സ്​മാർട്ട്​ ഫോണുകൾക്കൊപ്പം സ്​മാർട്ട്​ കാറുകളും നിർമിച്ച്​ വാവെ; ഹൈബ്രിഡ്​ ക്രോസോവർ ഷാങ്​ഹായിയിൽ അവതരിപ്പിച്ചു

ചൈനീസ് സ്മാർട്ട്‌ഫോൺ നിർമാതാക്കളായ വാവെ വാഹന നിർമാണ രംഗത്തും ചുവടുവയ്​ക്കുന്നു​. ചൈനീസ് ഇലക്ട്രിക് കാർ നിർമാതാക്കളായ സെറസിനൊപ്പം സഹകരിച്ചാണ്​ വാവെ വാഹന വ്യവസായത്തിലേക്ക് കടക്കുന്നത്​. വാവെ ആദ്യമായി നിർമിക്കുന്നത്​ ഹൈബ്രിഡ് ക്രോസോവറായ എസ്എഫ് 5 മോഡലാണ്​. വാഹനം ഷാങ്​ഹായ്​ മോ​ട്ടോർഷോയിൽ അവതരിപ്പിച്ചു. ചൈനയിലെ വാവെ സ്റ്റോറുകൾ വഴി വാഹനം വിറ്റഴിക്കാനാണ്​ തീരുമാനം. ആധുനികവും യൂറോപ്യനുമായ രൂപഭാവങ്ങളോടെയാണ്​ എസ്എഫ് 5 നിർമിച്ചിരിക്കുന്നത്​.

വാവേയും ഫെറാരിയും

ആഢംബര വാഹനങ്ങളുടെ അവസാന വാക്കായ ഫെറാരിയുടെ പുറത്തിറങ്ങാനിരിക്കുന്ന ക്രോസോവർ എസ്​.യു.വിയായ പുരോസാംഗുവുമായി വാവെ വാഹനത്തിന്​ സാമ്യമുണ്ട്​. മുന്നിലെ സ്വൈപ്ബാക്ക് ഹെഡ്​ലൈറ്റുകൾ, മെഷ് ഗ്രിൽ എന്നിവ ബംബറിലേക്ക് ഭംഗിയായി സംയോജിപ്പിച്ചിരിക്കുന്നു. വ്യതിരിക്തമായ എൽഇഡി ഡിആർഎല്ലുകൾ, കൂർത്ത ബോഡിലൈനുകൾ, ചേർന്നിരിക്കുന്ന ഡോർ ഹാൻഡിലുകൾ, ചരിഞ്ഞിറങ്ങുന്ന മേൽക്കൂര എന്നിവ പ്രത്യേകതകളാണ്​. പിന്നിൽ വീതിയുള്ള ലൈറ്റ് സ്ട്രിപ്പ് ഉപയോഗിച്ച് ബന്ധിപ്പിച്ചിരിക്കുന്ന സ്ലിം എൽഇഡി ടെയിൽ‌ലൈറ്റുകൾ വാഹനത്തിന്​ സ്പോർടി ലുക്ക്​ നൽകുന്നുണ്ട്​. 4,700 എംഎം നീളവും 1,930 മില്ലീമീറ്റർ വീതിയും 1,625 മില്ലീമീറ്റർ ഉയരവും ഉള്ള വാഹനമാണിത്​. 2,875 മില്ലീമീറ്റർ ആണ്​ വീൽബേസ്.

അകം ടെസ്​ലക്ക്​ സമാനം

ഉള്ളിൽ ടെസ്‌ല കാറുകളിലേതുപോലെ, പോർട്രെയിറ്റ്-ഓറിയന്‍റഡ് ടച്ച്‌സ്‌ക്രീൻ ഇൻഫോടെയിൻമെന്‍റ്​ സെന്‍ററാണ്​ വാഹനത്തെ നിയന്ത്രിക്കുന്നത്​. പ്രീമിയം അപ്പീലിനായി വുഡ്​ ഫിനിഷുകൾ, മെറ്റാലിക് ആക്സന്‍റുകൾ, ലെതർ അപ്ഹോൾസറി എന്നിവയും എസ്എഫ് 5 ന്റെ ഇന്റീരിയറുകളിൽ കാണാം. വിവിധ സവിശേഷതകളുടെ കാര്യത്തിലും എസ്എഫ് 5 ഒട്ടും പിന്നിലല്ല. ഡിജിറ്റൽ ഇൻസ്ട്രുമെന്റ് ക്ലസ്റ്റർ, പനോരമിക് സൺറൂഫ്, ആംബിയന്റ് ലൈറ്റിംഗ്, ചൂടായതും വായുസഞ്ചാരമുള്ളതുമായ സീറ്റുകൾ, സീറ്റ് മസാജർ, 11 സ്പീക്കർ ഓഡിയോ സിസ്റ്റം എന്നിവ ലഭിക്കും. അഡാപ്റ്റീവ് ക്രൂസ് കൺട്രോൾ, ലോ-സ്പീഡ് ട്രാഫിക് അസിസ്റ്റ്, കൊളിഷൻ വാണിങ്​ സിസ്റ്റം, ഓട്ടോമാറ്റിക് എമർജൻസി ബ്രേക്കിങ്​, ലെയ്ൻ കീപ്പിങ്​ അസിസ്റ്റ് തുടങ്ങിയ ആധുനിക സംവിധാനങ്ങളും എസ്എഫ് 5ലുണ്ട്​.

എഞ്ചിൻ

ഹൈബ്രിഡ്​ പവർ ട്രെയിനാണ്​ വാവെ സെറസ് എസ്എഫ് 5ലുള്ളത്​.​ 1.5 ലിറ്റർ, നാല് സിലിണ്ടർ പെട്രോൾ എഞ്ചിനാണ് വാഹനത്തിന്​. ഇതോടൊപ്പം രണ്ട് ഇലക്ട്രിക് മോട്ടോറുകളും വാഹനത്തിലുണ്ട്​. മൊത്തം കരുത്ത്​ 543 ബിഎച്ച്പിയും 820 എൻഎ​ം ടോർക്കുമാണ്​. 4.68 സെക്കൻഡിനുള്ളിൽ മൂന്നക്ക വേഗതയിലെത്താൻ വാഹനത്തിനാകും. 180 കിലോമീറ്റർവരെ പൂർണ്ണമായും വൈദ്യുതിയിൽ ഓടാനും വാഹനത്തിന്​ കഴിയും.