ദുബൈ: മലബാര്‍ ഗോള്‍ഡ് ആൻഡ് ഡയമണ്ട്‌സ് റമദാനില്‍ നടത്തുന്ന സാമൂഹിക ക്ഷേമ പ്രവര്‍ത്തനങ്ങള്‍ പ്രഖ്യാപിച്ചു. അര്‍ഹരായ കുടുംബങ്ങള്‍ക്കും വ്യക്തികള്‍ക്കും ഇഫ്താര്‍ ഭക്ഷണവും ഭക്ഷ്യ കിറ്റുകളും വിതരണം ചെയ്യാൻ എംബസികള്‍, അതോറിറ്റികള്‍, എന്‍.ജി.ഒകള്‍, സന്നദ്ധ സംഘടനകള്‍ എന്നിവയുമായി ബ്രാന്‍ഡ് സഹകരിക്കും. യു.എ.ഇ, സൗദി അറേബ്യ, ബഹ്റൈന്‍, ഖത്തര്‍, ഒമാന്‍, കുവൈത്ത്, മലേഷ്യ, സിംഗപ്പൂര്‍, യു.എസ്, യു.കെ, കാനഡ, ആസ്ട്രേലിയ എന്നിവിടങ്ങളിലായി 2,50,000ലധികം ഇഫ്താര്‍ കിറ്റുകളാണ് ഈ വർഷം വിതരണം ചെയ്യുക.
യു.എ.ഇയില്‍ ദുബൈ ഗോള്‍ഡ് സൂഖ്, സജ, അജ്മാന്‍, അബൂദബി, അല്‍ ഐന്‍, ഉമ്മുല്‍ ഖുവൈന്‍, റാസല്‍ഖൈമ, ഫുജൈറ എന്നിവിടങ്ങളിലെ തൊഴിലാളികള്‍ക്കിടയിലാണ് കിറ്റ് വിതരണം. 1993ല്‍ സ്ഥാപനം ആരംഭിച്ചത് മുതല്‍ മലബാര്‍ ഗ്രൂപ്പിന്‍റെ ഏറ്റവും പ്രധാനപ്പെട്ട സാമൂഹിക ഉദ്യമങ്ങളില്‍ ഒന്നാണ് ഹംഗര്‍ ഫ്രീ വേള്‍ഡ് പദ്ധതി. ലോകമെമ്പാടുമുള്ള 85 സ്ഥലങ്ങളിലായി ദാരിദ്ര്യം ഇല്ലാതാക്കാനുള്ള ശ്രമങ്ങള്‍ നടന്നുവരുകയാണെന്നും റമദാനിൽ പദ്ധതി കൂടുതല്‍ ശക്തമായി മുന്നോട്ടുകൊണ്ടുപോകുമെന്നും മലബാര്‍ ഗ്രൂപ് ചെയര്‍മാന്‍ എം.പി. അഹമ്മദ് പറഞ്ഞു.
റമദാനിലെ സാമൂഹിക ക്ഷേമ ഉദ്യമങ്ങളെല്ലാം മുഴുവന്‍ ടീമിനെയും സഹാനുഭൂതിയോടും സമര്‍പ്പണത്തോടും മുന്നോട്ട് കൊണ്ടുപോകുന്നതാണെന്ന് മലബാര്‍ ഗ്രൂപ് വൈസ് ചെയര്‍മാന്‍ കെ.പി. അബ്ദുല്‍ സലാം പറഞ്ഞു. ജ്വല്ലറി റീട്ടെയിലര്‍ എന്നതിലുപരി ഞങ്ങളുമായി ചേര്‍ന്ന് പ്രവര്‍ത്തിക്കുന്ന എല്ലാ പങ്കാളികളുടെയും കൂട്ടമായ വളര്‍ച്ച ഉറപ്പാക്കുക എന്ന നയത്തിന്‍റെ ഭാഗമായി ചുറ്റുമുള്ള സമൂഹത്തെ മുന്‍നിര്‍ത്തികൊണ്ടാണ് വര്‍ഷങ്ങളായി സ്ഥാപനം ഏറ്റെടുത്തുവരുന്ന സാമൂഹിക ശാക്തീകരണ ഉദ്യമങ്ങള്‍ മുന്നോട്ടുപോകുന്നതെന്ന് മലബാര്‍ ഗോള്‍ഡ് ആൻഡ് ഡയമണ്ട്‌സ് ഇന്‍റര്‍നാഷനല്‍ ഓപറേഷന്‍സ് മാനേജിങ് ഡയറക്ടര്‍ ഷംലാല്‍ അഹമ്മദ് പറഞ്ഞു.
ഞങ്ങളുടെ സ്ഥാപനം എല്ലാ വര്‍ഷവും വിപുലമായ നിലയില്‍ ഇഫ്താര്‍ ഭക്ഷണ വിതരണം നടത്താറുണ്ട്. ഈ പ്രവര്‍ത്തനങ്ങള്‍ സമൂഹത്തില്‍ ശാശ്വതമായ മതിപ്പ് സൃഷ്ടിക്കുമെന്നും മറ്റ് സംഘടനകളെ സമാനമായ പ്രവര്‍ത്തനങ്ങള്‍ നടത്താന്‍ പ്രേരിപ്പിക്കുമെന്ന് ആത്മാർഥമായി പ്രതീക്ഷിക്കുന്നതായും ഷംലാല്‍ അഹമ്മദ് വ്യക്തമാക്കി.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.