരുന്നു. ഖോർഫക്കാൻ സിറ്റിയിൽ നിർമിച്ച അൽ ഹഫീയ തടാകത്തിന്​ 5,86,735 ഘനമീറ്റർ വെള്ളം സംഭരിക്കാനുള്ള ശേഷിയുണ്ട്​.