കൊച്ചി: വോട്ടെണ്ണൽ തുടങ്ങിയ ആദ്യനിമിഷം മുതൽ തന്നെ ഉമ തോമസിന് അനുകൂലമായ ട്രെൻഡ് വ്യക്തമായതോടെ യു.ഡി.എഫ് ക്യാമ്പുകളിൽ ആഘോഷങ്ങൾ തുടങ്ങിയിരുന്നു. പോളിങ് സ്റ്റേഷന് മുന്നിൽ കൂടിനിന്ന പ്രവർത്തകർ മുദ്രാവാക്യങ്ങൾ വിളിച്ചു തുടങ്ങി. വോട്ടെണ്ണലിന് മുന്നെ വിജയമുറപ്പിച്ച മട്ടിലായിരുന്നു യു.ഡി.എഫ് പ്രവർത്തകരുടെ ആവേശം. പോസ്റ്റൽ വോട്ടെണ്ണിയതിന്‍റെ ഫലം പുറത്തുവന്നതോടെ കൗണ്ടിങ്ങ് സെന്‍ററായ മഹാരാജാസ് കോളജിന് മുന്നിലേക്ക് കൂടുതൽ പ്രവർത്തകർ എത്തി. തുടർന്ന് ആവേശ കൊടുമുടിയിലായ പ്രവർത്തകർ ഉമ തോമസിനെ അഭിനന്ദിച്ച് മുദ്രാവാക്യം വിളികളുമായി പ്രകടനം തുടങ്ങി. ലീഡ് നില 5000 കടന്നതോടെ വിജയം ഉറപ്പിച്ച പ്രവർത്തകർ മുഖ്യമന്ത്രിക്കും സർക്കാറിനും കെ-റെയിൽ പദ്ധതിക്കുമെതിരെ രൂക്ഷ വിമർശനമാണ് ഉയർത്തിയത്. പുറത്താക്കിയ കോൺഗ്രസ് നേതാവ് കെ.വി. തോമസിനെതിരെയും വൻ പ്രതിഷേധം ഉയർന്നു. ജയ് വിളിച്ചും പടക്കം പൊട്ടിച്ചും ആഹ്ലാദപ്രകടനം തുടങ്ങിയ പ്രവർത്തകർ കെ.വി. തോമസിന്‍റെ കോലവും പോസ്റ്ററും കത്തിച്ചു. ലീഡ് നില പതിനായിരം കടന്നതോടെ കൗണ്ടിങ്ങ് സ്റ്റേഷനിലേക്ക് നൂറ് കണക്കിന് പ്രവർത്തകർ ഒഴുകിയെത്തി. ചെറുസംഘങ്ങളായി ആഹ്ലാദ പ്രകടനവും തുടങ്ങി. ഡി.സി.സി ഓഫിസിനു മുന്നിലും പ്രകടനം ആരംഭിച്ചതോടെ തൃക്കാക്കര യു.ഡി.എഫിന്‍റെ കൈയിൽ തന്നെയൊതുങ്ങിയെന്ന് ഉറപ്പിച്ചു. ഘടകകക്ഷികളടക്കം കൊടികൾ വീശിയും കൊട്ടും പാട്ടുമായി പ്രകടനം തുടങ്ങി. വിജയമുറപ്പിച്ച ശേഷം കൗണ്ടിങ്ങ് സ്റ്റേഷനിൽനിന്ന് പുറത്തുവന്ന ഉമ തോമസിനെ നൂറുകണക്കിന് പ്രവർത്തകർ വൻ ആവേശത്തോടെയാണ് സ്വീകരിച്ചത്. പതാകയും പൊന്നാടയും പൂക്കളും നൽകി. ഒപ്പം നിന്ന എല്ലാവർക്കും നന്ദി പറഞ്ഞാണ് ഉമ തോമസ് പ്രവർത്തകരുടെ അടുത്തേക്കെത്തിയത്. വിജയാഹ്ലാദത്തിന്‍റെ കൊടുമുടിയിൽ നിൽക്കുമ്പോഴും ഉമയുടെ കണ്ണ് പലപ്പോഴും നിറഞ്ഞു. കൗണ്ടിങ് സ്റ്റേഷനിൽനിന്ന് ഡി.സി.സി ഓഫിസിലെത്തിയപ്പോൾ വലിയ ആവേശമായിരുന്നു. നേതാക്കളും പാർട്ടി പ്രവർത്തകരും ചേർന്ന് ഉമ തോമസിനെ സ്വീകരിച്ചു. *ശോകമായി ലെനിൻ സെന്‍റർ വോട്ടെണ്ണൽ തുടങ്ങും മുമ്പെ ഡി.സി.സി ഓഫിസിൽ ആളും ആരവവും ഉണ്ടായിരുന്നെങ്കിൽ ലെനിൻ സെന്‍ററിൽ കാര്യങ്ങൾ നേരെ തിരിച്ചായിരുന്നു. രാവിലെ ഏഴോടെ ജോ ജോസഫ് പാർട്ടി ഓഫിസിലെത്തുമെന്നാണ് അറിയിച്ചത്. എന്നാൽ, സ്ഥാനാർഥിയെത്തിയിട്ടും മുതിർന്ന പ്രധാനപ്പെട്ട നേതാക്കളാരും പാർട്ടി ഓഫിസിലെത്തിയില്ല. സാഹചര്യം പ്രതികൂലമാണെന്ന് സൂചന വന്നതോടെ ജോ ജോസഫും പ്രവർത്തകരും ഭക്ഷണം കഴിക്കാനെന്ന പേരുപറഞ്ഞ് പുറത്തിറങ്ങി. മാധ്യമപ്രവർത്തകരുടെ ചോദ്യത്തിന് നമുക്ക് നോക്കാലോ എന്ന് പറഞ്ഞിറങ്ങി. പിന്നാലെ പാർട്ടി ഓഫിസിലുണ്ടായിരുന്ന മാധ്യമ പ്രവർത്തകരെ സംസ്ഥാന കമ്മിറ്റിയംഗം സി.എം. ദിനേശ് മണി വന്ന് നിർബന്ധിച്ചിറക്കി വിട്ടു. മാധ്യമങ്ങളോട് പ്രതികരിക്കാൻ പോലും പാർട്ടി ഓഫിസിൽ നേതാക്കൾ ഉണ്ടായിരുന്നില്ല. വൈകിയെത്തിയ നേതാക്കളാണ് പിന്നീട് മാധ്യമങ്ങളോട് പ്രതികരിച്ചത്. പാർട്ടി ഓഫിസിലുണ്ടായിരുന്ന പ്രവർത്തകരും പോയതോടെ ആളും ആരവവുമില്ലാതെ ശോകാവസ്ഥയിലായി ലെനിൻ സെന്‍റർ.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.