ഈ ക്ലാസിലുണ്ട്​, ഒരേയൊരു ഫിദ

ദുബൈ: ഏഴുമാസം മുമ്പ്​ വരെ കലപിലകളാൽ നിറഞ്ഞ ക്ലാസ്​ മുറിയായിരുന്നു ഇത്​. ഇപ്പോൾ ഇവിടെ ഒരാൾ മാത്രം, ഫിദ ഫാത്തിമ. ഷാർജ ഇന്ത്യൻ ഇൻറർനാഷനൽ സ്​കൂളിലെ പ്ലസ്​ വൺ സയൻസ്​ ക്ലാസ്​ മുറിയിലാണ്​ ഒറ്റയാൾ പഠനത്തിനായി ഫിദ എത്തുന്നത്​. കൂടെയുള്ള 39 കുട്ടികളും ഓൺലൈൻ പഠനം തി​രഞ്ഞെടുത്തപ്പോൾ ഫിദ മാത്രം സ്​കൂളിൽ നേരി​ട്ടെത്താൻ തീരുമാനിക്കുകയായിരുന്നു. അധ്യാപകർക്കും മാനേജ്​മെൻറിനും പെരുത്ത്​ സന്തോഷവും.

മറ്റുള്ളവർക്ക്​ പ്രചോദനമാകുന്നതിനാണ്​ കൊടുങ്ങല്ല​ൂർ കോതപറമ്പ്​ പോനാക്കുഴി ഫൈസൽ റഷീദി​െൻറ മകൾ ഫിദ വേറിട്ട വഴി തിരഞ്ഞെടുത്തത്​. നല്ല പ്രോത്സാഹനമാണ്​ അധ്യാപകരിൽനിന്ന്​ ലഭിക്കുന്നത്​. രാവിലെ ഒമ്പതു​ മുതൽ ഉച്ചക്ക്​ രണ്ടു വരെ മാസ്​ക്കിട്ട്​ പഠനം. സാധാരണപോലെ തന്നെ ടൈംടേബ്​ൾ. ഓരോ മണിക്കൂർ കഴിയു​േമ്പാഴും അധ്യാപകർ ക്ലാസെടുക്കാനെത്തും. ചില ദിവസങ്ങളിൽ ബാപ്പയോടൊപ്പമോ അല്ലെങ്കിൽ നടന്നോ ആണ്​ സ്​കൂളിലേക്ക്​ പോകുന്നത്​. ചെറുപ്രായത്തിൽ തന്നെ സോഷ്യൽ വർക്കർ കൂടിയാണ്​ ഫിദ. സ്​കൂളിലെ കുട്ടിക്ക്​ ഫീസ്​ അടക്കാൻ കഴിയാതെ വന്നപ്പോൾ വാട്​സ്​ആപ് ഗ്രൂപ്പുണ്ടാക്കി ധനശേഖരണം നടത്തിയിരുന്നു. അർബുദ രോഗികൾക്ക്​ മുടി നൽകണമെന്നതാണ്​ മറ്റൊരു ആഗ്രഹം.

മറ്റുള്ള രക്ഷിതാക്കൾക്കും വിദ്യാർഥികൾക്കും പ്രചോദനമാവ​ട്ടെ എന്നുകരുതിയാണ്​ മകളെ സ്​കൂളിലേക്ക്​ അയക്കുന്നതെന്നും ഭയപ്പെടേണ്ട രോഗമല്ല കോവിഡെന്നും പിതാവ്​ ഫൈസൽ പറഞ്ഞു. നിരവധി​ അധ്യാപകരും ജീവനക്കാരുമാണ്​ സ്​കൂളിനെ ആശ്രയിച്ച്​ ജീവിച്ചുപോകുന്നത്​. വിദ്യാർഥികൾ എത്തിയില്ലെങ്കിൽ ഇവരുടെ ജീവിതവും അവതാളത്തിലാകുമെന്നും​ ഫൈസൽ പറയുന്നു.

ഇളയ മകൾ ​ഏഴാം ക്ലാസുകാരി ഫൈറൂസ്​ ഫാത്തിമയെയും സ്​കൂളിൽ വിടാൻ ഒരുങ്ങുകയാണ്​ ഫൈസൽ. രണ്ടാം തീയതി ക്ലാസ്​ തുടങ്ങു​േമ്പാൾ ഫൈറൂസിനെയും അയക്കും. ഇതേ സ്​കൂളിലെ കെ.ജി അധ്യാപികയാണ്​ മാതാവ്​ ഫെർമിസ്​ ഫൈസൽ. ഷാർജ മുവൈലയിലാണ്​ താമസം.