തസ്മീത് എവിടെ? ​െ​ചന്നെയിൽ ഇറങ്ങിയതിന്റെ ദൃശ്യവും കിട്ടി; അസമിലേക്ക് ട്രെയിൻ കയറിയെന്ന് സൂചന

തിരുവനന്തപുരം: ക​ഴക്കൂട്ടത്തുനിന്ന്​ ചൊവ്വാഴ്ച രാവിലെ മുതൽ കാണാതായ പെൺകുട്ടി ചെന്നൈയിൽ ട്രെയിൻ ഇറങ്ങിയതി​െന്റ ദൃശ്യങ്ങൾ അന്വേഷണസംഘത്തിന് ലഭിച്ചു. അസം സ്വദേശികളായ അന്‍വര്‍ ഹുസൈൻ-ഫര്‍വീൻ ബീഗം ദമ്പതികളുടെ മകൾ തസ്​മീത്​​ തംസമിനെയാണ്​ (13) ചെന്നൈ റെയിൽവേ സ്റ്റേഷനിലെ സി.സിടി.വി ദൃശ്യങ്ങളിൽ കണ്ടെത്തിയത്. ഇന്ന് രാവി​ലെ ഏഴുമണിക്ക് ട്രെയിൻ ഇറങ്ങുന്ന ദൃശ്യങ്ങളാണ് പുറത്തുവന്നത്. തുടർന്ന് 10.45നുള്ള ട്രെയിനിൽ അസമിലേക്ക് പോയതായാണ് സൂചന.

ക​ുട്ടിക്ക് വേണ്ടി ട്രെയിനുകളിലും റെയിൽവേ സ്​റ്റേഷനുകളിലുമടക്കം തിരച്ചിൽ ഉൗർജിതമാക്കി. വീട്ടുകാരോട് പിണങ്ങിയാണ് പെൺകുട്ടി വീടുവിട്ടിറങ്ങിയത്​. മാതാപിതാക്കൾ ജോലിക്ക് പോയസമയം വീട്ടിൽനിന്ന്​ പുറത്തു​പോവുകയായിരുന്നു. ട്രെയിനിൽ പെൺകുട്ടി യാത്ര ചെയ്യുന്നതിന്‍റെ ​​​​​ഫോട്ടോ പൊലീസിന്​ ലഭിച്ചത്​ അന്വേഷണത്തിന്​ സഹായകമായി. ചൊവ്വാഴ്ച ഉച്ചക്ക്​ ട്രെയിനിൽ യാത്രചെയ്ത വിദ്യാർഥിനിയാണ്​ തസ്മീത്​​ കരയുന്നതിൽ സംശയം തോന്നി മൊബൈലിൽ ചിത്രമെടുത്തത്​. പെൺകുട്ടിയെ കാണാതായ വാർത്ത ബുധനാഴ്ച മാധ്യമങ്ങളിലൂടെ അറിഞ്ഞതോടെ വിദ്യാർഥിനി ​ഫോ​ട്ടോ പൊലീസിന്​ കൈമാറി.

തിരുവനന്തപുരത്തുനിന്ന്​ കന്യാകുമാരിയിലേക്കുള്ള ട്രെയിനിൽ കയറിയ പെൺകുട്ടി നാഗർകോവിൽ സ്​​​​റ്റേഷനിൽ ഇറങ്ങിയതായി സി.സി ടി.വി പരിശോധനയിൽ വ്യക്തമായിരുന്നു. കുപ്പിയിൽ വെള്ളമെടുത്തശേഷം തിരികെ ട്രെയിനിൽ കയറുന്നതും ഇതിലുണ്ടായിരുന്നു. കന്യാകുമാരിയിൽനിന്ന്​​ ചൊവ്വാഴ്ച വൈകീട്ട്​ ചെന്നൈ എഗ്​മോറിലേക്ക്​ പുറപ്പെട്ട ട്രെയിനിൽ കയറി രാവിലെയാണ് ചെന്നൈയിലെത്തിയത്. ​തമിഴ്​നാട്​ പൊലീസിന്‍റെ സഹകരണത്തോടെയായിരുന്നു അന്വേഷണം. ആർ.പി.എഫുമായി ബന്ധപ്പെട്ട്​ കേരളത്തിൽനിന്ന്​ അസമിലേക്കുള്ള വിവേക്​ എക്സ്​പ്രസിലും തിരച്ചിൽ നടത്തിയിരുന്നു.

കഴക്കൂട്ടം ബ്ലോക്ക് ഓഫിസിന് സമീപത്തെ വാടക വീട്ടിലാണ് പെൺകുട്ടിയും കുടുംബവും താമസിക്കുന്നത്. ഒരു മാസം മുമ്പാണ് അസമിൽനിന്ന്​ ഇവര്‍ എത്തിയത്​. ആദ്യം ഹോട്ടലിലായിരുന്നു അന്‍വറിന്​ ജോലി. തുടർന്ന്​ കഴക്കൂട്ടത്തെ സ്കൂളില്‍ തോട്ടപ്പണിക്കാരനായി പ്രവർത്തിക്കുയായിരുന്നു. ഭാര്യയും ഇവിടെ സഹായിയായുണ്ട്​. ഇവര്‍ക്ക് 19 വയസ്സുള്ള മകനും ഒമ്പതും ആറും വയസ്സുള്ള രണ്ടു പെണ്‍മക്കളുംകൂടിയുണ്ട്. സുരക്ഷിതയായി തസ്മീത്​ മടങ്ങിവരുന്നതും ​ കാത്തിരിക്കുകയാണ്​ ഈ കുടുംബം.