പട്ടിമറ്റം പഞ്ചായത്ത്; പ്രഖ്യാപനം ഇനിയുമകലെ

കോലഞ്ചേരി: പട്ടിമറ്റം പഞ്ചായത്ത് പ്രഖ്യാപനത്തിനായി കാത്തിരിപ്പ് നീളുന്നു. കുന്നത്തുനാട് നിയോജക മണ്ഡലത്തിലെ പട്ടിമറ്റം ആസ്ഥാനമായി പുതിയ പഞ്ചായത്തിനായാണ് കാത്തിരിപ്പ് നീളുന്നത്. പതിറ്റാണ്ടുകളായി ഉയരുന്ന ഈ ആവശ്യം പ്രഖ്യാപനത്തി​‍ൻെറ വക്കിലെത്തിയെങ്കിലും നിയമ നടപടികളും മറ്റു നൂലാമാലകളും ഉയർന്നതോടെ ചുവപ്പുനാടയിൽ കുരുങ്ങുകയായിരുന്നു. മണ്ഡലത്തിലെ കുന്നത്തുനാട്, മഴുവന്നൂർ, കിഴക്കമ്പലം പഞ്ചായത്തുകൾ വിഭജിച്ച് പട്ടിമറ്റം ആസ്ഥാനമായി പുതിയ പഞ്ചായത്ത് രൂപവത്​കരിക്കണമെന്നായിരുന്നു ജനകീയ ആവശ്യം. മുൻകാലങ്ങളിൽ പല തെരഞ്ഞെടുപ്പുകളിലെയും പ്രധാന പ്രചാരണ വിഷയങ്ങളിലൊന്നും ഇതായിരുന്നു. ഒടുവിൽ മുൻ സർക്കാറി‍ൻെറ കാലത്ത് നടപടികൾ അന്തിമ ഘട്ടത്തിലെത്തിയെങ്കിലും കിഴക്കമ്പലം പഞ്ചായത്തിലെ ഒരു വാർഡ് പുതിയ പഞ്ചായത്തിൽ ചേർക്കുന്നതുമായി ബന്ധപ്പെട്ടുണ്ടായ നിയമ നടപടികളാണ് സംസ്ഥാനതലത്തിൽ തന്നെ പുതിയ പഞ്ചായത്തുകളുടെ രൂപവത്​കരണം അവതാളത്തിലാക്കിയത്. ഇതോടെ തുടർ നടപടികളിൽനിന്ന് പിന്നാക്കം പോകുകയായിരുന്നു. ജില്ലയിലെ തന്നെ ഏറ്റവും വലിയ പഞ്ചായത്തുകളിൽപെടുന്ന മഴുവന്നൂർ, കുന്നത്തുനാട് പഞ്ചായത്തുകൾ ഭരണസൗകര്യത്തിനായി വിഭജിക്കണമെന്ന ആവശ്യവും ഇതോടെ അവഗണിക്കപ്പെടുകയായിരുന്നു. ഇക്കാര്യത്തിൽ വീണ്ടും ജനകീയ ഇടപെടൽ ശക്തമാക്കാനാണ് വിവിധ സംഘടനകളുടെ തീരുമാനം.