'അവർ ഉറങ്ങുകയായിരുന്നു'; അമ്മയുടെയും സഹോദരന്‍റെയും മൃതദേഹത്തിനൊപ്പം മധ്യവയസ്​ക കഴിഞ്ഞത്​ രണ്ടുദിവസത്തോളം

ബംഗളൂരു: അമ്മയുടെയും സഹോദരന്‍റെയും മൃതദേഹത്തിനൊപ്പം മധ്യവയസ്​ക കഴിഞ്ഞത്​ രണ്ടുദിവസത്തോളം. ബംഗളൂരുവിലെ രാ​ജരാജേശ്വരി നഗറിലാണ്​ സംഭവം.

കുടുംബത്തിന്‍റെ വീടിനോട്​ ചേർന്ന് വാടകക്ക്​ താമസിച്ചിരുന്ന​ പ്രവീൺ വീട്ടുടമസ്​ഥന്‍റെ വീട്ടിൽനിന്ന്​ ദുർഗന്ധം പുറത്തുവരുന്നുവെന്ന്​ പൊലീസിനെ അറിയിക്കുകയായിരുന്നു. തുടർന്ന്​ നടത്തിയ പരിശോധനയിലാണ്​ ഞെട്ടിക്കുന്ന സംഭവം പുറത്തറിയുന്നത്​.

വാതിൽ അകത്തുനിന്ന്​ പൂട്ടിയ നിലയിലായിരുന്നു. വാതിൽ പൊളിച്ച്​ അകത്തുകടന്നപ്പോൾ അഴുകിയ നിലയിൽ രണ്ടു മൃതദേഹങ്ങൾ കണ്ടെത്തുകയായിരുന്നു. മധ്യവയസ്​കന്‍റെ മൃതദേഹം ലിവിങ്​ റൂമിൽ ജനലിനോട്​ ചേർന്നും വയോധികയുടെ മൃതദേഹം കിടപ്പുമുറിയിലുമാണ്​ കണ്ടെത്തിയത്​.

വീട്ടിനുള്ളിൽ 47കാരിയായ ശ്രീലക്ഷ്​മിയേയും പൊലീസ്​ കണ്ടെത്തി. അമ്മയുടെയും സഹോദരന്‍റെയും മൃതദേഹത്തിനൊപ്പമായിരുന്നു ഇവരുടെ താമസം. ശ്രീലക്ഷ്​മിയുടെ​ മാനസിക നില തകരാറിലായിരുന്നതായി പൊലീസ്​ പറഞ്ഞു. സഹോദരനും മാതാവും മരിച്ച വിവരം ശ്രീലക്ഷിക്ക്​ മനസിലാക്കാൻ സാധിച്ചിരുന്നില്ലെന്ന്​ പൊലീസ്​ പറഞ്ഞു.

രണ്ടു മൃതദേഹങ്ങളും വിക്​ടോറിയ ആശുപത്രിയിൽ പോസ്റ്റ്​മോർട്ടത്തിന്​ അയച്ചു. സ്വകാര്യ സ്​ഥാപനത്തിലെ ജീവനക്കാരനായ ഹരീഷ്​ ആണ്​ മരിച്ച സഹോദരൻ​. ഏപ്രിൽ 22ന്​ ഹരീഷിന്​ കോവിഡ്​ സ്​ഥിരീകരിച്ചിരുന്നു. തുടർന്ന്​ വീട്ടുനിരീക്ഷണത്തിൽ കഴിയുകയായിരുന്നു അദ്ദേഹം.

മാതാവിന്​ അസുഖം ബാധിച്ചിരുന്നുവെന്ന വിവരം ശ്രീലക്ഷ്​മിക്ക്​ അറിയാമായിരുന്നു. സഹോദരൻ ആംബുലൻസ്​ വിളിച്ചിരുന്നെങ്കിലും എത്തിയില്ലെന്നും ശ്രീലക്ഷ്​മി പൊലീസിനോട്​ പറഞ്ഞു.

രണ്ടു ദിവസമായി ശ്രീലക്ഷ്​മി ഭക്ഷണം കഴിച്ചിരുന്നില്ല. അമ്മയും സഹോദരനും ഉറങ്ങുകയായിരുന്നുവെന്നാണ്​ ശ്രീലക്ഷ്​മി കരുതിയിരുന്നത്​. അതിനാൽ തന്നെ ഇരുവരും ഭക്ഷണം പാകം ചെയ്യാൻ എഴുന്നേൽക്കുമെന്ന്​ ശ്രീലക്ഷ്​മി കരുതിയിരുന്നതായും പൊലീസ്​ പറഞ്ഞു.

പൊലീസ്​ നടത്തിയ പരിശോധനയിൽ ഹരീഷ്​ ആംബുലൻസിനായി നിരവധി തവണ 108ലേക്ക്​ വിളിച്ചതായി പൊലീസ്​ കണ്ടെത്തി. കോവിഡ്​ മരണമെന്നാണ്​ പൊലീസിന്‍റെ പ്രാഥമിക നിഗമനം.