റഫാൽ: ഇന്ത്യൻ വ്യവസായ പങ്കാളിയെ തെരഞ്ഞെടുക്കാൻ കമ്പനിക്ക്​​ സ്വാതന്ത്ര്യമുണ്ട്​ -ദസോൾട്ട്​

ന്യൂഡൽഹി: റഫാൽ യുദ്ധവിമാന കരാർ പ്രകാരം ഇന്ത്യൻ പങ്കാളിയെ തെരഞ്ഞെടുക്കാനുള്ള സ്വാതന്ത്ര്യം ദസോൾട്ട്​ ഏവിയേഷനു​ണ്ടെന്നും കമ്പനിയാണ്​ ഇന്ത്യൻ വ്യവസായ പങ്കാളിയെ തീരുമാനിച്ചതെന്നും ദസോൾട്ട്​ ഏവിയേഷൻ​ വ്യക്തമാക്കി.

ഇന്ത്യൻ സർക്കാറാണ്​ റിലയൻസിനെ നിദ്ദേശിച്ചതെന്നും തങ്ങൾക്ക്​ മറ്റ്​ വഴികളില്ലായിരുന്നുവെന്നും മുൻ ഫ്രഞ്ച്​ പ്രസിഡൻറ്​ ഫ്രാങ്​സ്വ ഒാലൻഡ്​ കഴിഞ്ഞ ദിവസം വെളിപ്പെടുത്തിയിരുന്നു. ഇതി​​​​​​െൻറ പശ്ചാത്തലത്തിലാണ്​ കൂടുതൽ വ്യക്തതയുമായി ഫ്രഞ്ച്​ കമ്പനി രംഗത്തെത്തിയത്​​. റിലയൻസ്​ ഗ്രൂപ്പുമായുള്ള പങ്കാളിത്തം ദസോൾട്ട്​ ഏവിയേഷൻ സ്വയം തീരുമാനിച്ചതായിരുന്നെന്ന്​ കമ്പനി തന്നെ പ്രസ്​താവനയിലൂടെ വ്യക്തമാക്കി.

ഇടപാടിലെ ഇന്ത്യൻ പങ്കാളിയെ തീരുമാനിക്കുന്നതിൽ സർക്കാർ ഇടപെട്ടിട്ടി​​ല്ലെന്ന്​ ഫ്രഞ്ച്​ സർക്കാർ വ്യക്തമാക്കിയിരുന്നു. ഫ്രഞ്ച്​ കമ്പനിയുടെ ഇന്ത്യൻ വ്യവസായ പങ്കാളി ആരാണെന്നോ ആരാകണമെന്നോ ഉള്ള കാര്യത്തിൽ കമ്പനിയുടെ തെരഞ്ഞെടുപ്പിൽ സർക്കാർ ഇടപെട്ടിട്ടി​ല്ല. വിമാനങ്ങൾ കൃത്യമായി എത്തിച്ചു നൽകുന്നുണ്ടെന്നും അവയുടെ ഗുണമേൻമയും ഉറപ്പു വരുത്തുക മാത്രമാണ്​ ഫ്രഞ്ച്​ സർക്കാർ ചെയ്​തതെന്നും ഫ്രാൻസ്​ വെള്ളിയാഴ്​ച രാത്രിയിൽ പ്രസ്​താവനയിലൂടെ അറിയിച്ചിരുന്നു.