കോട്ടയം: കാമുകന്‍റെ മരണം കണ്ട് ഭയന്ന് രാത്രിമുഴുവൻ കുറ്റിക്കാട്ടിൽ കഴിഞ്ഞ പെൺകുട്ടിയെ കണ്ടെത്തി. തിങ്കളാഴ്ചയാണ് അംബികാ മാർക്കറ്റിന് സമീപം മാമ്പ്രയിൽ ഹേമാലയത്തിൽ പരേതനായ ഗിരീഷിന്‍റെ മകൻ ഗോപുവിനെ (22) ചീപ്പുങ്കൽ പാലത്തിന് പടിഞ്ഞാറു ഭാഗത്ത് ഇറിഗേഷൻ വകുപ്പിന്‍റെ ചിറയ്ക്ക് സമീപത്തെ മരത്തിൽ തൂങ്ങിമരിച്ച നിലയിൽ കണ്ടെത്തിയത്.
ചൊവ്വാഴ്ച രാവിലെയാണ് ഗോപുവിന്‍റെ കൂടെയുണ്ടായിരുന്ന പെൺകുട്ടിയെ വെള്ളക്കെട്ടിലെ കുറ്റിക്കാടിന് സമീപം ബോധരഹിതയായ നിലയിൽ കണ്ടെത്തിയത്. തനിക്ക് താൽപര്യമില്ലാതെ ബംഗളൂരുവിൽ നഴ്സിങ് കോഴ്സ് പഠിക്കാൻ പോയതിനെ തുടർന്ന് ഗോപു പെൺകുട്ടിയുമായി വഴക്കിട്ടിരുന്നതായാണ് വിവരം.
തിങ്കളാഴ്ച ഗോപുവും പെൺകുട്ടിയും ചീപ്പുങ്കൽ മാലിക്കായലിന് സമീപം ടൂറിസംവകുപ്പിന്‍റെ തകർന്ന കെട്ടിടത്തിന് സമീപത്തേക്ക് പോയതിന് ദൃക്സാക്ഷികളുണ്ടായിരുന്നു. ഏറെ സമയം കഴിഞ്ഞിട്ടും ഇരുവരെയും കാണാത്തതിനെ തുടർന്ന് നടത്തിയ തെരച്ചിലിനൊടുവിലാണ് ഗോപുവിനെ മരിച്ച നിലയിൽ കണ്ടെത്തിയത്. എന്നാൽ പെൺകുട്ടിയെ കാണാതായി. മൃതദേഹം കിടന്ന സ്ഥലത്ത് നിന്ന് ലേഡീസ് ബാഗും ആത്മഹത്യ കുറിപ്പും ലഭിച്ചിരുന്നു.
കാമുകിയുമായി വഴക്കിട്ടെന്നും ഇനി ജീവിച്ചിരിക്കില്ലെന്നുമായിരുന്നു ആത്മഹത്യാക്കുറിപ്പിൽ പറഞ്ഞത്. കോട്ടയം വെസ്റ്റ് സി.ഐ അനൂപ് കൃഷ്ണ, എസ്.ഐ ശ്രീജിത്ത് എന്നിവരുടെ നേതൃത്വത്തിൽ തിങ്കളാഴ്ച സമീപപ്രദേശത്ത് നടത്തിയ തെരച്ചിലിൽ പെൺകുട്ടിയെ കണ്ടെത്താനായിരുന്നില്ല.
ചൊവ്വാഴ്ച രാവിലെ വീണ്ടും തിരച്ചിൽ തുടങ്ങാൻ തയാറെടുക്കുമ്പോഴാണ് പോത്തിനെ കെട്ടാൻ പോയ സമീപവാസി പെൺകുട്ടിയെ കണ്ടെത്തിയത്. പൊലീസ് അന്വേഷണം ആരംഭിച്ചു. പെൺകുട്ടിയെ മാതാപിതാക്കൾക്കൊപ്പം വിട്ടു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.