ന്യൂഡൽഹി: സർക്കാർ ജോലികളിലെ നിയമനത്തിനുള്ള ചട്ടങ്ങൾ നിർദേശമില്ലാതെ പാതിവഴിയിൽ മാറ്റാനാകില്ലെന്ന് സുപ്രീംകോടതി. റിക്രൂട്ട്‌മെന്‍റ് പ്രക്രിയ ആരംഭിക്കുന്നതിനുമുമ്പ് നിശ്ചയിച്ചിട്ടുള്ള നിയമങ്ങളിൽ പിന്നീട് ‘കലർപ്പു’ വരുത്താൻ കഴിയില്ലെന്ന് ചീഫ് ജസ്റ്റിസ് ഡി.വൈ ചന്ദ്രചൂഡ് അധ്യക്ഷനായ അഞ്ചംഗ ബെഞ്ചാണ് വ്യക്തമാക്കിയത്.
സെലക്ഷൻ ചട്ടങ്ങൾ ഏകപക്ഷീയമായിരിക്കരുതെന്നും ഭരണഘടനയുടെ ആർട്ടിക്കിൾ 14 അനുസരിച്ചുള്ളതായിരിക്കണമെന്നും ജസ്റ്റിസുമാരായ ഋഷികേശ് റോയ്, പി.എസ് നരസിംഹ, പങ്കജ് മിത്തൽ, മനോജ് മിശ്ര എന്നിവരടങ്ങിയ ബെഞ്ച് പറഞ്ഞു. സുതാര്യതയും വിവേചനമില്ലായ്മയും പൊതു റിക്രൂട്ട്‌മെന്‍റ് പ്രക്രിയയുടെ മുഖമുദ്രയായിരിക്കണമെന്നും നിയമങ്ങൾ പാതിവഴിയിൽ മാറ്റം വരുത്തിയതിൽ ഉദ്യോഗാർഥികൾ ആശ്ചര്യപ്പെടേണ്ടതില്ലെന്നും സുപ്രീം കോടതി ഏകകണ്ഠമായി അഭിപ്രായപ്പെട്ടു.
നിലവിലുള്ള നിയമങ്ങൾക്ക് വിധേയമായി റിക്രൂട്ട് ചെയ്യുന്ന ബോഡികൾ റിക്രൂട്ട്‌മെന്‍റ് പ്രക്രിയയെ യുക്തിസഹമായ അവസാനത്തിലേക്ക് കൊണ്ടുവരുന്നതിന് ഉചിതമായ നടപടിക്രമം രൂപപ്പെടുത്തിയേക്കാം. അങ്ങനെ സ്വീകരിച്ച നടപടിക്രമം സുതാര്യവും വിവേചനരഹിതവും ഏകപക്ഷീയമല്ലാത്തതും ആയിരിക്കണം -വിധി പ്രസ്താവിച്ചുകൊണ്ട് ജസ്റ്റിസ് മിശ്ര പറഞ്ഞു.
നിലവിലുള്ള നിയമങ്ങളിലോ പരസ്യത്തിലോ റിക്രൂട്ട്‌മെന്‍റ് പ്രക്രിയയുടെ വിവിധ ഘട്ടങ്ങൾക്കുള്ള മാനദണ്ഡങ്ങൾ നിശ്ചയിക്കുകയും അത്തരത്തിലുള്ള ഏതെങ്കിലും മാനദണ്ഡങ്ങൾ സജ്ജീകരിക്കുകയും ചെയ്താൽ റിക്രൂട്ട്‌മെന്‍റ് പ്രക്രിയ ആരംഭിക്കുന്നതിന് മുമ്പ് അത് വ്യവസ്ഥ ചെയ്യണമെന്നും കോടതി നിർദേശിച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.