ദുബൈ വ്യോമയാന മേഖലയിൽ തൊഴിലവസരം

അബൂദബി: ആറു വർഷത്തിനുള്ളിൽ ദുബൈ വ്യോമയാന മേഖലയിൽ വൻതോതിൽ തൊഴിലവസരം സൃഷ്ടിക്കപ്പെടുമെന്ന്​ റിപോർട്ട്​. 2030 ഓടെ മേഖലയിൽ 1,85,000 പുതിയ തൊഴിലുകൾ സൃഷ്ടിക്കപ്പെടുമെന്നാണ്​ ഓക്സ്‌ഫോർഡ് എക്കണോമിക്‌സിന്‍റെ റിപോർട്ട്​. ഇതോടെ വ്യോമയാന മേഖലയിൽ ജോലി ചെയ്യുന്ന തൊഴിലാളികളുടെ എണ്ണം 8,16,000 ആയി ഉയരും. നിലവിൽ 6,31,000 പേർ വ്യോമയാന മേഖലയിൽ ചെയ്യുന്നുണ്ട്​. ഇതിൽ 1,03,000 തൊഴിലാളികളാണ് വ്യോമയാന മേഖലയുമായി നേരിട്ട് പ്രവർത്തിക്കുന്നത്. 2300 കോടി ദിർഹമാണ് കഴിഞ്ഞ വർഷം ഇവർക്ക് ശമ്പളമായി നൽകിയതെന്നും റിപ്പോർട്ടിൽ വ്യക്തമാക്കുന്നു.

ദുബൈയു​ടെ സമ്പദ്‌വ്യവസ്ഥയിൽ വ്യോമയാന മേഖലയുടെ സ്വാധീനം എന്ന വിഷയത്തിലാണ്​ ആഗോള ഗവേഷണ സ്ഥാപനമായ ഓക്സ്‌ഫോർഡ് എക്കണോമിക്‌സ് ആണ് പഠനം നടത്തിയത്. ലോകത്തിലെ ഏറ്റവും വലിയ വിമാനത്താവളമായി മാറാനിരിക്കുന്ന ആൽ മക്‌തും അന്താരാഷ്ട്ര വിമാനത്താവളത്തിലായിരിക്കും കൂടുതൽ തൊഴിലാസരങ്ങൾ സൃഷ്ടിക്കപ്പെടുക. 1,32,000 നിയമനങ്ങളാണ് ഇവിടെനിന്ന് പ്രതീക്ഷിക്കുന്നത്. കോവിഡിനുശേഷം ശക്തമായ തിരിച്ചുവരവാണ് വ്യോമയാന മേഖലയിലുണ്ടായത്. ഈ മേഖല ദുബൈയു​ടെ വളർച്ചയിൽ ശക്തമായ പങ്കും വഹിക്കുന്നു.

ദുബൈ ആസ്ഥാനമായി പ്രവർത്തിക്കുന്ന എയർലൈനുകളായ എമിറേറ്റ്സും ഫ്ലൈ ദുബൈയും കോവിഡിനുശേഷം ജീവനക്കാരുടെ എണ്ണം വർദ്ധിപ്പിച്ചിരുന്നു. എമിറേറ്റ്സ് എയർലൈൻ, ദുബൈ എയർപോർട്ടുകൾ, മറ്റ് വ്യോമയാന മേഖലാ സ്ഥാപനങ്ങൾ എന്നിവ 2030 ഓടെ 24,000 നേരിട്ടുള്ള പുതിയ തൊഴിലവസരങ്ങൾ സൃഷ്ടിക്കും. കഴിഞ്ഞ വർഷം മേഖലയിൽ 1,03,000 നിയമനങ്ങളാണ്​ നടന്നത്. 2030ഓടെ ഇത് 1,27,000 ആയി ഉയരും. ദുബൈ എയർലൈനുകൾ 2023 അവസാനത്തോടെ 81,000 നേരിട്ടുള്ള നിയമനങ്ങളാണ് നടത്തിയത്.

ഇത് 2030ഓടെ 1,04,000 ആയി വർധിച്ചേക്കും. ദുബൈ എയർപോർട്ടുകളിലും മറ്റ് വ്യോമയാന മേഖലയിലെ സ്ഥാപനങ്ങളിലും 21,000 പേർക്ക് ജോലി ലഭിച്ചു, ഇത് 2030ഓടെ 23,000 ആയി ഉയരുമെന്നും റിപ്പോർട്ടുകളിൽ വ്യക്തമാക്കുന്നു. എമിറേറ്റ്സ് 2023ൽ 1,06,000 നേരിട്ടല്ലാത്ത നിയമനങ്ങളാണ് നടത്തിയത്. ഇത് 2030ഓടെ 1,35,000 ആയി വർധിക്കും.

ദുബൈ എയർപോർട്ടുകളും മറ്റ് വ്യോമയാന മേഖലാ സ്ഥാപനങ്ങളും 2023ൽ 67,000 നിയമനങ്ങളാണ് പരോക്ഷമായി നടത്തിയത്. ഇത് 2030 ആകുമ്പോഴേക്കും 87,000 ആയി ഉയരും. ദുബൈ എയർപോർട്ടുകളും മറ്റ് വ്യോമയാന മേഖലാ സ്ഥാപനങ്ങളും പിന്തുണയ്ക്കുന്ന മൊത്തത്തിലുള ജോലികളുടെ എണ്ണം എമിറേറ്റിലുടനീളം 3,96,000 ആണ്. 2030ൽ ഇത് 5,16,000 ആയി ഉരുമെന്നാണ് പ്രതീക്ഷ.